कुंभमेळ्याच्या ध्वजारोहणासाठी राष्ट्रपती मुर्मू यांना फडणवीसांचे निमंत्रण

नाशिक-त्र्यंबकेश्वर सिंहस्थ कुंभमेळ्याच्या मोठ्या पर्वाची सुरुवात ३१ ऑक्टोबरला ध्वजारोहण सोहळ्याने होणार आहे. या सोहळ्याचे निमंत्रण मुख्यमंत्री देवेंद्र फडणवीस यांनी नवी दिल्लीत राष्ट्रपती द्रौपदी मुर्मू यांना दिले. राष्ट्रपती भवन येथे झालेल्या या भेटीला उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्यासह राज्य मंत्रिमंडळातील इतर मंत्री, अधिकारी आणि पदाधिकाऱ्यांचे शिष्टमंडळ उपस्थित होते.

फडणवीस यांनी नाशिक आणि त्र्यंबकेश्वर येथे होणाऱ्या या सोहळ्याचे औपचारिक निमंत्रण राष्ट्रपतींना दिले. त्यांना एक विशेष भेटवस्तू संचही देण्यात आला. महाराष्ट्राची आध्यात्मिक परंपरा, आदिवासी उद्योजकता, वस्त्रकला, शेतीची समृद्धी आणि खाद्यसंस्कृती अशा वैविध्यपूर्ण वारशाची ओळख या संचातून करून दिली आहे.

ध्वजारोहणाच्याच दिवशी आणखी काही कार्यक्रम आहेत. गोदा आरती, नाशिक-त्र्यंबकेश्वर कुंभमेळा प्राधिकरणाच्या संकेतस्थळाचे उद्‌घाटन, कुंभमेळा गीताचे लोकार्पण, कुंभमेळ्यावर आधारित कॉफीटेबल बुकचे आणि कुंभमेळा टपाल तिकिटाचे अनावरण. या सगळ्यासाठीही राष्ट्रपतींना आमंत्रित करण्यात आले आहे.

फडणवीस यांनी या भेटीबद्दल सांगितले की, त्यांनी राष्ट्रपतींना नाशिक-त्र्यंबकेश्वर सिंहस्थ कुंभमेळा 2027 च्या धर्मध्वज फडकावण्यासाठी सन्मानपूर्वक निमंत्रित केले. सिंहस्थ कुंभमेळ्याच्या पूर्वतयारीतील हा एक महत्त्वपूर्ण टप्पा आहे, असेही त्यांनी म्हटले आहे.

या वेळी अन्न व नागरी पुरवठा व ग्राहक संरक्षण मंत्री छगन भुजबळ, जलसंपदा, आपत्ती व्यवस्थापन व कुंभमेळा मंत्री तथा नाशिकचे पालकमंत्री गिरीश महाजन, शालेय शिक्षण मंत्री दादाजी भुसे आणि अन्न व औषध प्रशासन व विशेष सहाय्य मंत्री नरहरी झिरवाळ उपस्थित होते. नाशिकच्या महापौर हिमगौरी आडके-आहेर, त्र्यंबक नगरपरिषदेच्या नगराध्यक्षा त्रिवेणी तुंगार, त्र्यंबकेश्वर देवस्थानचे अध्यक्ष तथा धर्मादाय सहआयुक्त न्यायमूर्ती विवेक सोनवणे हेही होते. नाशिक पुरोहित संघाचे अध्यक्ष चंद्रशेखर पंचाक्षरी, त्र्यंबकेश्वर पुरोहित संघाचे अध्यक्ष मनोज थेटे, रामतीर्थ गोदावरी सेवा समितीचे नरसिंहकृपा दास, सिंहस्थ कुंभमेळा प्राधिकरणाचे अध्यक्ष तथा विभागीय आयुक्त डॉ. प्रवीण गेडाम आणि कुंभमेळा आयुक्त शेखर सिंह यांचीही उपस्थिती होती.

राष्ट्रपतींना दिलेले निमंत्रण खास कलात्मक संकल्पनेवर आधारलेले आहे. निमंत्रणाची पेटी उघडताच कुंभमेळ्याची पौराणिक पार्श्वभूमी, आध्यात्मिक महत्त्व आणि भव्यता दाखवणारी त्रिमितीय (पॉप-अप) कलाकृती समोर येते. दृष्टी, श्रवण, गंध, चव आणि स्पर्श या पाच इंद्रियांशी जोडलेले अनुभव यात आहेत. त्यातून नाशिकचा सांस्कृतिक वारसा, पवित्र गोदावरीचा महिमा आणि भारतीय परंपरेतील कुंभमेळ्याचे अनन्यसाधारण महत्त्व अधोरेखित केले आहे.

भेटवस्तू संचात आदिवासी विकास विभागांतर्गत शबरी नॅचरल्सची उत्पादने आहेत. अगरबत्ती, भरडधान्यांपासून केलेले खाद्यपदार्थ, मोहफुलांची उत्पादने, बांबूच्या वस्तू आणि वनमध यांचा त्यात समावेश आहे. यातून आदिवासी समाजाचे पारंपरिक ज्ञान, नैसर्गिक संसाधनांचा योग्य वापर आणि स्थानिक उद्योजकतेचे सामर्थ्य दिसते. आदिवासी कारागिरांचे कौशल्य, स्थानिक उत्पादनांना बाजारपेठ मिळवून देण्याचे प्रयत्न आणि समाजाच्या आर्थिक सक्षमीकरणाचा संदेशही यातून दिला आहे.

महाराष्ट्राच्या वस्त्रपरंपरेचा मानबिंदू असलेली येवला येथील पैठणी या संचात आहे. नाशिकच्या शेतीसमृद्धीचे प्रतिनिधित्व काळ्या मनुका आणि काजू करतात. नाशिकच्या खाद्यपरंपरेचे प्रतीक म्हणून चिवडाही ठेवला आहे. याशिवाय निवडक मिठाई आणि सुकामेव्याचे पदार्थही संचात आहेत.