मोहम्मद शामीचा कसोटी क्रिकेटला रामराम, सोशल मीडियावर पोस्ट करून केली घोषणा

भारतीय क्रिकेट संघाचा वेगवान गोलंदाज मोहम्मद शामी याने कसोटी क्रिकेटमधून निवृत्ती घेत असल्याची घोषणा केली आहे. सोशल मीडियावर पोस्ट टाकून त्याने हा निर्णय जाहीर केला. या बातमीमुळे भारतीय तसेच जागतिक क्रिकेटमध्ये मोठी खळबळ उडाली आहे.

शामी बऱ्याच काळापासून कसोटी क्रिकेटपासून दूर होता. त्याने आपला शेवटचा कसोटी सामना 2023 मध्ये ऑस्ट्रेलियाविरुद्ध खेळला होता, म्हणजे तब्बल तीन वर्षांपूर्वी. त्यानंतर झालेली दुखापत आणि इतर कारणांमुळे तो भारताकडून कसोटी खेळू शकला नाही. 2025 च्या चॅम्पियन्स ट्रॉफीनंतरही भारतीय संघाकडून रेड बॉल क्रिकेटमध्ये खेळण्याची संधी त्याला मिळाली नाही. अखेर आता त्याने कसोटी क्रिकेटमधून अधिकृतपणे निवृत्ती जाहीर केली आहे.

आपल्या पोस्टमध्ये शामीने लिहिले आहे की, पांढऱ्या जर्सीचा निरोप घेतोय, पण तिच्याशी जोडलेल्या आठवणींचा कधीच नाही. भारताची कसोटी जर्सी पहिल्यांदा घातली, तेव्हा देशासाठी काहीतरी करून दाखवायचे, एवढेच एक स्वप्न होते. त्यानंतर प्रत्येक विकेट, प्रत्येक संघर्ष, प्रत्येक दुखापत आणि प्रत्येक पुनरागमनाने काही ना काही शिकवले, असे त्याने म्हटले आहे.

कसोटी क्रिकेट माझ्यासाठी फक्त एक फॉरमॅट नव्हता, तर माझ्या आयुष्याचा अतिशय खास भाग राहिला आहे, असेही शामीने पोस्टमध्ये सांगितले. जड मनाने आणि असंख्य सुंदर आठवणींसह कसोटी क्रिकेटमधून निवृत्ती घेण्याचा निर्णय घेत असल्याचे त्याने लिहिले आहे.

या प्रवासात साथ देणारे प्रत्येक सहकारी खेळाडू, प्रशिक्षक, कुटुंब आणि कोट्यवधी भारतीय यांचे त्याने मनापासून आभार मानले आहेत. चांगल्या आणि कठीण, दोन्ही काळात या सगळ्यांनी आपल्यावर विश्वास ठेवला, असे तो म्हणतो. BCCI आणि क्रिकेट असोसिएशन ऑफ बंगाल (CAB) यांचेही त्याने आभार मानले. त्यांनी आपल्या कौशल्यावर विश्वास दाखवला, पुढे जाण्याच्या संधी दिल्या आणि आपल्या क्रिकेटच्या प्रवासात महत्त्वाची भूमिका बजावली, असे त्याने नमूद केले आहे.

पोस्टच्या शेवटी शामीने लिहिले आहे, 'मैदानावर माझा शेवटचा कसोटी चेंडू टाकून झाला असेल, तरी भारतासाठी खेळल्याचा अभिमान माझ्या मनात कायम जिवंत राहील.' धन्यवाद, टेस्ट क्रिकेट, असे म्हणत त्याने स्वतःचे नाव लिहून पोस्ट संपवली.

शामी 2023 मध्ये भारताकडून आयसीसी वर्ल्डकप स्पर्धा खेळला होता. त्या स्पर्धेच्या फायनलमध्ये भारताचा ऑस्ट्रेलियाकडून पराभव झाला होता, पण त्या स्पर्धेत शामीने आपल्या गोलंदाजीने सर्वांना प्रभावित केले होते. कसोटीतून निवृत्ती घेतली असली, तरी व्हाईट बॉल क्रिकेट म्हणजे वनडे आणि टी 20 तसेच देशांतर्गत क्रिकेट तो खेळत राहणार असल्याचे शामीने स्पष्ट केले आहे. मागच्या काही काळात त्याला संघात स्थान मिळाले नाही किंवा दिले गेले नाही. त्यामागे त्याची दुखापत किंवा इतर कारणे असल्याचे म्हटले जाते.