निवड समितीने डावलूनही मोहम्मद शमी आशावादी, म्हणतो आजही पीकवर आहे

भारताचा अनुभवी आणि स्टार वेगवान गोलंदाज मोहम्मद शमी याने अजूनही हार मानलेली नाही. निवड समिती त्याच्याकडे सातत्याने दुर्लक्ष करत असली, तरी देशासाठी पुन्हा खेळण्याची त्याची आशा जिवंत आहे. देशांतर्गत क्रिकेटमध्ये बंगालकडून खेळणाऱ्या शमीने एका पत्रकार परिषदेत हे स्पष्टपणे सांगितले. प्रत्येक खेळाडूचे एक ध्येय असते, असे तो म्हणाला. आपला फॉर्म आणि फिटनेस याबद्दलही त्याने मोकळेपणाने मत मांडले.

निवड समितीची उदासीनता आणि आगामी दौऱ्यांमधून झालेली वगळणूक याबद्दल विचारले असता शमी आत्मविश्वासाने म्हणाला, "सर, अजूनही आम्ही उत्तम खेळतोय आणि Peak वर आहोत. खोटं बोलण्यात काही अर्थ नाही. आम्ही जसे आहोत, तसेच उत्तम खेळत आहोत." आपण अजूनही सर्वोत्तम गोलंदाजी करत असल्याचे त्याने पुढे सांगितले. कोणाची निवड होते किंवा होत नाही यावर नाही, तर जे आपल्या हातात आहे त्यावरच आपले लक्ष आहे, असेही तो म्हणाला.

मोहम्मद शमीने भारतासाठी आपला शेवटचा आंतरराष्ट्रीय सामना मार्च २०२५ मध्ये खेळला. तेव्हापासून तो संघाबाहेर आहे. व्हाईट-बॉल फॉरमॅटमधील भारतीय वेगवान गोलंदाजीबद्दलच्या चिंता पाहता त्याच्या पुनरागमनाची मागणी तीव्र झाली आहे. दरम्यान, त्याचा समकालीन असलेला ३६ वर्षीय वेगवान गोलंदाज भुवनेश्वर कुमार जवळपास चार वर्षांनंतर भारतीय संघात परतला आहे. भुवनेश्वरचे स्वागत करताना शमी म्हणाला की, त्याचा सध्याचा उत्कृष्ट फॉर्म पाहता हे पुनरागमन खूप आधीच व्हायला हवे होते.

न्यूझीलंड दौऱ्यासाठीच्या सर्व फॉरमॅटच्या संघातून वगळल्याबद्दल शमी म्हणाला की, तो निराश नाही. तो म्हणाला, "आशा नेहमीच राहिली पाहिजे. कोणत्याही व्यवसायात किंवा खेळात तुमचे एक ध्येय असले पाहिजे. आम्ही आज रणजी ट्रॉफी खेळत आहोत आणि विजेतेपद जिंकण्याचे आमचे ध्येय आहे. माझे ध्येय अगदी स्पष्ट आहे: शक्य तितके जास्त क्रिकेट खेळणे. मी गेल्या देशांतर्गत हंगामातील सर्व सामनेही खेळलो होतो."

आपल्या कारकिर्दीत बंगाल क्रिकेट संघाचे जे योगदान आहे, त्याचीही शमीने आठवण काढली. जोपर्यंत तो खेळत राहील, तोपर्यंत या संघासाठी १००% योगदान देत राहील, असे त्याने सांगितले. बोलताना तो भावूक झाला. तो म्हणाला, "या संघाने मला माझी ओळख दिली आहे. आज मी जो काही आहे, तो या संघामुळेच आहे. आणि जेव्हा मी माझ्या कारकिर्दीला निरोप देईन, तेव्हा मी याच संघासोबत त्याचा शेवट करेन."

दरम्यान, मोहम्मद शमीला भारतीय संघात कधी स्थान मिळणार, याची चाहते वाट पाहत आहेत.