वीरेंद्र सेहवाग यांचा वाढदिवस: कसोटीत १०० पेक्षा कमी चेंडूंत ७ शतके, नावावर जागतिक विक्रम

भारताचे माजी सलामीवीर वीरेंद्र सेहवाग यांचा आज वाढदिवस आहे. भारताचा स्टार आणि आक्रमक सलामीवीर म्हणून त्यांना ओळखले जाते. २० ऑक्टोबर १९७८ रोजी दिल्लीतील नजफगड भागात त्यांचा जन्म झाला. आक्रमक फलंदाजीच्या जोरावर त्यांनी जागतिक क्रिकेटमध्ये स्वतःची ओळख तयार केली. त्यांच्या नावावर अनेक रेकॉर्ड आहेत आणि त्यातले काही अजूनही कुणाला मोडता आलेले नाहीत.

वनडे असो किंवा कसोटी, सगळीकडे आक्रमक खेळणे हे सेहवाग यांचे वैशिष्ट्य होते. कसोटी क्रिकेटच्या इतिहासात त्यांच्या नावावर असा एक विक्रम नोंदवला गेला आहे, ज्याच्या जवळपासही जगातला दुसरा कोणताही फलंदाज पोहोचलेला नाही. सेहवाग यांनी कसोटीत १०० पेक्षा कमी चेंडूंमध्ये तब्बल ७ वेळा शतक झळकावले आहे. हा जागतिक विक्रम आहे.

सुरुवातीपासूनच गोलंदाजांवर तुटून पडायचे आणि त्यांना सेट होऊ द्यायचे नाही, अशी सेहवाग यांची रणनीती दिसून यायची. कसोटी क्रिकेटच्या इतिहासात पहिल्या चेंडूपासून चौफेर हल्ला करत सर्वात कमी चेंडूंत शतके करण्याच्या बाबतीत ते जगातले पहिले फलंदाज आहेत. कसोटी क्रिकेटमध्ये त्यांनी आणखीही अनेक विक्रम आपल्या नावावर केले आहेत.

आक्रमक फलंदाजीसाठी ओळखल्या जाणाऱ्या इतर खेळाडूंनीही कसोटी सामन्यांमध्ये वेगवान शतके केली आहेत. ब्रेंडन मॅक्क्युलम, डेव्हिड वॉर्नर आणि ख्रिस गेल यांनी आपल्या कारकिर्दीत ४ वेळा १०० पेक्षा कमी चेंडूंत शतक पूर्ण केले आहे. भारताचे दिग्गज अष्टपैलू कपिल देव, पाकिस्तानचे शाहिद आफ्रिदी आणि वेस्ट इंडिजचे महान फलंदाज ब्रायन लारा यांनी हा विक्रम ३ वेळा केला आहे. म्हणजेच या यादीत सेहवाग यांचा आकडा या सगळ्या खेळाडूंपेक्षा जास्त आहे.

सेहवाग यांच्या या शतकांचा तपशील पाहिला तर २००६ मध्ये वेस्ट इंडिजविरुद्ध ७८ चेंडूंत केलेले शतक त्यांचे वेगवान शतक होते. त्यानंतर २००८ मध्ये श्रीलंकेविरुद्ध ८७ चेंडूंत, २०१० मध्ये श्रीलंकेविरुद्ध ९० चेंडूंत आणि २०१० मध्येच दक्षिण आफ्रिकेविरुद्ध ९० चेंडूंत त्यांनी कसोटी क्रिकेटमध्ये शतक पूर्ण केले. तसेच २००९ मध्ये श्रीलंकेविरुद्ध ९७ चेंडूंत त्यांनी शतक पूर्ण केले होते.

सेहवाग यांच्या फलंदाजीची खासियत म्हणजे परिस्थिती कोणतीही असो किंवा समोर कुठलाही गोलंदाज असो, त्यांची खेळण्याची आक्रमक शैली कधीच बदलली नाही. याच आक्रमक शैलीत त्यांनी गोलंदाजांचा नेहमीच खरपूस समाचार घेतला. म्हणूनच वाढदिवसानिमित्त माजी स्फोटक सलामीवीर सेहवाग यांचा हा विक्रम पुन्हा एकदा आठवला जात आहे.