'धाराऊ' चित्रपटाचा टीझर समोर; २३ ऑक्टोबरला महाराष्ट्रातील चित्रपटगृहांत येणार

'धाराऊ... ती गाय नाय... माय हाय!' या टॅगलाइनमुळे चर्चेत आलेल्या आगामी मराठी चित्रपट 'धाराऊ'चा अधिकृत टीझर नुकताच प्रदर्शित झाला आहे. या टीझरमधून ग्रामीण महाराष्ट्रातील जीवनशैली, भारतीय संस्कृती आणि गोमातेप्रती असलेली श्रद्धा यांची झलक दिसते. एका लहान मुलाचे आणि गायीचे भावनिक नाते यात अधोरेखित केले आहे, त्यामुळे चित्रपटाविषयीची उत्सुकता वाढली आहे.

चित्रपटाला आतापर्यंत २६ राष्ट्रीय आणि आंतरराष्ट्रीय पुरस्कार मिळाल्याचा दावा दिग्दर्शक मनिष सुरेश शिंदे यांनी केला आहे. पाकिस्तानातील पेशावर इंटरनॅशनल फिल्म फेस्टिव्हलमध्ये 'बेस्ट डेब्यू फीचर फिल्म' पुरस्कार मिळाल्याची माहितीही त्यांनी दिली. हा शिंदे यांचा पहिलाच मराठी चित्रपट आहे. या सन्मानामुळे चित्रपटाच्या विषयाची आंतरराष्ट्रीय स्तरावर दखल घेतली गेली, अशी भावना त्यांनी व्यक्त केली.

चित्रपटामागची भूमिका सांगताना शिंदे म्हणाले की, प्रत्येक जण आपापल्या परीने गोमातेच्या संरक्षणासाठी आणि संवर्धनासाठी काम करत असतो. कुणी गोशाळा उभारून गोपालन करतो, तर कुणी वेगवेगळ्या माध्यमांतून जनजागृती करतो. चित्रपटाच्या माध्यमातून या विषयावर भाष्य करण्याचा आपला प्रयत्न असल्याचे त्यांनी सांगितले.

हिंदू धर्मात गायीला मातेचे स्थान का दिले जाते आणि ती पूजनीय का मानली जाते, यामागील भावना व विचार 'धाराऊ'मधून मांडण्याचा प्रयत्न केल्याचेही त्यांनी नमूद केले. मिळालेल्या पुरस्कारांबद्दल आनंद व्यक्त करताना, चित्रपटामागचा विचार प्रेक्षकांपर्यंत पोहोचेल, अशी आशा त्यांनी व्यक्त केली.

टीझरमध्ये ग्रामीण महाराष्ट्रातील वातावरण, धार्मिक स्थळांची पार्श्वभूमी आणि गायीच्या सहवासातील बालपणाची झलक पाहायला मिळते. गोमातेप्रती श्रद्धा, माणुसकी, ग्रामीण संस्कृती आणि भावनिक नाती यांचा वेध चित्रपटातून घेतला आहे. 'धाराऊ... ती गाय नाय... माय हाय!' ही टॅगलाइन या नात्याची भावनिक खोली अधोरेखित करते. टीझरमधील दृश्यांमुळे कथेविषयी कुतूहल निर्माण झाले असून, ग्रामीण जीवनातील श्रद्धा आणि माणुसकीचे पैलू मोठ्या पडद्यावर कसे मांडले जाणार, याची प्रेक्षकांना उत्सुकता आहे.

बुलढाणा अर्बन मीडिया हाऊस आणि हिंदचित्र फिल्म्स प्रस्तुत 'धाराऊ' या चित्रपटाची निर्मिती श्री. राधेश्यामजी चांडक (भाईजी), डॉ. श्री. सुकेशजी झंवर आणि सौ. कोमलजी झंवर यांनी केली आहे. चित्रपटाची कथा, पटकथा, संवाद आणि दिग्दर्शनाची जबाबदारी मनिष सुरेश शिंदे यांनी सांभाळली आहे.

'धाराऊ' हा मराठी चित्रपट २३ ऑक्टोबर २०२६ पासून महाराष्ट्रातील चित्रपटगृहांमध्ये प्रदर्शित होणार आहे. टीझरच्या प्रदर्शनासोबतच चित्रपटाला मिळालेल्या पुरस्कारांचीही चर्चा सुरू झाली असून, प्रेक्षक आता चित्रपटाच्या प्रदर्शनाची वाट पाहत आहेत.