आपत्ती आणि आजारपणात मदतीसाठी 'महाराष्ट्र पब्लिक रिलीफ सोसायटी' स्थापन

मुंबई, दि. 4 : राज्यात दुष्काळ किंवा नैसर्गिक आपत्ती आली की बाधित नागरिकांना मदत करावी लागते. त्याचबरोबर आर्थिकदृष्ट्या गरजू रुग्णांच्या उपचारांसाठीही जास्त निधी लागतो. हा निधी उपलब्ध व्हावा, या उद्देशाने मुख्यमंत्री सहायता निधीला आता सामाजिक सहभागाचे बळ मिळणार आहे. मुख्यमंत्री देवेंद्र फडणवीस यांच्या संकल्पनेतून 'महाराष्ट्र पब्लिक रिलीफ सोसायटी'ची स्थापना करण्यात आली आहे.

कंपन्या, संस्था, देणगीदार आणि इतर सामाजिक घटक यांच्या सहभागातून अतिरिक्त निधी उभा केला जाईल. हा निधी गरजू रुग्णांसाठी तसेच विविध आपत्तींमुळे बाधित झालेल्या नागरिकांच्या मदतीसाठी वापरता येणार आहे. त्यामुळे महागड्या उपचारांची गरज असलेल्या रुग्णांना जास्त आर्थिक मदत देता येईल. शिवाय दुष्काळ, नैसर्गिक आपत्ती आणि इतर आपत्कालीन परिस्थितीतही मदतीचा हात पुढे करता येईल.

मुख्यमंत्री सहायता निधी कक्षाच्या आढावा बैठकीत मुख्यमंत्री देवेंद्र फडणवीस यांनी निर्देश दिले होते. रुग्णांच्या उपचारासाठी सामाजिक दायित्वातून अतिरिक्त निधी उभारण्याचे कोणते पर्याय आहेत, याचा अभ्यास करावा, असे त्यांनी सांगितले होते. त्यानुसार या सोसायटीची स्थापना झाली.

या नव्या व्यवस्थेमुळे हृदयरोग, कर्करोग, मूत्रपिंडविकार, मेंदूविकार यांसह विविध गंभीर आजारांवरील शस्त्रक्रियांसाठी अधिक मदत देता येणार आहे. महागडे आणि दीर्घकाळ चालणारे उपचार, तसेच औषधे, वैद्यकीय साहित्य आणि उपचारासाठी लागणाऱ्या इतर गोष्टींसाठीही मदत करता येईल. दुर्मिळ आजारांवरील उपचारांसाठी विशेष मदत उभारण्याचीही सोय या माध्यमातून होणार आहे.

रुग्णालये, स्वयंसेवी संस्था, कंपन्या आणि सामाजिक संस्था यांना गरजेनुसार एकत्र आणून वैद्यकीय मदतीचे वेगवेगळे उपक्रम राबवता येणार आहेत. बाधित व्यक्ती आणि त्यांच्या कुटुंबीयांना मदत करता येईल. गरीब नागरिकांना आवश्यक वस्तू वाटणे, दिव्यांगांसाठी काम करणाऱ्या संस्थांना सहाय्य करणे आणि सामुदायिक आरोग्य शिबिरे घेणे शक्य होणार आहे. आरोग्य जनजागृती, चर्चासत्रे, कार्यशाळा आणि सार्वजनिक आरोग्याशी संबंधित उपक्रमांनाही मदत करता येईल.

सामाजिक सहभागातून जास्त संसाधने उभारून गरजू रुग्ण आणि आपत्तीग्रस्त नागरिकांपर्यंत मदत पोहोचवणे, हा या सोसायटीचा व्यापक उद्देश आहे. राज्यात दुष्काळी परिस्थिती असो किंवा दुसरी एखादी नैसर्गिक आपत्ती, अशा संकटांच्या काळात सामाजिक संस्थांच्या सहभागातून मदतीचे उपक्रम राबवले जाणार आहेत. गरजेनुसार उपक्रम राबवता येणार असल्याने पुढील काळात मदतीची व्याप्ती वाढवता येईल.

या उपक्रमासाठी दात्यांनी पुढे येऊन आपले योगदान द्यावे, असे आवाहन मुख्यमंत्री सहायता निधी व धर्मादाय रुग्णालय मदत कक्षाचे प्रमुख रामेश्वर नाईक यांनी केले आहे. कंपन्या, संस्था आणि दानशूर व्यक्ती यांच्या लोकसहभागातून जास्तीत जास्त गरजूंपर्यंत मदत पोहोचवता येईल, असे या व्यवस्थेबद्दल सांगण्यात आले आहे.