सोन्याच्या दरात उच्चांकावरून मोठी घसरण; भाव 1 लाखांवर येणे सध्यातरी कठीण, तज्ज्ञांचे मत

गेल्या काही महिन्यांत भारतीय तसेच आंतरराष्ट्रीय बाजारात सोन्याच्या किमतीत उच्चांकी पातळीवरून मोठी घसरण झाली आहे. जानेवारीत सोन्याने विक्रमी उच्चांक गाठला होता, त्याच्या तुलनेत दर आता लक्षणीयरीत्या खाली आले आहेत. या तीव्र घसरणीमुळे आगामी सण आणि लग्नसराई तोंडावर असताना सोन्याचे भाव आणखी उतरणार का, असा मोठा प्रश्न ग्राहकांपुढे उभा आहे.

या घसरणीमागे अनेक जागतिक कारणे आहेत. सोन्याने उच्चांकी पातळी गाठल्यानंतर गुंतवणूकदारांनी प्रॉफिट बुकिंग केले. त्यात अमेरिकेतील महागाई आणि व्याजदराबाबतची अनिश्चितता यांची भर पडली आणि त्यामुळे सोन्याच्या तेजीला ब्रेक लागला. अमेरिकन बॉन्डचे रिअल यील्ड वाढले आणि डॉलर मजबूत झाला, त्यामुळे आंतरराष्ट्रीय बाजारात सोन्यावर सतत दबाव राहिला आहे.

सोन्याचा भाव थेट 1 लाख रुपयांपर्यंत खाली येईल का, असा प्रश्न विचारला जातो. त्यावर तज्ज्ञांचे म्हणणे आहे की, सध्यातरी हा स्तर गाठणे अत्यंत कठीण आणि असंभाव्य आहे. भारतीय बाजारात 1 लाख रुपयांचा स्तर दिसण्यासाठी आंतरराष्ट्रीय बाजारात सोन्याची किंमत प्रति औंस 2800 डॉलरच्या खाली जावी लागेल, असेही सांगितले जाते.

भू-राजकीय तणाव, मध्यवर्ती बँकांकडून सुरू असलेली सोन्याची खरेदी आणि डी-डॉलरायझेशन असे अनेक मजबूत स्ट्रक्चरल घटक सोन्याला आधार देत आहेत. अल्प मुदतीत किमतीत काहीसा चढउतार राहू शकतो, पण 1 लाख रुपयांपर्यंत मोठी घसरण होण्याचे सध्या कोणतेही संकेत नाहीत. तरीही तसे प्रत्यक्षात घडले, तर 1.50 लाखांवर असलेल्या सोन्याच्या दरात 50,000 रुपयांची घसरण होऊन तो 1 लाखांवर येईल.

रिझर्व्ह बँकेने (RBI) अलीकडे रेपो दरात केलेल्या बदलांनंतर सराफा बाजारात काही प्रमाणात संमिश्र आणि ताजी वाढ दिसून आली आहे. तज्ज्ञांच्या मते, सोन्याच्या दरातील ही नरमाई आणि स्थिरता लक्षात घेता सध्याच्या पातळीवर सोने खरेदी करणे फायदेशीर ठरू शकते.

तज्ज्ञांचे असेही म्हणणे आहे की, इतर गुंतवणूक पर्यायांच्या तुलनेत शेअर बाजार आणि म्युच्युअल फंड गेल्या काही काळापासून अपेक्षेइतके रिटर्न्स देत नाहीत, तर बँकांच्या मुदत ठेवींचे (FD) दर मर्यादित आहेत. अशा स्थितीत 4 ते 5 वर्षांच्या दीर्घकालीन दृष्टिकोनातून सोन्यात टप्प्याटप्प्याने, म्हणजे SIP पद्धतीने, गुंतवणूक करणे अधिक सुरक्षित आणि फायदेशीर ठरू शकते. सोन्याचे भविष्य उज्ज्वल असल्याने गुंतवणूकदारांनी याचा गांभीर्याने विचार करायला हवा, असे तज्ज्ञ सांगतात.