सुझुकीची नवी वॅगनआर जपानमध्ये सादर; वेलफायरसारखा लूक, ADAS, 360 डिग्री कॅमेरा आणि हायब्रिड इंजिन

भारतीय बाजारात सर्वाधिक पसंती मिळवणारी मारुती सुझुकी वॅगनआर आता नव्या रूपात समोर आली आहे. सुझुकीने जपानच्या बाजारात वॅगनआरच्या 7 व्या जनरेशनचे (New Generation WagonR) अनावरण केले आहे. या नव्या मॉडेलच्या डिझाईनमध्ये आणि फीचर्समध्ये मोठे बदल करण्यात आले आहेत. म्हणजेच गाडीचे बाहेरचे रूप आणि आतली सोय, या दोन्ही बाबतीत कंपनीने काहीतरी नवे दिले आहे.

नव्या वॅगनआरचा लूक काहीसा 'टोयोटा वेलफायर' (Toyota Vellfire) सारखा प्रीमियम वाटतो. विशेष म्हणजे या गाडीत अत्याधुनिक सुरक्षा प्रणाली आणि हायब्रिड इंजिनचा पर्याय देण्यात आला आहे.

कंपनीने गाडीची पारंपारिक टॉल-बॉय डिझाईन तशीच ठेवली आहे. मात्र फ्रंट फेशियामध्ये (Front Facia), म्हणजे गाडीच्या समोरच्या भागात, मोठे बदल केले आहेत. यात मोठी क्रोम ग्रिल, होरिझॉन्टल डिझाईनचे हेडलाईम्स आणि नवा बंपर दिला आहे. जपानी के-कार (Kei Car) नियमांनुसार गाडीची लांबी 3395 मिमी, रुंदी 1475 मिमी आणि उंची 1650 मिमी आहे. तिचा व्हीलबेस 2460 मिमी ठेवण्यात आला आहे.

प्रवाशांची सेफ्टी आणि आराम याला या मॉडेलमध्ये प्राधान्य दिले आहे. अॅडव्हान्स सेफ्टी यंत्रणा म्हणून यात ADAS (Advanced Driver Assistance System) आहे. त्यामध्ये इमर्जन्सी ब्रेकिंग आणि हाय-बीम असिस्ट असे फीचर्स मिळतात.

याशिवाय गाडीत इतरही अनेक फीचर्स आहेत. त्यात 360 डिग्री कॅमेरा आणि पार्किंग सेन्सर्स आहेत. नव्या डॅशबोर्डसह मोठी टचस्क्रीन इन्फोटेनमेंट सिस्टीम, वायरलेस एप्पल कारप्ले आणि अँड्रॉइड ऑटो मिळते. ऑटोमॅटिक क्लायमेट कंट्रोल आणि लवचिक सीटिंग अरेंजमेंट हेही यात आहे.

या मॉडेलचे सर्वात मोठे वैशिष्ट्य म्हणजे त्याचे इंजिन. यात 660 सीसीचे 3 सिलेंडर पेट्रोल इंजिन दिले जाण्याची शक्यता आहे. ते 54 पीएस पॉवर आणि 58 एनएम टॉर्क निर्माण करते. त्याला एक इलेक्ट्रिक मोटर जोडली जाऊ शकते, जी अतिरिक्त 10 पीएस पॉवर आणि 29 एनएम टॉर्क देते. गाडीत ई-सीव्हीटी (e-CVT) ऑटोमॅटिक गिअरबॉक्स मिळतो. रिपोर्ट्सनुसार ही हायब्रिड सिस्टीम 30 किमी ते 37 किमी प्रति लिटरपर्यंत मायलेज देऊ शकते.

आता भारतातल्या ग्राहकांना प्रश्न पडेल की ही गाडी आपल्याकडे कधी येणार. तर जपानमध्ये लॉन्च झालेली ही वॅगनआर भारतात विकल्या जाणाऱ्या मॉडेलपेक्षा पूर्णपणे वेगळी आहे. भारतात मारुती सुझुकी वॅगनआरचे फेसलिफ्ट व्हर्जन डिसेंबर 2026 पर्यंत लॉन्च करू शकते. त्यात भारतीय ग्राहकांच्या पसंतीनुसार बदल पाहायला मिळतील.