1770 किमीची रेंज आणि 3.95 सेकंदात 100 चा स्पीड; जिलीची नवी हायब्रिड एसयूव्ही एका तासात 43900 हून जास्त बुक
चीनची कार कंपनी जिलीने आपली नवी प्रीमियम हायब्रिड एसयूव्ही Galaxy Battleship 700 बाजारात आणली आहे. बुकिंग सुरू झाल्यावर अवघ्या एका तासात गाडीला 43900 हून जास्त ऑर्डर्स मिळाल्या आहेत.
छायाचित्रे सत्यापित केलेली नाहीत
ऑटोमोबाईल क्षेत्रात चीनने पुन्हा एकदा नवा पराक्रम केला आहे. चीनची प्रसिद्ध कार कंपनी जिली (Geely) हिने आपली नवी प्रीमियम हायब्रिड एसयूव्ही Galaxy Battleship 700 बाजारात आणली आहे. तिचे फिचर्स आणि लांबलचक ड्रायव्हिंग रेंज यामुळे ही गाडी सध्या जगभर चर्चेत आहे. चीनमध्ये बुकिंग सुरू झाल्यावर अवघ्या एका तासात गाडीला 43900 हून जास्त ऑर्डर्स मिळाल्या आणि ऑटो मार्केटमध्ये एकच खळबळ उडाली आहे.
या एसयूव्हीचे सर्वात मोठे आकर्षण म्हणजे तिची कंबाइंड रेंज. गाडीत 47.14 kWh ची एलएफपी (LFP) बॅटरी आणि ताकदवान पेट्रोल इंजिन अशी उत्तम जोडी आहे. सीएलटीसी (CLTC) मानकानुसार पेट्रोलची टाकी फुल आणि बॅटरी पूर्ण चार्ज असेल, तर ही गाडी एकाच वेळी 1770 किलोमीटरपर्यंतचा मोठा प्रवास करू शकते.
शहरातल्या रोजच्या प्रवासासाठी या गाडीत फक्त इलेक्ट्रिक मोडचाही पर्याय दिला आहे. इलेक्ट्रिक मोडवर गाडी 305 किलोमीटरपर्यंत धावू शकते. त्यामुळे रोज पेट्रोल भरण्याच्या कटकटीतून चालकांची पूर्ण सुटका होते.
आकाराने ही एसयूव्ही मोठी आणि भारी असली, तरी तिचा परफॉर्मन्स स्पोर्ट्स कारलाही मागे टाकणारा आहे. यात जिलीची 'थॉर ईएम-टी' (Thor EM-T) हायब्रिड सिस्टीम वापरली आहे. टर्बो पेट्रोल इंजिन आणि तीन इलेक्ट्रिक मोटार्स असलेली ही ऑल-व्हील ड्राईव्ह (AWD) कार 1113 एचपी पॉवर आणि 1330 एनएम टॉर्क देते. ही अजस्र गाडी अवघ्या 3.95 सेकंदात 0 ते 100 किमी / ताशी वेग गाठू शकते.
ही एसयूव्ही फक्त गुळगुळीत रस्त्यांसाठी नाही, तर खडकाळ आणि अवघड भागासाठीही चांगला पर्याय ठरते. तिला 233 मिमी ग्राऊंड क्लिअरन्स आणि ॲक्टिव्ह हायड्रॉलिक सस्पेंशन दिले आहे, जे गाडीला प्रत्येक रस्त्यावर स्थिर ठेवते. 'क्रॅब वॉक' (Crab Walk) या खास फीचरच्या मदतीने गाडी खेकड्यासारखी तिरकी चालू शकते. तसेच 'वाल्ट्झ टर्न' (Waltz Turn) फिचरमुळे ती फार कमी जागेत, म्हणजे 3.36 मीटरच्या टर्निंग रेडियसमध्ये सहज वळते.
प्रवाशांच्या आरामाची विशेष काळजी घेऊन गाडीचे केबिन अत्यंत आधुनिक पद्धतीने डिझाईन केले आहे. डॅशबोर्डवर एकूण पाच हायटेक स्क्रीन आहेत. लांबच्या प्रवासात थंड पाणी किंवा कोल्ड्रिंक्स ठेवण्यासाठी 18.5 लिटरचा ड्युअल फ्रिज दिला आहे. 2900 मिमी व्हीलबेसमुळे आत बसलेल्या प्रवाशांना भरपूर लेगस्पेस मिळतो.
ही गाडी भारतात कधी येणार, याबद्दल कंपनीने सध्या तरी कोणतीही अधिकृत घोषणा केलेली नाही. त्यामुळे भारतातील कारप्रेमींना या दमदार एसयूव्हीसाठी आणखी काही काळ वाट पाहावी लागणार आहे.
