इंस्टाग्रामवर आता 90 मिनिटांचे व्हिडिओ टाकता येणार, निवडक क्रिएटर्ससाठी चाचणी सुरू

सोशल मीडिया आता आपल्या आयुष्याचा भाग झाला आहे आणि त्यात इंस्टाग्राम मोठी भूमिका बजावतो. आपली कला दाखवण्यासाठी अनेक जण इंस्टावर येतात. इथे आतापर्यंत रील, स्टोरी आणि फोटो टाकले जात होते. आता इंस्टाग्रामने एका नवीन अपडेटची चाचणी सुरू केली आहे, ज्यामुळे फेसबुक आणि यूट्यूबला धक्का बसू शकतो. कंपनी सध्या लांब व्हिडिओंवर काम करत आहे आणि या फीचरमध्ये काही निवडक लोकांना 90 मिनिटांपर्यंतचा मोठा व्हिडिओ टाकता येणार आहे.

याआधी इंस्टाग्रामवर फक्त एक-दोन मिनिटांचेच व्हिडिओ अपलोड करता येत होते. त्यामुळे मोठा व्हिडिओ बघायचा असेल तर लोक फेसबुक किंवा यूट्यूबकडे वळत होते. तेच लोक पुन्हा इंस्टावर खेचायचे, म्हणून आता 90 मिनिटांचा व्हिडिओ अपलोड करता येणार आहे. इंस्टाग्रामचे प्रमुख अॅडम मोसेरी यांनी ही माहिती दिली.

कॉलिन आणि समीर यांच्या पॉडकास्टमध्ये मोसेरी म्हणाले की, ते आधी मोठ्या व्हिडिओंच्या खूप विरोधात होते आणि त्यांना फक्त छोटे व्हिडिओच हवे होते. पण आता काळ बदलत आहे. लोकांना पॉडकास्ट, इंटरव्ह्यू, गप्पा आणि मोठे व्लॉग बघायला आवडतात आणि त्यासाठी ते यूट्यूबवर जातात. इंस्टावरच मोठे व्हिडिओ असतील तर लोक आपल्या ॲपचा जास्त वापर करतील, असे त्यांनी सांगितले.

सध्या हे फीचर निवडक क्रिएटर्सना वापरायला दिले आहे. ते 90 मिनिटांचा आडवा व्हिडिओ अपलोड करू शकतात. हे व्हिडिओ नेहमीच्या फीडमध्ये आणि एक्सप्लोर पेजवर दिसतील. आणखी एक महत्त्वाची गोष्ट म्हणजे क्रिएटर्स आपल्या मोठ्या व्हिडिओची एक छोटी क्लिप रील म्हणून टाकू शकतात. ज्यांना ती रील आवडेल, ते पूर्ण व्हिडिओ इंस्टावरच बघू शकतात. त्यासाठी दुसऱ्या ॲपवर जाण्याची गरज नाही.

इंस्टाग्राम टीव्हीसाठीही नवीन ॲप आणणार आहे. या टीव्ही ॲपवर मोठ्या व्हिडिओंना जास्त महत्त्व दिले जाईल, म्हणजे टीव्हीवर व्हिडिओ बघणाऱ्यांना ते सहज पाहता येतील. हे ॲप सैमसंग टीव्ही, अमेझॉन फायर टीव्ही आणि गूगल टीव्हीवर आणले आहे. काही दिवसांतच ते एप्पल टीव्हीवरही येईल.

याशिवाय इंस्टा आणखी दोन गोष्टी आणणार आहे. पहिली म्हणजे सिरीज. यात क्रिएटर्सना एखादी गोष्ट मालिकेसारखी भाग 1, भाग 2 अशा भागांमध्ये सांगता येईल आणि लोकांना एकामागून एक भाग बघणे सोपे जाईल.

दुसरी गोष्ट म्हणजे सेकंड-स्क्रीन. यात मोबाईल रिमोटसारखा वापरता येईल. मोबाईलवर बघता बघता थांबवलेला व्हिडिओ टीव्हीवर पुढे सुरू करता येईल. व्हिडिओ सेव्ह करून नंतर टीव्हीवरही बघता येईल. तसेच बॅकग्राउंड प्लेबॅक येणार आहे, म्हणजे इंस्टा बंद केले तरी व्हिडिओचा आवाज चालू राहील. पॉडकास्ट ऐकणाऱ्यांसाठी हे उपयोगी आहे. मात्र हे फीचर अजून आलेले नाही, ते लवकरच येईल, असे मोसेरी म्हणाले.

क्रिएटर्सना यातून पैसे मिळणार का, हा सर्वात महत्त्वाचा प्रश्न आहे. यूट्यूबवर मोठ्या व्हिडिओंना पैसे मिळतात, पण इंस्टावर अजून तशी कोणतीही योजना नाही. छोट्या किंवा मोठ्या व्हिडिओंसाठी पैसे वाटण्याचा प्लॅन सध्या तरी इंस्टाकडे नाही. पुढे जाऊन यात बदल होऊ शकतो, असे कंपनी म्हणत आहे.