नागपूर विमानतळावरून मुंबई, इंदौर, अहमदाबाद, नांदेडसाठी थेट उड्डाणे; 'द ऑरेंज रूट'चे जाळे

नागपूरच्या डॉ. बाबासाहेब आंबेडकर आंतरराष्ट्रीय विमानतळाने 'द ऑरेंज रूट' अभियानांतर्गत आपल्या उड्डाणांचे जाळे समोर ठेवले आहे. मध्य भारतातील व्यापारी, औद्योगिक आणि शेतीशी संबंधित केंद्रांमधील प्रवास सोपा व्हावा, हा यामागचा उद्देश आहे. मुंबई, इंदौर, अहमदाबाद आणि नांदेड या शहरांसाठी नागपुराहून थेट उड्डाणे असल्याचे विमानतळ प्रशासनाने सांगितले आहे.

नागपूरच्या भौगोलिक स्थानाचा फायदा घेत प्रमुख शहरांसाठीच्या थेट उड्डाणांवर भर दिला गेला आहे. त्यामुळे बिझनेस ट्रॅव्हल आणि व्यापारी वाढीला नवी दिशा मिळत असल्याचे सांगण्यात आले.

देशाची आर्थिक आणि कॉर्पोरेट राजधानी असलेल्या मुंबईसाठी एअर इंडिया, एअर इंडिया एक्सप्रेस आणि इंडिगो यांची रोज अनेक थेट उड्डाणे आहेत. त्यामुळे नागपूर आणि विदर्भातील व्यापारी, गुंतवणूकदार आणि आयटी प्रोफेशनल्स यांना कॉर्पोरेट क्षेत्राशी जोडले जाणे सोपे होत आहे.

नागपूर ते इंदौर ही थेट सेवा इंडिगो चालवते. यामुळे दोन मोठी औद्योगिक शहरे एकमेकांशी जोडली जातात. हा मार्ग प्रामुख्याने इंदौर-पीथमपूर औद्योगिक पट्ट्याला जोडतो. तिथे इंदौर एसईजेडच्या एकूण निर्यातीत एकट्या फार्मा क्षेत्राचा वाटा सुमारे 70% आहे. विदर्भातील फार्मास्युटिकल आणि मॅन्युफॅक्चरिंग क्षेत्रासाठी ही थेट उड्डाण मोठी सोय ठरली आहे.

अहमदाबादसाठीही इंडिगोची थेट उड्डाणे सुरू आहेत. अहमदाबाद हे भारतातील पहिले युनेस्को वर्ल्ड हेरिटेज सिटी आहे. हा मार्ग टेक्सटाइल, फार्मास्युटिकल केमिकल्स आणि मोठ्या कमर्शियल मार्केट्समधील व्यापारी देवाणघेवाण मजबूत करत असून व्यापाऱ्यांना मोठी सोय मिळत असल्याचे सांगितले जाते.

नागपूर विमानतळाच्या माहितीनुसार स्टार एअर नागपूर ते नांदेड अशी थेट विमानसेवा चालवते. ही फ्लाइट मराठवाड्यातील अॅग्रो-प्रोसेसिंग, टेक्सटाइल आणि एमएसएमई क्लस्टर्सना थेट नागपूरच्या बाजारपेठेशी जोडते आणि त्यामुळे प्रादेशिक कृषी व्यापाराला मोठे बळ मिळत आहे.

विमानतळ अधिकाऱ्यांच्या मते, शहर आणि उद्योग जवळ आले की आर्थिक संधी वेगाने वाढतात. चांगल्या एअर कनेक्टिव्हिटीमुळे प्रवासाचा वेळ तर कमी होतोच, शिवाय धोरणात्मक आणि व्यावसायिक निर्णयही लवकर घेतले जातात. नागपूर विमानतळ आता केवळ ट्रान्झिट पॉइंट राहिलेला नाही, तर औद्योगिक विकास आणि लॉजिस्टिक्ससाठीचा प्रमुख रनवे झाला आहे. औद्योगिक विकासाला सुलभ कनेक्टिव्हिटीची जोड देऊन तो मजबूत करणे, ही 'द ऑरेंज रूट'ची दृष्टी आहे.

दरम्यान, तांत्रिक देखभाल आणि मेंटेनन्ससाठी एअर इंडिया एक्सप्रेसचे IX 9005 हे विमान बुधवारी रात्री मस्कटहून नागपूर विमानतळावर उतरले. हे विमान बेंगळुरू आणि मस्कट दरम्यान चालते. विमानतळावरील एमआरओ केंद्रात त्याची आवश्यक देखभाल आणि सर्व्हिसिंग केली जात आहे. हे काम एआय इंजिनिअरिंग सर्व्हिसेस लिमिटेड ही सरकारी उपकंपनी पाहत आहे.

याआधी मेंटेनन्ससाठी नागपुरात आलेल्या दुसऱ्या विमानाचे काम पूर्णपणे संपले आहे. देखभाल प्रक्रिया पूर्ण झाल्यानंतर ते बेंगळुरूकडे रवाना होणार आहे.