वर्ल्ड चॅम्पियनशिप ऑफ लेजेंड्स २०२६ च्या अंतिम सामन्यात वेस्ट इंडिज चॅम्पियन्सचा इंग्लंडवर ९ विकेट्सनी विजय

वर्ल्ड चॅम्पियनशिप ऑफ लेजेंड्स (डब्ल्यूसीएल) २०२६ चा अंतिम सामना वेस्ट इंडिज चॅम्पियन्स आणि इंग्लंड चॅम्पियन्स यांच्यात रविवारी, १८ ऑक्टोबर रोजी शारजा क्रिकेट स्टेडियमवर खेळला गेला. या सामन्यात वेस्ट इंडिज चॅम्पियन्सने इंग्लंड चॅम्पियन्सचा ९ विकेट्सनी पराभव केला आणि स्पर्धेची ट्रॉफी पटकावली. कर्णधार ख्रिस गेल यांच्या नेतृत्वाखाली वेस्ट इंडिजने हा विजय मिळवला.

इंग्लंडने आधी फलंदाजी केली. त्यांनी २० षटकांत ७ विकेट्स गमावून १५९ धावा केल्या. संघाकडून मोईन अलीने सर्वाधिक ६० धावा केल्या, तर ओवैस शाहने ३८ धावांची खेळी केली. वेस्ट इंडिजकडून ड्वेन ब्राव्होने ३ विकेट्स घेतल्या.

विजयासाठी वेस्ट इंडिजला १६० धावांची गरज होती. कर्णधार ख्रिस गेल आणि लेंडल सिमन्स यांनी संघाला शानदार सुरुवात करून दिली. गेलने १४ चेंडूंत १ चौकार आणि २ षटकारांसह २१ धावा केल्या. तो बाद झाल्यानंतर सिमन्सने चॅडविक वॉल्टनसोबत भागीदारी केली.

या दोघांनी आक्रमक फलंदाजी करत १७ षटकांत १ विकेट गमावून १६५ धावा केल्या आणि लक्ष्याचा यशस्वीपणे पाठलाग केला. लेंडल सिमन्सने ५३ चेंडूंत ३ षटकार आणि ८ चौकारांसह नाबाद ७७ धावा केल्या. चॅडविक वॉल्टनने ३५ चेंडूंत ३ चौकार आणि ४ षटकारांसह नाबाद ५८ धावा केल्या. वेस्ट इंडिजने ९ विकेट्स राखून सामना जिंकला आणि डब्ल्यूसीएल २०२६ ची ट्रॉफी आपल्या नावावर केली.

वेस्ट इंडिजचा विकेटकीपर-फलंदाज चॅडविक वॉल्टन यांना स्पर्धेतील प्लेअर ऑफ द टूर्नामेंट म्हणून गौरवण्यात आले. त्यांनी सात सामन्यांत १६७.६५ च्या स्ट्राइक रेटने फलंदाजी करत २० चौकार आणि २८ षटकारांसह ३४२ धावा केल्या. सातपैकी चार सामन्यांत त्यांनी अर्धशतक झळकावले. वेस्ट इंडिजला विजेतेपद मिळवून देण्यात त्यांनी महत्त्वाची भूमिका बजावली.

वर्ल्ड चॅम्पियनशिप ऑफ लेजेंड्स ही स्पर्धा गेली तीन वर्षे खेळली जात आहे. पहिला हंगाम २०२४ मध्ये झाला होता, त्यात इंडियन चॅम्पियन्सने अंतिम सामन्यात पाकिस्तानला हरवून ट्रॉफी जिंकली होती. २०२५ च्या दुसऱ्या हंगामात साऊथ आफ्रिकन चॅम्पियन्सने विजेतेपद मिळवले. आता तिसऱ्या हंगामात वेस्ट इंडिज चॅम्पियन्सच्या नावावर ट्रॉफी जमा झाली आहे.