गणेश विसर्जनापूर्वी नागपूर पोलिसांचं ऑपरेशन ऑल आउट, गुन्हेगारांमध्ये खळबळ, एनडीपीएस आणि जुगाराचे अनेक गुन्हे
नागपूर शहरात गणेश विसर्जनाच्या पार्श्वभूमीवर पोलिसांनी रात्रभर विशेष तपासणी मोहीम राबवत गुन्हेगारांवर आणि वाहनचालकांवर कारवाई केली.
नागपूर जिल्ह्यात गणेश विसर्जनाच्या पार्श्वभूमीवर शहरातील कायदा-सुव्यवस्था कायम राहावी आणि असामाजिक तत्वांच्या हालचालींवर प्रभावी अंकुश राहावा यासाठी नागपूर पोलिसांनी बुधवारी रात्री उशिरापासून गुरुवारी पहाटेपर्यंत 'ऑपरेशन ऑल आउट' ही विशेष मोहीम शहरभर राबवली.
पोलीस आयुक्त विश्वास नांगरे पाटील यांच्या आदेशानुसार आणि मार्गदर्शनाखाली रात्री ११ ते पहाटे २ या वेळेत नागपूर शहरातील सर्व पोलीस स्टेशनच्या हद्दीत ही मोहीम राबवण्यात आली. या मोहिमेदरम्यान पोलिसांच्या वेगवेगळ्या टीमनी शहरभर कॉम्बिंग ऑपरेशन राबवलं. या कॉम्बिंग ऑपरेशनमध्ये पोलिसांनी जेलमधून सुटलेले आरोपी, तडीपार गुन्हेगार, वेगवेगळ्या गुन्ह्यांत नाव असलेले आरोपी, एमपीडीए कायद्याखाली सुटलेले आरोपी, जेल आणि मोका कायद्याखाली सुटलेले आरोपी तसेच बेकायदेशीर हत्यारं बाळगणाऱ्या लोकांच्या हालचालींची तपासणी केली.
याशिवाय फरार आणि वॉन्टेड आरोपींसोबतच जामिनाच्या अटींचं उल्लंघन करणारे लोक, सवयीचे गुन्हेगार आणि हिस्ट्रीशीटर यांच्यावरही या मोहिमेदरम्यान कायदेशीर कारवाई करण्यात आली.
या ऑपरेशन ऑल आउट मोहिमेदरम्यान नागपूर पोलिसांनी एनडीपीएस कायद्याखाली एकूण १० गुन्हे दाखल केले. तर जुगार कायद्याखाली कारवाई करत २७ गुन्हे नोंदवण्यात आले आणि त्या अंतर्गत ४ लाख ७६ हजार १०० रुपयांचा मुद्देमाल जप्त करण्यात आला. याशिवाय पोक्सो कायद्याखालीही कारवाई करण्यात आली.
या मोहिमेदरम्यान पोलिसांनी एकूण ८४ आरोपींची यादी आधीच तयार करून ठेवली होती. त्यापैकी ३९ आरोपींची पोलिसांनी चौकशी केली आणि या ३९ पैकी एकूण १९ आरोपींवर पुढे कारवाई करण्यात आली.
विशेष मोहिमेदरम्यान पोलिसांनी रस्त्यावरील एकूण १,२३७ वाहनांची तपासणी केली. यामध्ये ८४६ दुचाकी आणि ३९१ चारचाकी वाहनांचा समावेश होता. या तपासणीत पोलिसांनी एकूण १४ वाहनचालकांवर दारू पिऊन गाडी चालवल्याप्रकरणी, म्हणजे ड्रिंक अँड ड्राइव्हच्या आरोपाखाली कारवाई केली. तसेच मोटार वाहन कायद्याखाली आणखी १०६ वाहनचालकांवर स्वतंत्र कारवाई करण्यात आली.
नागपूर पोलिसांनी शहरातील नागरिकांना आवाहन केलं आहे की, विसर्जन सणादरम्यान शांतता आणि सुरक्षा राखण्यासाठी त्यांनी पोलिसांना सहकार्य करावं आणि कोणतीही संशयास्पद हालचाल आढळल्यास ती तात्काळ पोलीस कंट्रोल रूमला कळवावी. सण-उत्सवाच्या काळात शहरात शांतता भंग करण्याचा किंवा कायदा-सुव्यवस्थेचं उल्लंघन करण्याचा प्रयत्न करणाऱ्या असामाजिक तत्वांवर यापुढेही अशीच कडक आणि तत्पर कारवाई सुरू राहील, असं पोलीस प्रशासनाने स्पष्ट केलं आहे.
ही बातमी प्रकाशित झाली आहे पण थेट मालिका सुरू झालेली नाही. डेस्कने अपडेट दाखल करताच तो इथे दिसेल.
