मैत्रिणीवरून झालेल्या वादातून मित्रावर वार; खुनाच्या प्रयत्नाबद्दल किरण थोरातला दहा वर्ष सक्तमजुरी

राज्यासह देशभरात गुन्हेगारी वाढली असून, त्यामुळे नागरिकांमध्ये दहशत निर्माण होत आहे. गुन्हेगारी रोखण्यासाठी पोलिसांकडूनही प्रयत्न सुरू आहेत. अशातच पुण्यातील सत्र न्यायालयाने मित्राचा खून करण्याचा प्रयत्न करणाऱ्या तरुणाला दहा वर्ष सक्तमजुरी आणि पन्नास हजार रुपये दंडाची शिक्षा सुनावली आहे. जिल्हा व अतिरिक्त सत्र न्यायाधीश के. डी. शिरभाते यांनी समोर आलेल्या पुराव्यांच्या आधारे आरोपीला दोषी ठरवले.

शिक्षा झालेल्या आरोपीचे नाव किरण शिवाजी थोरात (वय २८, रा. भोसरी) असे आहे. त्याच्यावर अभिषेक कांबळे याच्या खुनाचा प्रयत्न केल्याचा आरोप ठेवण्यात आला होता. ही घटना १ जानेवारी २०२१ रोजी भोसरीत घडली होती.

घटनेच्या एक महिना आधीच किरण आणि अभिषेक यांची ओळख एका मैत्रिणीमुळे झाली होती. त्याच मैत्रिणीबद्दल दोघांमध्ये वाद झाला आणि त्याचा राग किरणने मनात धरला होता. त्यातून त्याने अभिषेकला फोन करून बोलावून घेतले.

दोघे भोसरीतील टेल्को रोडवरून दुचाकीवर जात होते. त्या वेळी किरणने गाडी थांबवायला लावली. गाडी थांबताच त्याने अभिषेकचे डोके पकडले आणि त्याच्या मानेवर धारदार शस्त्राने वार केला. जवळपासचे लोक येताच किरण तिथून पळून गेला. या घटनेमुळे परिसरात मोठी खळबळ उडाली होती.

एका रिक्षाचालकाने अभिषेकला लगेच रुग्णालयात नेले, त्यामुळे त्याचा जीव वाचला. अभिषेकला वेळेवर वैद्यकीय उपचार मिळाले नसते, तर त्याचा मृत्यू झाला असता, अशी साक्ष डॉक्टरांनी दिली आणि ती या खटल्यात महत्त्वाची ठरली.

या खटल्यात सरकार पक्षाच्या वतीने प्रेमकुमार अगरवाल यांनी बाजू मांडली. आरोपी स्वतःसोबत धारदार शस्त्र घेऊन आला होता, यावरून त्याने मारण्याची पूर्ण तयारी केली होती, असे सरकार पक्षाने सांगितले. गळ्यासारख्या नाजूक भागावर वार केल्यामुळे अभिषेकचा खून करणे हाच त्याचा हेतू होता, हा सरकार पक्षाचा दावा न्यायालयाने मान्य केला.

बचाव पक्षाकडून आरोपीचे नुकतेच लग्न झाले असून त्याची पत्नी गरोदर आहे, म्हणून शिक्षा कमी करावी, अशी विनंती करण्यात आली. मात्र गुन्ह्याचे स्वरूप गंभीर असल्याने न्यायालयाने ही विनंती मान्य केली नाही आणि दहा वर्ष सक्तमजुरी व पन्नास हजार रुपये दंडाची शिक्षा दिली.