डोंबिवलीतील सावित्रीबाई फुले नाट्यगृहासाठी आणखी ३० कोटी मंजूर, एकूण तरतूद ४५ कोटी

डोंबिवलीतील सावित्रीबाई फुले नाट्यगृहाच्या पुनर्विकासाला आता आर्थिक बळ मिळाले आहे. राज्य शासनाच्या नगरविकास विभागाने नाट्यगृहाच्या उर्वरित कामांसाठी ३० कोटी रुपयांचा निधी मंजूर केला आहे. यापूर्वी १५ कोटी रुपये मंजूर झाले होते. त्यात या ३० कोटींची भर पडल्याने प्रकल्पासाठी एकूण ४५ कोटी रुपयांची तरतूद झाली आहे.

नगरविकास विभागाने ४ नोव्हेंबर रोजी यासंदर्भातील शासन निर्णय जारी केला. उपमुख्यमंत्री तथा नगरविकास मंत्री एकनाथ शिंदे यांच्या आदेशानुसार हा निर्णय काढण्यात आला. 'महानगरपालिका क्षेत्रात मूलभूत सोयीसुविधांच्या विकासासाठी विशेष तरतूद' या योजनेअंतर्गत हा निधी मंजूर झाला आहे. प्रकल्पाचा संपूर्ण १०० टक्के खर्च राज्य शासन करणार आहे. अंमलबजावणीची जबाबदारी कल्याण-डोंबिवली महानगरपालिकेकडे सोपवण्यात आली आहे.

कल्याण लोकसभा मतदारसंघाचे खासदार डॉ. श्रीकांत एकनाथ शिंदे यांनी या पुनर्विकासासाठी पाठपुरावा केला होता. प्रकल्पाला आवश्यक निधी मिळावा आणि पैशांअभावी कामे रखडू नयेत, अशी मागणी त्यांनी राज्य शासनाकडे सातत्याने केली होती. त्यांच्या पाठपुराव्यानंतर आता उर्वरित कामांसाठी ३० कोटींना मंजुरी मिळाली आहे.

सावित्रीबाई फुले नाट्यगृहाचा डोंबिवलीला सांस्कृतिक नगरी म्हणून ओळख मिळवून देण्यात मोठा वाटा आहे. अनेक वर्षे येथे नाट्यप्रयोग, संगीत मैफली, साहित्यिक कार्यक्रम आणि विविध सांस्कृतिक सोहळे रंगत होते. स्थानिक कलाकारांपासून नामवंत कलावंतांपर्यंत अनेकांसाठी हे हक्काचे व्यासपीठ होते. मात्र इमारत जीर्ण झाल्याने नाट्यगृह बंद करावे लागले. त्यामुळे नाट्यसंस्था, कलाकार आणि नाट्यरसिकांची मोठी गैरसोय झाली. डोंबिवलीच्या सांस्कृतिक परंपरेला साजेसे नाट्यगृह पुन्हा उभे राहावे, अशी मागणी सातत्याने होत होती.

पुनर्विकसित नाट्यगृहात आधुनिक सुविधा असतील. नाट्यप्रयोगांसाठी भव्य आणि आधुनिक रंगमंच, प्रेक्षकांसाठी उत्तम आसनव्यवस्था, आधुनिक प्रकाशयोजना आणि आकर्षक अंतर्गत सजावट असेल. छोटेखानी नाट्यप्रयोगांसाठी स्वतंत्र ड्रामा थिएटर, कलाकारांच्या सरावासाठी स्वतंत्र सराव कक्ष आणि चित्रकला व इतर कलाप्रदर्शनांसाठी स्वतंत्र आर्ट गॅलरी उभारली जाणार आहे. नाट्यगृहाच्या बाह्य परिसराचा आणि अंतर्गत भागाचाही विकास केला जाईल.

या सुविधांमुळे हे नाट्यगृह केवळ नाट्यप्रयोगांचे सभागृह न राहता डोंबिवलीतील सर्वसमावेशक सांस्कृतिक केंद्र म्हणून विकसित होणार आहे. निधी मंजूर झाल्याने कामांना गती मिळण्याची अपेक्षा आहे. डोंबिवलीतील नाट्यसंस्था, हौशी कलाकार आणि सांस्कृतिक क्षेत्रातील संस्थांना पुन्हा हक्काचे व्यासपीठ मिळू शकेल, त्यामुळे स्थानिक कलाकारांना मोठा दिलासा मिळेल. उर्वरित कामे पूर्ण होऊन नाट्यगृह प्रत्यक्षात सुरू होण्याची प्रतीक्षा आता डोंबिवलीकरांना आहे.