अभिनेत्री दिव्या विनेकर यांचे ४० व्या वर्षी निधन, मुंबईत अंत्यसंस्कार

अभिनेत्री दिव्या विनेकर यांचे ४० व्या वर्षी निधन झाले आहे. मनोरंजनविश्वातून ही दुःखद बातमी समोर आली आहे. आलिया भट्ट आणि शेफाली शाह यांच्या 'डार्लिंग्स' या चित्रपटात त्यांनी महिला कॉन्स्टेबलची भूमिका केली होती आणि त्यामुळे त्या प्रेक्षकांच्या ओळखीच्या झाल्या होत्या. मंगळवारी त्यांचे निधन झाल्याची माहिती समोर आली. बुधवारी मुंबईत त्यांच्यावर अंत्यसंस्कार करण्यात आले. त्यांच्या जाण्याने मनोरंजनविश्वात हळहळ व्यक्त केली जात आहे.

दिव्या यांच्या निधनाची बातमी त्यांची मैत्रीण आणि रेडिओ जॉकी रोहिणी रामनाथन यांनी दिली. रोहिणी यांनी इन्स्टाग्रामवर भावूक पोस्ट शेअर करून ही माहिती सगळ्यांना कळवली. दिव्या फक्त आपल्यासाठीच नाही, तर रेडिओ क्षेत्रात आपल्यासोबत काम करणाऱ्या अनेकांसाठी खास व्यक्ती होत्या, अशा भावना रोहिणी यांनी व्यक्त केल्या. दिव्या यांच्या कुटुंबीयांच्या गोपनीयतेचा आदर करावा आणि या कठीण प्रसंगातून सावरण्यासाठी त्यांना वेळ द्यावा, असे आवाहनही त्यांनी केले आहे.

आरजे रोहिणी रामनाथन यांनी पोस्टमध्ये लिहिले आहे, "अत्यंत दुःख आणि धक्क्याने मी तुम्हा सर्वांना कळवत आहे की, आपल्या डीव्हीचे आज निधन झाले आहे. हे सर्व खूप अचानक आणि अनपेक्षित होते. तिचे कुटुंब आणि तिच्या प्रेमाने व आपुलकीने ज्यांच्या आयुष्याला स्पर्श केला ते सर्वजण सध्या तीव्र दुःखातून जात आहेत. कृपया या वेळी कोणतेही प्रश्न विचारू नका."

दिव्या यांच्या निधनाचे नेमके कारण अजून समोर आलेले नाही. त्यांच्या अचानक जाण्याने कुटुंबीय, मित्रपरिवार आणि चाहत्यांना मोठा धक्का बसला आहे.

दिव्या यांनी २०२२ मध्ये प्रदर्शित झालेल्या नेटफ्लिक्सच्या 'डार्लिंग्स' या चित्रपटात महिला कॉन्स्टेबलची भूमिका केली होती. त्या चित्रपटात आलिया भट्ट आणि शेफाली शाह यांच्या प्रमुख भूमिका होत्या. याशिवाय विद्या बालन आणि शेफाली शाह यांच्या 'जलसा' या चित्रपटातही दिव्या दिसल्या होत्या.

चित्रपटांबरोबरच दिव्या यांनी रेडिओ आणि डिजिटल कंटेंटच्या क्षेत्रातही काम केले होते. त्या डिजिटल कंटेंट क्रिएटर, फ्रीलान्स कंटेंट रायटर आणि कवयित्री म्हणूनही काम करत होत्या. अभिनय, रेडिओ, लेखन आणि डिजिटल कंटेंट अशा वेगवेगळ्या माध्यमांत काम करून त्यांनी स्वतःची वेगळी ओळख तयार केली होती.

निधनानंतर त्यांच्या मैत्रिणी आणि सहकारी त्यांच्या आठवणींना उजाळा देत आहेत. रोहिणी रामनाथन यांनीही आपल्या पोस्टमधून दिव्या यांच्याबद्दलच्या भावना व्यक्त केल्या. अशा विविध क्षेत्रांत काम करणाऱ्या दिव्या यांच्या जाण्याने मनोरंजनविश्वात शोक व्यक्त केला जात असून जवळच्या व्यक्तींना मोठी पोकळी जाणवत आहे.