मल्याळम दिग्दर्शक बेलराज कलारिकल यांचे २८व्या वर्षी कोचीत निधन

मल्याळम चित्रपटसृष्टीतील तरुण दिग्दर्शक बेलराज कलारिकल यांचे वयाच्या अवघ्या २८व्या वर्षी निधन झाले आहे. १७ ऑक्टोबर रोजी कोची येथील एका हॉटेलच्या खोलीत ते मृतावस्थेत आढळले. त्यांच्या अचानक जाण्याने मल्याळम चित्रपटसृष्टीत शोककळा पसरली आहे. नुकतीच प्रदर्शित झालेली 'कॉफी स्क्वॉड' ही वेब सीरिज त्यांच्या दिग्दर्शनातील पहिलीच कलाकृती होती.

बेलराज हे केरळमधील कोट्टायम जिल्ह्यातील मणिमाला येथील रहिवासी होते. कोचीतील हॉटेलमध्ये ते मालिकेचे दिग्दर्शक श्रीकांत यांच्यासोबत राहत होते. अनेकदा बेल वाजवूनही बेलराज यांनी दरवाजा उघडला नाही, तेव्हा त्यांचा मृत्यू झाल्याचे लक्षात आले. प्राथमिक माहितीनुसार हृदयविकाराचा झटका हे मृत्यूचे कारण असल्याचे सांगितले जात आहे. पोलीस या प्रकरणाचा तपास करत असून, शवविच्छेदनानंतर मृतदेह नातेवाईकांच्या ताब्यात देण्यात येणार असल्याचे पोलिसांनी सांगितले.

'कॉफी स्क्वॉड' ही वेब सीरिज १५ ऑक्टोबर रोजी जिओ हॉटस्टारवर प्रदर्शित झाली होती. त्याचे चार भाग प्रेक्षकांसमोर आले होते, तर एकूण ३६ भागांचे चित्रीकरण पूर्ण झाले होते. दिग्दर्शनात नुकतीच सुरुवात केलेल्या बेलराज यांच्यासाठी हा महत्त्वाचा टप्पा होता, पण त्यांच्या निधनाच्या बातमीने या आनंदावर दुःखाचे सावट पसरले आहे.

जिओ हॉटस्टारने आपल्या अधिकृत इन्स्टाग्राम अकाउंटवरून त्यांना श्रद्धांजली वाहिली. "काही निरोप खूप लवकर येतात. बेलराज कलारिकल, तुमच्या आत्म्यास शांती लाभो," अशा शब्दांत प्लॅटफॉर्मने भावना व्यक्त केल्या.

चित्रपट निर्माते आणि अभिनेते राहुल रिजी नायर यांनीही दुःख व्यक्त केले. त्यांनी बेलराज यांचा उल्लेख दूरदृष्टी असलेला चित्रपट निर्माता, जवळचा मित्र आणि सर्जनशील सहकारी असा केला. आपल्या पोस्टमध्ये राहुल यांनी लिहिले की, 'कापी स्क्वॉड'चे दिग्दर्शक बेलराज कलारिकल यांच्या निधनाची बातमी अत्यंत दुःखद आहे. फर्स्ट प्रिंट स्टुडिओच्या संस्थापक सदस्यांपैकी एक असलेल्या बेलराज यांनी आपल्या कामातून प्रॉडक्शन हाऊसची ओळख घडवण्यात महत्त्वाची भूमिका बजावली. चित्रपट निर्मितीप्रती त्यांची निष्ठा, समर्पण आणि उत्साह यांचा सहकाऱ्यांवर मोठा प्रभाव होता. बेलराज यांच्याशिवाय फर्स्ट प्रिंट स्टुडिओ अपूर्ण राहील, अशी भावनिक प्रतिक्रियाही राहुल यांनी दिली. कुटुंबीय आणि मित्रांच्या दुःखात सहभागी असल्याचे सांगत त्यांनी श्रद्धांजली वाहिली.

दिग्दर्शक म्हणून ओळख मिळण्यापूर्वी बेलराज यांनी मल्याळम चित्रपटसृष्टीत सहाय्यक म्हणून काम केले होते. 'निझाल', 'मधुरम' आणि 'डाकिनी' यांसारख्या चित्रपटांमध्ये त्यांनी योगदान दिले. तसेच 'डाकिनी', 'कीडम' आणि 'खो खो' यांसारख्या प्रकल्पांमध्ये त्यांनी राहुल रिजी नायर यांना सहाय्य केले होते. फर्स्ट प्रिंट स्टुडिओच्या पुरस्कारप्राप्त 'ओट्टामुरी वेलिचम' आणि 'केरळा क्राईम फाईल्स' यांसारख्या प्रकल्पांशीही त्यांचा संबंध राहिला आहे.

बेलराज यांच्या वैयक्तिक आयुष्यातही नुकतीच नव्या पर्वाची सुरुवात झाली होती. सहा वर्षांच्या प्रेमसंबंधानंतर त्यांनी ११ सप्टेंबर २०२६ रोजी अथीरा बिंदू साबू यांच्याशी विवाह केला होता. लग्नाला अवघा एक महिना होत असतानाच त्यांच्या निधनाची बातमी आली, त्यामुळे पत्नी आणि कुटुंबीयांवर दुःखाचा डोंगर कोसळला आहे. त्यांच्या अकाली निधनाने मल्याळम चित्रपटसृष्टीने एक होतकरू कलाकार गमावला असून, मित्र, सहकारी आणि चाहत्यांकडून हळहळ व्यक्त होत आहे.