नवरात्रीत चिन्मयी मोरेने मांडली स्त्रीशक्तीची कल्पना; यशामागे आईचा वाटा सांगताना भावुक

नवरात्रीचा सण म्हणजे शक्ती, धैर्य आणि स्त्रीत्वाचा उत्सव, असं म्हटलं जातं. या नऊ दिवसांत देवीच्या वेगवेगळ्या रूपांची पूजा होते. पण देवीची शक्ती फक्त मंदिरातल्या मूर्तीपुरती नसते, ती आपल्या आजूबाजूच्या प्रत्येक स्त्रीमध्येही असते. याच स्त्रीशक्तीविषयी झी मराठीवरील 'धाकट्या सुनबाई' या मालिकेत राधिकाची प्रमुख भूमिका साकारणारी अभिनेत्री चिन्मयी मोरे हिने आपले विचार मांडले. यावेळी आपल्या यशामागे आईचा किती मोठा वाटा आहे, हेही तिने भावनिक शब्दांत सांगितलं.

चिन्मयी म्हणाली की, शक्ती केवळ देवीच्या मूर्तीत नसते, ती प्रत्येक स्त्रीच्या मनात, विचारांत आणि कर्तृत्वातही असते. स्त्री आयुष्यात मुलगी, पत्नी, आई, बहीण अशा अनेक भूमिका समर्थपणे निभावत असते. परिस्थिती कितीही कठीण असली, तरी स्वतःला आणि कुटुंबाला पुढे नेण्याची ताकद म्हणजेच खरी स्त्रीशक्ती, असं तिला वाटतं.

आजच्या काळात प्रत्येक स्त्रीने आधी स्वतःवरचा विश्वास जपायला हवा, असं चिन्मयीने सांगितलं. स्वप्नांना पंख देणारा आत्मविश्वास, निर्णयांना बळ देणारा आत्मसन्मान आणि संकटांचा सामना करण्याचं धैर्य हीच स्त्रीची खरी ताकद आहे, असं ती म्हणाली. इतरांच्या सावलीत उभं राहण्यापेक्षा प्रत्येक स्त्रीने स्वतःच्या कर्तृत्वातून आपली वेगळी ओळख निर्माण करावी, असा संदेशही तिने दिला.

मनात एखादं स्वप्न असेल, तर ते फक्त मनातच ठेवू नका. त्याला ध्येय बनवा आणि ते पूर्ण करण्यासाठी जिद्दीने पुढे चला, असं आवाहन चिन्मयीने मुली आणि महिलांना केलं. तिच्या मते, स्वतःवर विश्वास ठेवणं ही आपल्यातील देवीशक्तीची पहिली पायरी आहे.

स्वतःच्या प्रवासाविषयी बोलताना ती म्हणाली की, स्वप्न पाहण्यापासून आज पडद्यावर प्रमुख भूमिका साकारण्यापर्यंतचा तिचा प्रवास मेहनत, विश्वास आणि अनेक छोट्या-छोट्या प्रयत्नांतून घडला आहे. अपयश आलं तरी थांबू नये आणि यश मिळालं तरी जमिनीशी जोडलेलं राहावं, असंही तिने सांगितलं.

या प्रवासात तिच्या आईचा मोठा वाटा आहे. लहानपणापासून आईनेच तिला वाढवलं आणि प्रत्येक सुख-दुःखात खंबीरपणे साथ दिली. आईने चिन्मयीच्या स्वप्नांना स्वतःच्या स्वप्नांसारखं जपलं. त्यामुळे आज ती जिथे आहे, तिथे पोहोचण्यामागे आईची जिद्द, त्याग आणि संस्कार आहेत, अशी भावना तिने व्यक्त केली.

आईने तिला घडवताना अनेकदा स्वतःच्या इच्छा बाजूला ठेवल्या, पण तिच्या स्वप्नांसाठी कधीही कमतरता भासू दिली नाही. म्हणूनच आपल्या यशाकडे पाहताना आईच्या संघर्षाची जाणीव अधिक तीव्रतेने होते, असं चिन्मयीने सांगितलं. भावना व्यक्त करताना ती म्हणाली, "माझ्या यशाच्या प्रकाशामागे आईने जपलेली एक छोटीशी ज्योत आहे!"

स्वतःच्या स्वप्नांसाठी संघर्ष करणारी स्त्री असो किंवा मुलांच्या भविष्यासाठी स्वतःच्या इच्छा बाजूला ठेवणारी आई, प्रत्येक स्त्रीमध्ये एक वेगळी शक्ती असते, असं चिन्मयीच्या विचारांतून दिसतं. नवरात्रीच्या या पवित्र पर्वावर देवीच्या शक्तीला वंदन करतानाच, आपल्या आयुष्यात प्रेम, धैर्य आणि जिद्दीने प्रकाश फुलवणाऱ्या प्रत्येक स्त्रीलाही सलाम करावा, असा संदेश तिने दिला आहे.