चंद्रपूर जिल्ह्यात मिरवणुकांत लेझर, डीजेवर ३० ऑक्टोबरपर्यंत बंदी

चंद्रपूर जिल्ह्यात येणाऱ्या सणासुदीच्या काळात कायदा, सुव्यवस्था आणि सार्वजनिक शांतता टिकवण्यासाठी पोलीस प्रशासनाने विशेष निर्बंध लागू केले आहेत. गणपती, नवरात्र, दांडिया, दसरा आणि धम्मचक्र प्रवर्तन दिन यांच्या पार्श्वभूमीवर हे आदेश काढण्यात आले आहेत.

चंद्रपूरचे पोलीस अधीक्षक आयुष नोपानी यांनी महाराष्ट्र पोलीस अधिनियम, १९५१ च्या कलम ३६ आणि कलम ३८(१) अन्वये हे निर्बंध व मनाई आदेश जारी केले आहेत. गणपतीची स्थापना व विसर्जन, नवरात्र उत्सव, दांडिया, दसरा आणि धम्मचक्र प्रवर्तन दिनानिमित्त निघणाऱ्या मिरवणुका व कार्यक्रमांत नागरिकांचे आरोग्य सुरक्षित राहावे, हा यामागचा हेतू आहे.

हे आदेश २९ सप्टेंबर २०२६ च्या मध्यरात्री १२.०० वाजेपासून ३० ऑक्टोबर २०२६ च्या रात्री १२.०० वाजेपर्यंत संपूर्ण जिल्ह्यात लागू राहणार आहेत.

मिरवणुकीत लेझर लाईट, तीव्र तीव्रतेचे फ्लॅश लाईट आणि माणसाच्या डोळ्यांवर व आरोग्यावर वाईट परिणाम करणाऱ्या सर्व प्रकारच्या प्रकाश यंत्रणांवर पूर्ण बंदी घालण्यात आली आहे. पोलीस अधिकारी किंवा सक्षम प्राधिकारी मिरवणुकीतील लाईट उपकरणांची प्रत्यक्ष पाहणी व तपासणी करू शकतील. ही उपकरणे धोकादायक आढळली, तर ती तात्काळ बंद करण्याचे निर्देश दिले जातील.

आवाजाबाबतही कडक नियमावली आहे. सक्षम प्राधिकाऱ्यांच्या पूर्वपरवानगीशिवाय कोणत्याही सार्वजनिक ठिकाणी ध्वनिक्षेपक किंवा अँप्लीफायर वापरता येणार नाही. अत्यंत तीव्र व हानीकारक आवाज करणारे डी.जे., प्लाझ्मा सिस्टीम, मॉडीफाईड साउंड इक्विपमेंट, वुफर आणि सबवुफर यांच्यावर पूर्ण बंदी आहे.

नागरिकांच्या आरोग्याचा विचार करून परिसरानुसार आवाजाची डेसिबल मर्यादा ठरवण्यात आली आहे. औद्योगिक क्षेत्रात दिवसा ७५ डेसिबल आणि रात्री ७० डेसिबल, व्यावसायिक क्षेत्रात दिवसा ६५ डेसिबल आणि रात्री ५५ डेसिबल, तर निवासी क्षेत्रात दिवसा ५५ डेसिबल आणि रात्री ४५ डेसिबल अशी मर्यादा आहे. रुग्णालय, शैक्षणिक संस्था आणि न्यायालये यांसारख्या सायलंस झोनमध्ये, म्हणजेच शांतता क्षेत्रात, दिवसा ५० डेसिबल आणि रात्री ४० डेसिबल ही मर्यादा असून तिचे काटेकोर पालन करणे बंधनकारक राहील.

जिल्हा दंडाधिकाऱ्यांनी सूट दिलेले दिवस आणि वेळ वगळता इतर दिवशी रात्री १०.०० ते सकाळी ६.०० वाजेपर्यंत ध्वनिक्षेपक व डी.जे. वापरण्यास पूर्णपणे बंदी असेल.

नियम मोडणाऱ्यांवर पोलीस कठोर कायदेशीर कारवाई करणार आहेत. महाराष्ट्र पोलीस अधिनियम, १९५१ च्या कलम ७० अन्वये संबंधित ध्वनी व प्रकाश यंत्रणा किंवा उपकरणे जप्त केली जातील. उत्सव आयोजक, डी.जे. ऑपरेटर किंवा वाहन चालक यांना कलम ७२(२) अन्वये वारंटशिवाय अटक होऊ शकते, तसेच कलम १३४ व १३६ अन्वये त्यांच्यावर न्यायालयात खटला दाखल केला जाईल.

सर्व सण शांततेत, सुरक्षितपणे आणि उत्साहात साजरे व्हावेत, यासाठी नागरिक, उत्सव मंडळे आणि आयोजकांनी पोलीस प्रशासनाला पूर्ण सहकार्य करावे, असे आवाहन चंद्रपूर पोलीस प्रशासनाने केले आहे.