पोंभूर्णात विसर्जन मिरवणुकीत रस्ता अडवल्याचा आरोप, २१ जणांवर गुन्हा दाखल

पोंभूर्णा (चंद्रपूर) : गणपती विसर्जन मिरवणुकीदरम्यान बस स्थानक चौकातील रस्ता अडवल्याच्या आरोपावरून पोंभूर्णा पोलिसांनी गुन्हा दाखल केला आहे. पोलिसांच्या तक्रारीनुसार या मिरवणुकीला प्रशासनाची परवानगी नव्हती. तेली मोहल्ला येथील विघ्नहर्ता गणेश मंडळाच्या २१ नामजद कार्यकर्त्यांसह इतर ८ ते १० महिला व पुरुषांवर गुन्हा नोंदवण्यात आला आहे.

पोलिसांच्या माहितीनुसार हा प्रकार २८ सप्टेंबरच्या रात्री घडला. हनुमान चौक, तेली मोहल्ला येथील या मंडळाचे पदाधिकारी व कार्यकर्ते दारू पिऊन मिरवणूक काढत होते, असा आरोप आहे. मिरवणूक पुढे नेण्यासाठी पोलीस आणि प्रशासनाकडून वारंवार सूचना देण्यात आल्या, पण कार्यकर्त्यांनी त्या ऐकल्या नाहीत, असेही म्हटले आहे.

आरोपानुसार, या कार्यकर्त्यांनी बेकायदेशीर जमाव जमवला. त्यांनी ट्रॅक्टर (क्र. MH 34 BR 0939) आणि इतर वाहने बस स्थानक चौकातील मुख्य रस्त्यावर उभी करून रस्ता पूर्णपणे अडवला. इतर सहकाऱ्यांना रस्त्यावर बसायला चिथावणी दिली आणि मागे असलेल्या शास्त्री नगर येथील सूर्यदेव गणेश मंडळाच्या विसर्जन मिरवणुकीला पुढे जाऊ दिले नाही, असाही आरोप आहे.

पोलीस व प्रशासनाने परिस्थिती हाताळण्याचा प्रयत्न केला, तेव्हा 'आम्हाला रात्री ११ वाजेपर्यंत परवानगी आहे, तुम्ही आम्हाला पुढे जाण्यास का सांगता?' असा सवाल करत मंडळाच्या कार्यकर्त्यांनी हुज्जत घातली. त्याच दरम्यान नाचण्याच्या कारणावरून कार्यकर्त्यांमध्येच आपापसात वाद सुरू झाला. तो सोडवण्यासाठी पोलिसांनी मध्यस्थी केली असता, संतप्त कार्यकर्त्यांनी कर्तव्यावर असलेल्या पोलीस कर्मचाऱ्यांना धक्काबुक्की केल्याचा आरोप आहे.

परिस्थिती चिघळत असल्याचे पाहून सहाय्यक पोलीस निरीक्षक व पोलीस कर्मचाऱ्यांनी समजूत घालण्याचा प्रयत्न केला. तरीही कार्यकर्त्यांनी वाहने रस्त्यावरच उभी ठेवून रस्ता रोखून धरला. एका महिला अंमलदाराने मध्यस्थी करून समजावले असता, अलका नैताम नावाच्या महिलेने तिच्याशी झटापट करून मारहाण केली आणि उपस्थित लोकांना रस्त्यावर बसण्यासाठी चिथावणी दिली, असा आरोप आहे.

घटनेचे गांभीर्य ओळखून पोंभूर्णाचे तहसीलदार, मुख्याधिकारी आणि मूलचे उपविभागीय पोलीस अधिकारी स्वतः घटनास्थळी गेले आणि आंदोलक व कार्यकर्त्यांची समजूत काढण्याचा प्रयत्न केला. तरीही मंडळाचे पदाधिकारी व कार्यकर्ते रस्त्यावर ठिय्या मांडून बसले आणि 'बडतर्फ करा, निलंबित करा' अशा घोषणा देत पोलिसांवर जोरदार आरडाओरड करत राहिले. २८ सप्टेंबरला रात्री ८:१५ पासून २९ सप्टेंबरला पहाटे १:३० वाजेपर्यंत हा गोंधळ सुरू होता.

शासकीय आदेशाचे उल्लंघन करून बेकायदेशीर जमाव जमवणे, वाद घालणे, चिथावणी देणे, मुख्य रस्ता अडवणे आणि पोलिसांच्या कामात अडथळा आणणे याप्रकरणी पोलीस अंमलदार मंगेश कनिराम श्रीरामे यांच्या तक्रारीवरून पोंभूर्णा पोलीस ठाण्यात गुन्हा नोंदवण्यात आला आहे.

बालाजी वसंत भांडेकर, कपिल लक्ष्मण बावणे, राहुल प्रभाकर देवतळे, वृषभ अरुण नैताम, महेश अरुण नैताम, अमित नंदकिशोर नैताम, अमित दादाजी भांडेकर, अजित सदाशिव धोडरे, प्रतीक शालीक दुधबळे, राकेश ऋषीदेव देवतळे, निखिल संतोष शेट्टे, साहिल बाळू नैताम, विनोद अशोक चांदेकर आणि संतोष उद्धव पारलेवार यांच्यासह फरार असलेले दिनेश नैताम, निखिल आरमिडवार, जयंत टेकाम, राकेश मोगरकर, गुणवंत उर्फ अनुराग धोडरे, संदेश धोडरे आणि अलका नैताम अशा २१ आरोपींवर भारतीय न्याय संहिता (BNS) आणि महाराष्ट्र दारूबंदी कायद्याच्या विविध कलमांनुसार गुन्हा दाखल झाला आहे. पोलीस निरीक्षक राहुल शंकर ठेंगणे यांच्या मार्गदर्शनाखाली पुढील तपास सुरू आहे.