भुदरगडमध्ये तरुणीला दरीत ढकलल्याचा आरोप; संशयित प्रियकर पोलिसांच्या ताब्यात
नाईकवाडी येथे अडीचशे फूट खोल दरीत ढकलून तरुणीची हत्या केल्याचा आरोप प्रियकरावर आहे. पोलिसांनी त्याला ताब्यात घेतले आहे.
छायाचित्रे सत्यापित केलेली नाहीत
कोल्हापूर जिल्ह्यातील भुदरगड तालुक्यात नाईकवाडी येथे एका तरुणीला अडीचशे फूट खोल दरीत ढकलून तिची हत्या केल्याचा आरोप तिच्या प्रियकरावर आहे. या प्रकरणी संशयित प्रियकराला पोलिसांनी ताब्यात घेतले आहे. महाराष्ट्रात केतन अग्रवाल हत्याकांडाची चर्चा सुरू असतानाच जिल्ह्यातून अशीच धक्कादायक घटना समोर आली आहे.
मृत तरुणीचे नाव तरन्नूम बशीर नाईक (वय २३, मूळ रहिवासी पाटगाव, सध्या गारगोटी) असे आहे. संशयित प्रियकराचे नाव श्रीपाद दिनकर वडर (वय २५, रहिवासी अवधूत कॉलनी, गारगोटी) असे आहे. या घटनेमुळे गारगोटीसह संपूर्ण भुदरगड तालुक्यात खळबळ उडाली आहे.
मिळालेल्या माहितीनुसार श्रीपाद आणि तरन्नूम गारगोटी येथे एकमेकांच्या घरासमोर राहत होते. जुन्या ओळखीतून दोघांमध्ये प्रेमसंबंध जुळले आणि ते गेली साडेपाच वर्षे सुरू होते. तरन्नूम इंजिनिअरिंगचे शिक्षण घेत होती. काही महिन्यांपूर्वी तिचे लग्न ठरले. त्यानंतर तिने श्रीपादला भेटणे टाळायला सुरुवात केली आणि यापुढे प्रेमसंबंध सुरू ठेवता येणार नाहीत, अशी भूमिका घेतली होती.
शुक्रवारी (९ ऑक्टोबर) सकाळी अकराच्या सुमारास श्रीपादने गोड बोलून तरन्नूमला नाईकवाडी येथील कड्यावर फिरायला नेले. तेथे तिने लग्न ठरल्यामुळे आता प्रेमसंबंध ठेवता येणार नाहीत, असे स्पष्ट सांगितले. त्यावरून संतापलेल्या श्रीपादने दुपारी तीनच्या सुमारास तिला अडीचशे फूट खोल दरीत ढकलून दिल्याचा आरोप आहे.
त्यानंतर श्रीपाद स्वतः भुदरगड पोलीस स्टेशनमध्ये गेला. पाणी आणण्यासाठी दुचाकीवरून गेलो असता तरन्नूम बेपत्ता झाल्याचे त्याने पोलिसांना सांगितले. त्याच्या तक्रारीवरून पोलिसांनी अपहरणाचा गुन्हा दाखल केला. तरन्नूम बेपत्ता झाल्याचा हा बनाव श्रीपादने रचल्याचे तपासात समोर आले.
मात्र पोलिसांना श्रीपादच्या सांगण्यावर संशय आला. त्यांनी कसून चौकशी सुरू केल्यानंतर त्याच्या जबाबातील विसंगती समोर आल्या. प्रश्नांची सरबत्ती केल्यावर अखेर त्याने तरन्नूमला दरीत ढकलल्याची कबुली दिल्याची माहिती पोलिसांनी दिली.
शुक्रवारी रात्री उशीर झाल्याने आणि अंधार पडल्यामुळे दरीतील शोधमोहीम थांबवावी लागली. शनिवारी सकाळी आंबोली येथील बचाव पथकाने शोधमोहीम पुन्हा सुरू केली. सुमारे चार तासांच्या अथक प्रयत्नांनंतर दोरीच्या साहाय्याने तरन्नूमचा मृतदेह अडीचशे फूट खोल दरीतून बाहेर काढण्यात आला.
मृतदेह शवविच्छेदनासाठी कोल्हापूर येथील शासकीय रुग्णालयात पाठवण्यात आला आहे. पोलीस निरीक्षक संदीप जगताप यांच्या मार्गदर्शनाखाली या प्रकरणाचा पुढील तपास सुरू आहे. पुण्यातील लोहगडावर केतन अग्रवाल याची हत्या केल्याच्या प्रकरणाची चर्चा सुरू असतानाच कोल्हापुरातही अशी घटना समोर आल्याने राज्याचे लक्ष या प्रकरणाकडे वेधले गेले आहे.
