जोगेश्वरीत तरुणीची आत्महत्या; लग्नासाठी दबाव आणि धमक्यांचा आरोप, गुन्हा दाखल

संभाजीनगर परिसरातील गंगापूर तालुक्यात जोगेश्वरी येथील गणेशनगर भागात एका तरुणीने आत्महत्या करून आयुष्य संपवल्याची दुर्दैवी घटना 14 मे रोजी घडली. या प्रकरणी मृत तरुणीच्या वडिलांनी दिलेल्या फिर्यादीवरून एमआयडीसी वाळूज पोलीस स्टेशनमध्ये गुन्हा दाखल करण्यात आला आहे.

फिर्यादीनुसार, 14 मे 2026 रोजी तरुणीचे वडील आणि त्यांची पत्नी कामावरून घरी परतले. त्या वेळी घराची कडी बाहेरून लावलेली त्यांना आढळली. त्यांनी दरवाजा उघडून आत प्रवेश केला, तेव्हा त्यांची मुलगी ओढणीच्या साहाय्याने फॅनला गळफास घेतलेल्या अवस्थेत दिसली.

त्यांनी तिला तत्काळ खाली उतरवले आणि उपचारासाठी घाटी रुग्णालयात हलवले. मात्र तिथे डॉक्टरांनी तपासणी करून तिला मृत घोषित केले.

मुलीच्या वडिलांनी पोलिसांत दिलेल्या फिर्यादीत गंभीर आरोप केला आहे. आरोपीच्या सततच्या त्रासाला आणि धमक्यांना कंटाळूनच आपल्या मुलीने टोकाचे पाऊल उचलले आणि आत्महत्या केली, असे त्यांचे म्हणणे आहे.

या घटनेबाबत समोर आलेल्या माहितीनुसार, एका तरुणाने तरुणीला प्रेमाच्या जाळ्यात ओढले आणि तिला आयफोन गिफ्ट दिला. त्यानंतर त्याने तिचा मानसिक छळ केल्याचा प्रकार घडला आहे. "माझ्यासोबत लग्न कर, नाहीतर तुझी बदनामी करेन, तुझे कुठेही लग्न होऊ देणार नाही," अशी धमकी त्याने दिली, असे सांगण्यात आले आहे. या कारणामुळे तरुणीने आयुष्य संपवले, असा आरोप आहे.

पोलिसांनी तपासात चौकशी केली असता मृत तरुणीचा आयफोन सापडला. हा आयफोन आरोपी गणेश शंकर शेंडगे याने आपल्या प्रेयसीला दिला होता. त्यानेच तरुणीला सतत मानसिक त्रास दिला, लग्न करण्यासाठी तिच्यावर दबाव टाकला आणि तो सतत तिची ब्लॅकमेलिंग करत होता, असे पोलीस तपासात उघड झाले आहे.

वडिलांच्या फिर्यादीवरून एमआयडीसी वाळूज पोलीस स्टेशनमध्ये भारतीय न्याय संहिता (BNS) 2023 चे कलम 108 (आत्महत्येस प्रवृत्त करणे) आणि कलम 351(2) नुसार गुन्हा नोंदवण्यात आला आहे. या संवेदनशील प्रकरणाचा पुढील तपास पोलीस उपनिरीक्षक सुरेश सांगळे करत आहेत.