भीमाशंकरमध्ये जंगलतोडीमुळे प्राणी थेट शेतात, उल्हास नदीजवळ वावे गावात नीलगाय आणि पिल्लू दिसले

कर्जत तालुक्यातील भीमाशंकर अभयारण्य आणि आजूबाजूच्या जंगल परिसरात टोरंट प्रकल्पासाठी मोठ्या प्रमाणात जंगलतोड करण्यात आली आहे. झाडे गेल्यामुळे तिथले प्राणी आणि पक्षी आता निवाऱ्यासाठी दुसरीकडे जंगल शोधू लागले आहेत. याचाच एक प्रकार उल्हास नदीच्या कडेला असलेल्या वावे गावाच्या हद्दीत समोर आला. तिथे नीलगाय आणि तिचे पिल्लू दिसून आले. जंगलात झाडेच उरली नाहीत तर प्राणी कुठे जाणार, असा प्रश्न यामुळे उभा राहिला असून स्थानिकांमध्ये संतापाचे वातावरण आहे.

भीमाशंकर अभयारण्यात सुरू असलेल्या जंगलतोडीमुळे पक्षी आणि प्राणी स्थलांतर करू लागले आहेत. इथली झाडे नष्ट झाल्यामुळे या जंगलातील पक्षी आणि प्राण्यांनी स्वतःसाठी नवा अधिवास शोधायला सुरुवात केली आहे. आतापर्यंत फक्त 5000 झाडे तोडली गेली आहेत. उरलेली 27 हजार झाडे तोडल्यानंतर इथे पक्षी आणि प्राणी राहतील का, असा प्रश्न आता उभा राहिला आहे.

दुसरीकडे, शासन 32480 झाडे तोडणार आहे, पण प्रत्यक्षात तीन लाख झाडे तुटणार आहेत, असे स्थानिक नागरिक आणि पर्यावरणप्रेमी यांचे म्हणणे आहे. म्हणजेच शासन तोडणार असलेली झाडे आणि स्थानिकांच्या म्हणण्यातली झाडे यांच्यात मोठा फरक आहे. या जंगलतोडीमुळे स्थानिकांमध्ये संतापाचे वातावरण आहे.

या जंगलतोडीचा सर्वात मोठा फटका प्राणी आणि पक्ष्यांना बसत आहे. चांगले जंगल आणि वनसंपदा असलेल्या अनेक ठिकाणांकडे प्राणी जात आहेत. त्यातली एक नीलगाय टोरंट धरणासाठी जंगल तोडलेल्या जागेपासून 20 किलोमीटर अंतरावर असलेल्या उल्हास नदी परिसरात पोहोचली. वावे गावाच्या हद्दीत सायंकाळी नीलगाय आणि तिचे पिल्लू लोकांना दिसले.

भाताच्या शेतात नीलगाय दिसल्यामुळे अनेक शेतकरी ती आपल्या शेतात शिरून भाताच्या पिकाचे नुकसान करणार नाही, याची काळजी घेत होते. मात्र रात्री ती नीलगाय भाताच्या शेतात घुसली आणि पिकाचे नुकसान केले. त्यामुळे शेतकऱ्यांना रात्रभर नीलगायीचा शोध घ्यावा लागला.

दुसरीकडे, नीलगायीसारखे असंख्य प्राणी पाली सायडोंगर येथील जंगलाच्या बाहेर पडले आहेत. त्यामुळे प्राणीमित्र प्रचंड त्रस्त झाले आहेत. जंगलतोडीचा परिणाम फक्त प्राण्यांवरच होत नाही, तर इतर घटकांवरही तितक्याच तीव्रतेने दिसून येत आहे.