जोशीमठजवळ हेलिकॉप्टर कोसळले, बद्रीनाथहून निघालेल्या पायलटसह सहाही जणांचा मृत्यू

उत्तराखंडमधील जोशीमठ परिसरात शुक्रवारी (30 ऑक्टोबर 2026) मोठी दुर्घटना घडली. बद्रीनाथ धामहून प्रवाशांना घेऊन डेहराडूनकडे निघालेले ट्रान्स भारत एविएशन कंपनीचे चार्टर्ड हेलिकॉप्टर जोशीमठजवळ कोसळले. खराब हवामानामुळे हा अपघात झाल्याची माहिती समोर आली आहे. या अपघातात पायलटसह हेलिकॉप्टरमधील सर्वच्या सर्व सहा जणांचा मृत्यू झाला.

ट्रान्स भारत एविएशन प्रायव्हेट लिमिटेडचे VT-HCX क्रमांकाचे हे हेलिकॉप्टर दुपारी 1.14 वाजता बद्रीनाथहून डेहराडूनच्या सहस्त्रधारा हेलिपॅडकडे रवाना झाले होते. जोशीमठ घाटी आणि चाई गावाच्या परिसरातून जात असताना अचानक हवामान बिघडले. दृश्यमानता खूपच कमी झाली आणि हेलिकॉप्टरचा एटीसी तसेच ग्राऊंड ट्रॅकिंग सिस्टिमशी संपर्क तुटला. थोड्याच वेळात ते रडारवरूनही गायब झाले.

त्यानंतर चाई गावाच्या परिसरात एका ठिकाणी धुराचे मोठे लोट दिसले. स्थानिक नागरिक आणि लष्कराने ही माहिती तातडीने प्रशासनाला कळवली.

उत्तराखंड नागरी विमानन विकास प्राधिकरणाने दिलेल्या माहितीनुसार, हेलिकॉप्टर बेपत्ता झाल्याचे कळताच चमोली जिल्हा प्रशासन, भारतीय सेना आणि राज्य आपत्ती प्रतिसाद दल (SDRF) यांची पथके शोध आणि बचावकार्यासाठी रवाना करण्यात आली. भारत-तिबेट सीमा पोलिसांचीही (ITBP) पथके घटनास्थळी पाठवण्यात आली. खराब हवामानाचे मोठे अडथळे पार करून संयुक्त रेस्क्यू पथक दुर्घटनास्थळी पोहोचले असून मृतदेह बाहेर काढण्याचे आणि शोधमोहिमेचे काम सुरू आहे.

प्राधिकरणाने दिलेल्या यादीनुसार, हेलिकॉप्टरमध्ये पायलट कॅप्टन हिमांशू आणि पाच प्रवासी होते. प्रवाशांमध्ये प्रताप, अरुण, शंकर गौडा, सुधीर के आणि एच. एस. नटराज यांची नावे आहेत. दुसरीकडे, मृतांमध्ये चंद्रकांत, अथर्व, आकाश, राज श्री आणि दिनेश यांचा समावेश असून, एका अनुभवी पायलटचाही त्यात समावेश असल्याचे सांगण्यात आले आहे.

या दुर्घटनेनंतर खबरदारीचा उपाय म्हणून ट्रान्स भारत एविएशन प्रायव्हेट लिमिटेड कंपनीचा संपूर्ण हेलिकॉप्टरचा ताफा तात्पुरता ग्राउंड करण्यात आला आहे.

हवामान विभागाने 30 ऑक्टोबरसाठी चमोली, नैनीताल, पिथौरागढ, बागेश्वर आणि चंपावत या जिल्ह्यांत मुसळधार पाऊस आणि खराब हवामानाचा ऑरेंज अलर्ट आधीच जाहीर केला होता. ताशी 40 ते 50 किमी वेगाने वारे वाहण्याची आणि गारा पडण्याची शक्यताही वर्तवण्यात आली होती. असे असतानाही उड्डाणाचा निर्णय घेतला गेला होता का, यावर आता चर्चा सुरू झाली आहे.

विमानन तज्ज्ञ कॅप्टन एहसान खालिद यांनी सांगितले की, ऑरेंज अलर्ट असताना उड्डाण ही नेहमीसारखी बाब राहत नाही, तर ते अतिशय महत्त्वाचे मूल्यमापन ठरते. त्याला सेफ्टी रिस्क असेसमेंट म्हणतात. त्यात भूभाग, हवामानाची स्थिती, त्या भागात उड्डाण करण्याची पायलटची क्षमता आणि त्यांचा अनुभव यावर चर्चा केली जाते.