भद्रावतीत प्रकल्पग्रस्तांचे दीप जलाओ आंदोलन, बच्चू कडू यांचा इशारा

भद्रावती तालुक्यातील न्यू एरा क्लीनटेक कोल गॅसिफिकेशन प्रकल्प आणि न्यू ग्रेटा एनर्जी कंपनीमुळे बाधित झालेल्या शेतकऱ्यांनी दिवाळीच्या पूर्वसंध्येला, शुक्रवारी दि. ०६ रोजी, दीप जलाओ आंदोलन केले. आमदार बच्चू कडू यांच्या नेतृत्वाखाली झालेल्या या आंदोलनात महिला आणि प्रकल्पग्रस्त शेतकऱ्यांनी हातात दीप घेऊन कंपनी आणि शासनाचे लक्ष वेधले.

लोकसभा संघटक मुकेश जीवतोडे यांच्या प्रयत्नांमुळे बच्चू कडू आंदोलनात सहभागी झाले. शेतकरी संघटना युवा आघाडीचे प्रदेशाध्यक्ष ॲड. दीपक चटप आणि मुकेश जीवतोडे प्रमुख पाहुणे म्हणून उपस्थित होते. व्यासपीठावर संघर्ष समितीचे अध्यक्ष प्रवीण सातपुते, शिवसेना जिल्हाप्रमुख युवराज धानोरकर, उपाध्यक्ष सुधीर सातपुते, मधुकर सावनकर आणि इतर मान्यवर होते. कार्यक्रमाचे संचालन चेतन गुंडावार यांनी केले आणि प्रास्ताविक अनुप खुटेमाटे यांनी मांडले.

सानुग्रह अनुदान, स्थानिकांना रोजगाराची हमी आणि कंपनी, शासन व प्रकल्पग्रस्त यांच्यातील त्रिपक्षीय करार, या तीन मुख्य मागण्या बच्चू कडू यांनी जोरदारपणे मांडल्या. यावर सकारात्मक निर्णय झाला नाही तर आधी गनिमी काव्याने आणि मग थेट मैदानात उतरून तीव्र आंदोलन करू, असा इशारा त्यांनी दिला. प्रकल्पग्रस्त शेतकऱ्यांना न्याय मिळाला नाही तर गनिमी काव्याने कंपनीत घुसू, असे ते म्हणाले. शेतकऱ्यांच्या जमिनी घेऊन त्यांच्या हक्कांकडे दुर्लक्ष केलेले सहन केले जाणार नाही आणि न्याय मिळेपर्यंत संघर्ष सुरूच राहील, असेही त्यांनी सांगितले.

अन्याय होत असेल तर सत्तेचा मोह न ठेवता संघर्ष करू, असे सांगत कडू यांनी स्थानिक भाजप आमदारावर टोला लगावला. आम्ही आंदोलनात उतरल्याचा प्रकाश स्थानिक आमदाराच्या डोक्यात पडला, असे ते म्हणाले. पोलिसांच्या दंडुकेशाहीला न घाबरता मुलाबाळांसह संघर्षासाठी तयार राहा, असे आवाहन त्यांनी केले. पक्षीय राजकारण बाजूला ठेवून शेतकरी, कष्टकरी, दिव्यांग आणि मजुरांचे प्रश्न सोडवण्यासाठी आपण नेहमी तयार आहोत, तसेच अन्यायाविरोधातील आंदोलनात गुन्हे अंगावर घेण्याची आणि लाठी खाण्याचीही आपली तयारी आहे, असे त्यांनी सांगितले. न्याय मिळाला नाही तर कंपनीतील काम सुरू होऊ देणार नाही, असाही इशारा त्यांनी दिला.

ॲड. दीपक चटप यांनी आपल्या भाषणात लोकप्रतिनिधी आणि शासनाच्या भूमिकेवर टीका केली. प्रकल्पग्रस्तांच्या मागण्या न्याय्य आहेत आणि कंपनी व शासनाकडून होणारा अन्याय सहन केला जाणार नाही, असे ते म्हणाले. आमदार देवतळे यांनी आपली जबाबदारी पार पाडून शेतकऱ्यांचे प्रश्न सोडवण्याचा प्रयत्न केला असता, तर दिवाळीच्या दिवशी शेतकऱ्यांवर आंदोलन करण्याची वेळ आली नसती, असे चटप यांनी म्हटले. न्यायालयात आणि रस्त्यावरच्या लढाईत आपण शेतकऱ्यांसोबत राहू, असे आश्वासन देत, शासन आणि लोकप्रतिनिधींनी दखल घेतली नाही तर मंत्री व लोकप्रतिनिधींना गावबंदी आणि जिल्हाबंदी करायला वेळ लागणार नाही, असा इशाराही त्यांनी दिला.

मुकेश जीवतोडे यांनी पक्षीय राजकारण बाजूला ठेवून सर्वांनी एकत्र यावे आणि प्रकल्पग्रस्तांच्या न्याय्य हक्कांसाठी लढा उभारावा, असे आवाहन केले. प्रकल्पग्रस्त शेतकरी, बेरोजगार युवक, कामगार आणि स्थानिक नागरिकांच्या प्रश्नांवर एकजुटीने लढावे, असे ते म्हणाले.

परिसरातील अनेक प्रकल्पग्रस्त शेतकरी आंदोलनात सहभागी झाले होते. शिवसेना शिंदे गटाची उपस्थितीही लक्षणीय होती. आंदोलन शांततेत आणि शिस्तीत पार पडले. कोणताही अनुचित प्रकार घडू नये म्हणून मोठा पोलीस बंदोबस्त ठेवण्यात आला होता.

निप्पॉन प्रकल्पग्रस्त संघर्ष समितीचे सर्व पदाधिकारी आणि स्थानिक शेतकऱ्यांनी आंदोलन यशस्वी करण्यासाठी खूप मेहनत घेतली. कंपनी आणि शासनाने आंदोलनाची दखल घेतली नाही तर पुढे आणखी तीव्र विरोध केला जाईल, असा इशारा देण्यात आला. आता शासन आणि कंपनी काय निर्णय घेते, याकडे परिसरातील शेतकऱ्यांचे लक्ष लागले आहे.