IND A vs AUS A: कुमार कुशाग्रचं शतक, गोलंदाजांचा भेदक मारा; भारताने १६२ धावांनी उडवला ऑस्ट्रेलियाचा धुव्वा
देवदत्त पडिक्कलच्या नेतृत्वाखालील भारत अ संघाने पहिल्या अनधिकृत कसोटी सामन्यात ऑस्ट्रेलिया अ संघाला १६२ धावांच्या मोठ्या फरकाने हरवले आहे. या विजयामुळे दोन सामन्यांच्या मालिकेत भारताने १-० अशी आघाडी घेतली आहे. सामन्याच्या चौथ्या आणि अखेरच्या दिवशी विजयासाठी ३६३ धावांचे लक्ष्य पाठलाग करताना ऑस्ट्रेलियाचा संघ अवघ्या २०० धावांत सर्वबाद झाला.
या सामन्यात भारताने फलंदाजी आणि गोलंदाजी अशा दोन्ही आघाड्यांवर छाप पाडली. कुमार कुशाग्र आणि कर्णधार पडिक्कल यांनी बॅटने चमक दाखवली, तर अंशुल कंबोज, तुषार देशपांडे, शम्स मुलानी आणि तनुष कोटियन या गोलंदाजांच्या भेदक माऱ्याने भारताला विजय मिळवून देण्यात मोलाची भूमिका बजावली. संपूर्ण सामन्यातील उत्कृष्ट कामगिरीसाठी सामनावीराचा पुरस्कार कुमार कुशाग्रला देण्यात आला.
नाणेफेक जिंकून आधी बॅटिंग करण्याचा निर्णय घेणाऱ्या भारताने पहिल्या डावात ३३४ धावांचा डोंगर उभारला होता. या डावात कुमार कुशाग्रने ११३ धावांचे शतक झळकावले, तर साई सुदर्शनने ५७ धावा केल्या. यानंतर तनुष कोटियनने ६९ धावांची आणि अंशुल कंबोजने २३ धावांची भर घातली, त्यामुळे भारताचा एकूण धावसंख्या मोठी झाली. प्रत्युत्तरादाखल खेळताना ऑस्ट्रेलियाचा पहिला डाव अवघ्या १७१ धावांतच आटोपला, त्यामुळे भारताला १६३ धावांची आघाडी मिळाली.
दुसऱ्या डावातही भारताने चांगली फलंदाजी करत १९९ धावा जमवल्या आणि आपली आघाडी ३६२ धावांपर्यंत वाढवली. या डावात कर्णधार पडिक्कलने ५९ धावा केल्या, तर कुमार कुशाग्र ४६ धावांवर नाबाद राहिला. ३६३ धावांचे मोठे लक्ष्य गाठण्याच्या प्रयत्नात ऑस्ट्रेलियाचा दुसरा डावही अपयशी ठरला आणि संपूर्ण संघ २०० धावांतच गारद झाला. या डावात ऑस्ट्रेलियाच्या एकाही फलंदाजाला अर्धशतक करता आले नाही. दुसऱ्या डावात ५२ चेंडूंत ४७ धावा करणारा फर्गस ओ'नील हा त्यांच्याकडून सर्वाधिक धावा करणारा खेळाडू ठरला.
गोलंदाजीत भारताने कमालीची शिस्त आणि सातत्य दाखवले. दुसऱ्या डावात तुषार देशपांडे आणि शम्स मुलानी यांनी प्रत्येकी ३ विकेट्स घेतल्या, तर अंशुल कंबोज आणि तनुष कोटियन यांनी प्रत्येकी २ विकेट्स काढल्या. यापूर्वी पहिल्या डावातही शम्स मुलानीने ४ विकेट्स घेत भेदक मारा केला होता, आणि त्याने दोन्ही डाव मिळून एकूण ७ विकेट्स घेतल्या. पहिल्या डावात तुषार आणि तनुष यांनी प्रत्येकी २ विकेट्स घेतल्या, तर अंशुल कंबोज आणि प्रफुल्ल हिंगे यांनी प्रत्येकी १ विकेट घेतली.
या दोन सामन्यांच्या मालिकेतील दुसरा सामना २९ सप्टेंबर रोजी पुदुचेरी येथे खेळवला जाणार आहे. ही कसोटी मालिका संपल्यानंतर ६ ऑक्टोबरपासून तीन एकदिवसीय सामन्यांची मालिका सुरू होणार आहे.
