१९ वर्षांखालील महिला टी-२० विश्वचषकाचा कार्यक्रम ठरला; भारत आणि पाकिस्तान वेगळ्या गटांत

आयसीसी अंडर-19 महिला टी-20 विश्वचषक 2027 (U19 Women's T20 World Cup) चे वेळापत्रक जाहीर झाले आहे. ही स्पर्धा बांगलादेश आणि नेपाळमध्ये 21 जानेवारी ते 6 फेब्रुवारी या काळात होणार आहे. एकूण 16 संघ यात खेळतील. भारत आणि पाकिस्तान यांना वेगवेगळ्या गटांत ठेवले आहे. भारत गतविजेता असल्यामुळे विजेतेपद राखण्याचे आव्हान भारतीय संघासमोर असेल.

स्पर्धेतले सामने बांगलादेशातील चितगाव आणि सिलहट येथे होतील. नेपाळची राजधानी काठमांडू येथेही सामने खेळवले जातील. एकूण 41 सामने क्रिकेटप्रेमींना पाहता येतील. 16 संघांचे प्रत्येकी 4 संघांचे 4 गट केले आहेत. गटातले सामने 26 जानेवारीपर्यंत चालतील. त्यानंतर पात्र संघ सुपर सिक्स फेरीत जातील. या फेरीत दोन गटांतून प्रत्येकी दोन अव्वल संघ उपांत्य फेरीसाठी पात्र ठरतील.

भारताचा समावेश 'अ' गटात झाला आहे. या गटात आयर्लंड, वेस्ट इंडिज आणि यजमान नेपाळ हे संघही आहेत. भारत 22 जानेवारीला काठमांडू इंटरनॅशनल क्रिकेट स्टेडियमवर वेस्ट इंडिजविरुद्ध पहिला सामना खेळेल. त्याच दिवशी नेपाळचा सामना आयर्लंडशी होईल.

'ब' गटात दक्षिण आफ्रिका, न्यूझीलंड, पाकिस्तान आणि सामोआ आहेत. 'क' गटात ऑस्ट्रेलिया, बांगलादेश, नायजेरिया आणि संयुक्त अरब अमिराती (यूएई) आहेत. 'ड' गटात इंग्लंड, श्रीलंका, अमेरिका आणि स्कॉटलंड यांना जागा मिळाली आहे.

पहिल्याच दिवशी, 21 जानेवारीला चार सामने होतील. सिलहट येथे यजमान बांगलादेशची गाठ यूएईशी पडेल. त्यानंतर ऑस्ट्रेलिया आणि नायजेरिया आमनेसामने येतील. काठमांडूमध्ये श्रीलंका-स्कॉटलंड आणि इंग्लंड-अमेरिका असे सामने होतील.

चितगावमधील बीर श्रेष्ठ शहीद फ्लाइट लेफ्टनंट मतिउर रहमान क्रिकेट स्टेडियम, सिलहट इंटरनॅशनल क्रिकेट स्टेडियम, काठमांडूतील त्रिभुवन इंटरनॅशनल क्रिकेट स्टेडियम आणि अपर मुलपानी इंटरनॅशनल क्रिकेट ग्राउंड या चार मैदानांवर सामने होणार आहेत.

उपांत्य सामने 4 फेब्रुवारीला चितगाव येथील बीर श्रेष्ठ शहीद फ्लाइट लेफ्टनंट मतिउर रहमान क्रिकेट स्टेडियमवर होतील. 5 फेब्रुवारी हा राखीव दिवस आहे. अंतिम सामना 6 फेब्रुवारीला स्थानिक वेळेनुसार दुपारी 1.30 वाजता सुरू होईल. अंतिम सामन्यासाठी 7 फेब्रुवारी हा राखीव दिवस ठेवला आहे.

आयसीसीचे मुख्य कार्यकारी अधिकारी संजोग गुप्ता यांनी सांगितले की, या स्पर्धेमुळे युवा महिला क्रिकेटपटूंना आंतरराष्ट्रीय पातळीवर आपली गुणवत्ता सिद्ध करण्याची संधी मिळेल. ही स्पर्धा क्रिकेटच्या भविष्याची झलक दाखवणारे व्यासपीठ आहे, असे ते म्हणाले. सहभागी युवा खेळाडू जगभरातील मुलींना प्रेरणा देतील, असा विश्वास त्यांनी व्यक्त केला.

बांगलादेश आणि नेपाळ या सहयजमान देशांत क्रिकेट लोकप्रिय आहे आणि तिथे तरुणांची संख्याही मोठी आहे, हे लक्षात घेऊन या देशांची निवड केल्याचेही गुप्ता यांनी नमूद केले.