अमरावतीत रविवारी एकनाथ शिंदे यांची सभा, किरण सरनाईक यांच्या प्रचारासाठी उपमुख्यमंत्री येणार

विधान परिषद निवडणुकीचा प्रचार आता रंगात आला आहे. शिवसेनेचे मुख्य नेते आणि राज्याचे उपमुख्यमंत्री एकनाथ शिंदे रविवारी, १८ ऑक्टोबर रोजी अमरावतीत जाहीर सभा घेणार आहेत. शिक्षक मतदारसंघाचे महायुतीचे अधिकृत उमेदवार किरण सरनाईक यांच्या प्रचारासाठी शिंदे अमरावतीच्या दौऱ्यावर येणार आहेत. या सभेत शिंदे काय बोलणार, याकडे राज्याचे लक्ष लागले आहे.

अमरावती शिक्षक मतदारसंघासाठी महायुतीकडून शिवसेनेने विद्यमान आमदार किरण सरनाईक यांना उमेदवारी दिली आहे. त्यांच्या प्रचारासाठी उपमुख्यमंत्री शिंदे अमरावतीत जोरदार सभा घेणार आहेत. या सभेसाठी सरनाईक यांच्याकडून जोरदार तयारी करण्यात आली आहे.

विधान परिषदेच्या पाचही जागांवर महायुतीचेच उमेदवार निवडून येतील, असा विश्वास उपमुख्यमंत्री शिंदे यांनी याआधी व्यक्त केला होता. या दौऱ्यात शिंदे अमरावती शिक्षक मतदारसंघात प्रचार सभा घेतील. त्यामुळे महायुतीचे उमेदवार किरण सरनाईक यांच्या विजयाचा मार्ग सोपा होईल, असा विश्वास शिवसेनेच्या नेत्यांनी व्यक्त केला आहे.

सरनाईक यांनी आमदार म्हणून विधान परिषदेत केलेल्या कामाचा शिंदे सभेत आढावा घेतील, असे सांगण्यात आले आहे. तसेच ते शिक्षकांच्या प्रश्नांवर बोलतील. जिल्ह्यातील शिक्षक मोठ्या संख्येने या सभेला येण्याची शक्यता आहे.

दरम्यान, उबाठा गटाचे राष्ट्रीय प्रवक्ते आनंद दुबे यांनी शुक्रवारी उपमुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. ठाण्यात झालेल्या या पक्ष सोहळ्याला शिवसेना सोशल मीडिया राज्यप्रमुख तथा युवासेना सरचिटणीस राहुल कनाल आणि प्रमुख पदाधिकारी उपस्थित होते.

या वेळी शिंदे म्हणाले की, गेली अनेक वर्षे दुबे यांना शिवसेनेत काम करताना त्यांनी पाहिले आहे. राष्ट्रीय पातळीवर पक्षाची भूमिका मांडणाऱ्या या कार्यकर्त्याने आज मूळ शिवसेनेत प्रवेश केला, असेही शिंदे यांनी सांगितले. आनंद दुबे यांच्यासह गुलाबचंद मौर्य, सुनील चौबे, ब्रीजेश मोर्य, दशरत प्रजापती, प्रवीण दुबे, धनंजय गुप्ता यांच्यासह अनेकांनी शिवसेनेचा धनुष्यबाण हाती घेतला.