मोदींच्या २५ वर्षांच्या वाटचालीबद्दल उपमुख्यमंत्री शिंदे यांचे अभिनंदन

नरेंद्र मोदी यांनी ७ ऑक्टोबर २००१ रोजी गुजरातच्या मुख्यमंत्रीपदाची सूत्रे हाती घेतली होती. या घटनेला आज २५ वर्षे पूर्ण झाली. त्या निमित्ताने महाराष्ट्राचे उपमुख्यमंत्री एकनाथ शिंदे यांनी मोदी यांचे अभिनंदन केले. हा दिवस भारतीय राजकारणाच्या इतिहासातील महत्त्वाचा टप्पा ठरला, असे शिंदे यांनी म्हटले आहे.

शिंदे यांच्या म्हणण्यानुसार, ही वाटचाल फक्त एका नेत्याच्या राजकीय कारकिर्दीची नाही. देशाच्या बदलत्या राजकीय, सामाजिक आणि विकासाच्या प्रवासातला हा एक महत्त्वाचा अध्याय आहे, असे ते म्हणाले.

मोदी यांच्या २५ वर्षांच्या सार्वजनिक जीवनाबद्दल शिंदे यांनी महाराष्ट्रातील १३ कोटी जनतेच्या आणि शिवसेनेच्या वतीने त्यांचे मनापासून अभिनंदन केले. पुढच्या वाटचालीसाठी त्यांनी शुभेच्छाही दिल्या.

शिंदे म्हणाले, "नरेंद्र मोदी यांची २५ वर्षांची वाटचाल ही सेवा, संकल्प आणि समर्पणाची यात्रा आहे. 'राष्ट्र प्रथम' या अटळ संकल्पाला केंद्रस्थानी ठेवून त्यांनी वैयक्तिक हितापेक्षा देशहिताला सर्वोच्च प्राधान्य दिले. त्यांच्या नेतृत्वामुळे १४० कोटी भारतीयांच्या आत्मविश्वासाला नवी उंची मिळाली आहे."

गुजरातच्या मुख्यमंत्रीपदापासून सुरू झालेला मोदी यांचा प्रवास आज पंतप्रधानपदापर्यंत पोहोचला आहे, याकडेही शिंदे यांनी लक्ष वेधले. या मोठ्या प्रवासात देशाच्या विकासाला नवी दिशा देण्यात आणि जागतिक पातळीवर भारताचा प्रभाव वाढवण्यात मोदी यांनी महत्त्वाची भूमिका बजावली, असे उपमुख्यमंत्री शिंदे यांनी सांगितले.

आपल्या सोशल मीडिया अकाउंटवरून दिलेल्या शुभेच्छा संदेशात शिंदे यांनी म्हटले आहे, "भारताला महासत्तेच्या दिशेने घेऊन जाणारी नरेंद्र मोदी यांची पुढची वाटचाल अधिक गौरवशाली ठरो. त्यांना उत्तम आरोग्य, दीर्घायुष्य आणि अखंड राष्ट्रसेवेसाठी अपार शक्ती मिळो, हीच ईश्वरचरणी प्रार्थना."

दरम्यान, सेवेची २५ वर्षे पूर्ण झाल्याच्या निमित्ताने पंतप्रधान नरेंद्र मोदी यांनी इंदिरा गांधी स्टेडियमवर झालेल्या विकास भारत संकल्प सभेला संबोधित केले. आपण एक असे व्यक्ती आहोत जे आयुष्य एका ध्येयासाठी जगतात आणि सतत काम करणे हाच आपला धर्म आहे, असे ते यावेळी म्हणाले.

मोदी म्हणाले, "देशाने मला खूप काही दिले आहे. त्यामुळे देशाप्रती माझी जबाबदारीही सर्वात मोठी आहे आणि माझा मनापासून विश्वास आहे की देशातील प्रत्येक नागरिकाचा माझ्यावर सर्वात मोठा हक्क आहे. हा २५ वर्षांचा जनतेचा विश्वास, हा २५ वर्षांचा अनुभव हे एक मोठे भांडवल आहे आणि हे भांडवल केवळ मोदींचे नाही, हे भांडवल देशाचे आहे."