अमेरिकेत महागाई आणि कामाच्या ताणामुळे ५४ टक्के कर्मचारी आठवड्यातून एकदा जेवत नाहीत

अमेरिकेत वाढत चाललेली महागाई आता लोकांच्या जेवणाच्या सवयींवरही परिणाम करू लागली आहे. खाण्यापिण्याच्या वस्तूंचे भाव वाढत आहेत, त्यातच ऑफिसमधील कामाचा ताण आणि सततच्या बैठका यामुळे कर्मचाऱ्यांना दुपारी जेवायलाही वेळ मिळत नाही. अमेरिकेतील निम्म्याहून अधिक ऑफिस कर्मचारी आठवड्यातून किमान एकदा दुपारचे जेवण पूर्णपणे टाळतात, असे समोर आले आहे.

ezCater या कंपनीच्या २०२६ च्या वार्षिक लंच रिपोर्टमधून ही गोष्ट पुढे आली आहे. या अहवालानुसार जेवणाचा वाढता खर्च आणि कामाच्या जागेतले वातावरण, या दोन्हींमुळे कर्मचारी जेवणापासून दूर राहत आहेत. त्यामुळे कर्मचाऱ्यांचे आरोग्य आणि कामाची उत्पादकता, या दोन्ही बाबतीत चिंता व्यक्त होत आहे.

अहवालानुसार अमेरिकेतील ५४ टक्के कर्मचारी आठवड्यातून किमान एकदा दुपारचे जेवण घेत नाहीत. हे प्रमाण सलग चार वर्षे वाढतच आहे. २०२३ मध्ये ते ४८ टक्के होते. महागाईचा यात मोठा वाटा आहे. तब्बल ८१ टक्के कर्मचाऱ्यांनी सांगितले की महागाई आणि हॉटेलमधील वाढलेले मेन्यूचे दर यामुळे त्यांनी आपल्या जेवणाच्या सवयी बदलल्या आहेत.

या कर्मचाऱ्यांपैकी ४२ टक्के जण बाहेरून जेवण मागवणे कमी करत आहेत, तर ४० टक्के जण स्वस्त खाद्यपदार्थांना पसंती देत आहेत. कामाच्या ठिकाणी जेवणासाठी कर्मचारी सरासरी आठवड्याला १०० डॉलर खर्च करतात.

फक्त पैशांचाच प्रश्न नाही, तर ऑफिसमधील कामाचे स्वरूपही जेवण टाळण्याचे मोठे कारण ठरत आहे. सुमारे ३१ टक्के कर्मचाऱ्यांनी सांगितले की कंपनीतील कामाची संस्कृती आणि वरिष्ठांच्या अपेक्षा यामुळे जेवणासाठी वेळ काढणे कठीण होते. सतत ऑनलाइन उपलब्ध राहण्याचा दबाव, वाढत्या जबाबदाऱ्या आणि दुपारच्या वेळेत ठेवलेल्या बैठका यामुळे अनेक जण डेस्कवरच बसून काम करत राहतात. विशेषतः तरुण कर्मचाऱ्यांवर वरिष्ठांकडून जास्त दबाव जाणवतो, असेही अहवालात म्हटले आहे.

जेवण टाळण्याचा परिणाम कामावरही दिसू लागला आहे. अहवालातील ८४ टक्के कर्मचाऱ्यांनी सांगितले की भुकेमुळे त्यांच्या कामाच्या क्षमतेवर वाईट परिणाम होतो. त्यापैकी ४९ टक्के जणांचे लक्ष कामातून उडते, ४० टक्के जणांकडून चुका होण्याची शक्यता वाढते, तर ३८ टक्के जणांना काम संपवायला जास्त वेळ लागतो.

यावरून दुपारचा ब्रेक म्हणजे फक्त जेवण नव्हे, तर मन ताजेतवाने ठेवण्यासाठी आणि कामाची कार्यक्षमता टिकवण्यासाठीही तो महत्त्वाचा आहे, हे स्पष्ट होते. या परिस्थितीमुळे अमेरिकेतील कंपन्यांसमोर कर्मचाऱ्यांचे आरोग्य आणि कामाचे वातावरण हा प्रश्न उभा राहिला आहे. कर्मचाऱ्यांना नियमित जेवणासाठी वेळ देणे, ऑफिसमध्ये खाण्यापिण्याची सोय करणे आणि दुपारच्या वेळी अनावश्यक बैठका टाळणे अशा उपायांची गरज बोलून दाखवली जात आहे.