लॉरेन्स बिश्नोईचा कट्टर शत्रू हिमांशू भाऊ अमेरिकेत अटकेत, 'छोटा डॉन' नेमका आहे तरी कोण?

अभिनेता टायगर श्रॉफ यांच्या वाहनावर गोळीबार झाल्याची घटना घडल्यानंतर कुख्यात गँगस्टर लॉरेन्स बिश्नोई आणि त्याची टोळी पुन्हा एकदा चर्चेत आली आहे. याच दरम्यान आणखी एक नाव पुढे आले आहे, ते म्हणजे गँगस्टर हिमांशू भाऊ. भारताचा मोस्ट वॉन्टेड गुन्हेगार असलेल्या हिमांशू भाऊला अमेरिकेत अटक करण्यात आली आहे.

अमेरिकेत एफबीआयने त्याला पकडले असून, त्याला भारतात प्रत्यार्पित करण्याची तयारी सुरू आहे. अनेक प्रकरणांमध्ये तो हवा होता. अगदी लहान वयातच तो गुन्हेगारी जगताचा सूत्रधार बनला आणि त्यामुळे त्याला 'छोटा डॉन' हे टोपणनाव मिळाले.

हिमांशू भाऊचे लॉरेन्स बिश्नोई टोळीशी वैर होते. अनेक मोठे गुन्हे करून तो फरार झाला होता. त्याची टोळी दिल्ली आणि हरियाणात सक्रिय होती आणि अनेक गुन्ह्यांमध्ये तिचा सहभाग होता.

हिमांशू भाऊ अवघ्या १७ व्या वर्षी गुन्हेगारीच्या जगात उतरला. त्याआधी तो बालसुधारगृहात होता. गुन्हे कसे करायचे आणि तिथून पळून कसे जायचे, याची सगळी माहिती त्याला आधीपासूनच होती. तो हरियाणातील रोहतक जिल्ह्यातील रितोली गावचा रहिवासी आहे. गावात त्याला हिमांशू रितोली या नावानेही ओळखले जात होते.

तो नीरज बावाना आणि बांबीहा गँगसोबत काम करत असे आणि त्यांच्या जवळचा होता. लॉरेन्स बिश्नोई गँगचे गोल्डी ब्रार गँगसोबत तीव्र वैर आहे.

हिमांशू सुमारे २० मुलांसह बालसुधारगृहातून पळून गेला होता. हरियाणामध्ये त्याच्यावर खून, खंडणी आणि खुनाचा प्रयत्न यांसह जवळपास ५० गुन्हे दाखल आहेत. एल्विश यादव यांच्या घराबाहेर झालेला गोळीबार, बर्गर किंगमधील खून आणि अनेक जिम मालकांवर गोळीबार करून उकळलेली खंडणी, अशा प्रकरणांत हिमांशू भाऊचे नाव समोर आले आहे.

२०२२ मध्ये हिमांशू भाऊने हरियाणात २४ तासांच्या आत झालेल्या तीन खुनांची आणि एल्विश यादव यांच्या घराबाहेरील गोळीबाराची जबाबदारी स्वीकारली होती. दिल्ली पोलीस, हरियाणा पोलीस आणि एनआयएने खून, खुनाचा प्रयत्न आणि खंडणीसह अनेक गुन्हे त्याच्यावर दाखल केले आहेत.

२०२३ मध्ये इंटरपोलने त्याच्याविरुद्ध रेड कॉर्नर नोटीस जारी केली. त्याच वर्षी त्याच्याविरुद्ध लुकआऊट सर्क्युलरही काढण्यात आले होते. हिमांशू सुरुवातीला पोर्तुगालला पळून गेला आणि नंतर अमेरिकेतून भारतात एक टोळी चालवत होता.