कोस्पी ८ टक्क्यांनी कोसळला, निक्केईही घसरला; भारतीय बाजाराची सुरुवात कशी राहणार?

गुरुवारी आशियाई शेअर बाजारांमध्ये मोठ्या प्रमाणात विक्री झाली. फक्त भारतच नाही, तर संपूर्ण जगातील शेअर बाजार महागाईच्या आगीत होरपळत आहेत आणि अमेरिकेपासून जपानपर्यंत महागाईच्या झळा सहन कराव्या लागत आहेत. दक्षिण कोरियाचा कोस्पी निर्देशांक ८ टक्क्यांनी घसरला, तर जपानच्या निक्केई 225 मध्ये ४ टक्क्यांची घसरण नोंदवली गेली. अमेरिकेच्या नॅसडॅकवरही याचा परिणाम झाला. जपान वगळता MSCI चा आशिया-पॅसिफिक बाजार निर्देशांक सुमारे १.२ टक्क्यांनी खाली आला.

अमेरिकेतील महागाईचे आकडे अपेक्षेपेक्षा जास्त आले आणि आर्टिफिशियल इंटेलिजन्स (AI) शी संबंधित कंपन्यांमधील गुंतवणुकीबद्दल चिंता वाढली. त्यामुळे जागतिक बाजारांचे वातावरण कमकुवत झाले आणि अमेरिकन बाजाराला त्याचा फटका बसला. आज आशियाई बाजारांतील घसरण विशेषतः तंत्रज्ञान आणि सेमीकंडक्टर कंपन्यांच्या शेअर्समध्ये थेट दिसून येणार आहे.

अमेरिकेतील वार्षिक ग्राहक महागाईचा दर ऑगस्टमध्ये ३.४ टक्के होता, तो सप्टेंबरमध्ये ३.७ टक्क्यांपर्यंत वाढला. या आकडेवारीमुळे गुंतवणूकदारांमध्ये चिंता वाढली आहे की अमेरिकेची फेडरल रिझर्व्ह बँक व्याजदर कमी करण्याऐवजी ते आणखी वाढवू शकते. व्याजदर वाढण्याच्या शक्यतेमुळे गुंतवणूकदार अधिक जोखमीच्या मालमत्तांमधील आपली गुंतवणूक कमी करू शकतात. हा दबाव विशेषतः टेक्नोलॉजी कंपन्यांवर जाणवतो, कारण त्यांची भविष्यातील कमाई आणि विस्ताराच्या योजना मोठ्या भांडवली गुंतवणुकीवर अवलंबून असतात.

AI शी संबंधित कंपन्यांच्या शेअर्सवर जागतिक बाजारपेठेत विक्रीचा दबाव आणखी वाढला आहे. कंपन्यांनी AI पायाभूत सुविधा, डेटा सेंटर्स आणि चिप निर्मितीवर मोठा खर्च केला आहे. त्या खर्चातून मिळणारा परतावा अपेक्षेनुसार असेल की नाही, याची गुंतवणूकदारांना चिंता वाटत आहे. अमेरिकन बाजारातही तंत्रज्ञान आणि सेमीकंडक्टर कंपन्यांचे शेअर्स कमजोर राहिले. याचा परिणाम आशियाई बाजारांवर झाला, कारण तिथल्या अनेक मोठ्या कंपन्या AI आणि चिप पुरवठा साखळीत गुंतलेल्या आहेत. बाजारात सेमीकंडक्टर कंपन्यांचा मोठा वाटा असल्यामुळे दक्षिण कोरियामध्ये ही घसरण अधिक तीव्र होती.

या सगळ्या परिस्थितीचा भारतीय देशांतर्गत शेअर बाजारातील सेन्सेक्स आणि निफ्टी या प्रमुख निर्देशांकांवर काय परिणाम होणार, हा प्रश्न आहे. आशियाई बाजारांतील कमजोरी आणि अमेरिकन बाजारातील नकारात्मक संकेत पाहता, भारतीय बाजाराची सुरुवातही सावध किंवा कमजोर राहण्याची शक्यता आहे. सकाळी ७:५० वाजता गिफ्ट निफ्टी केवळ १३ अंकांनी घसरून २२६०९ वर होता. त्यामुळे देशांतर्गत बाजाराची सुरुवात थोडी कमजोर राहू शकते. मात्र गिफ्ट निफ्टीचे संकेत केवळ सुरुवातीचा कल दर्शवतात.

हा गुंतवणुकीचा सल्ला नाही. शेअर बाजार जोखमीच्या अधीन असतो. कोणतीही गुंतवणूक करण्यापूर्वी आपल्या विवेकबुद्धीचा वापर करा किंवा आर्थिक सल्लागाराचा सल्ला घ्या.