ॲग्रीगेटर टॅक्सींची माहिती एका डिजिटल प्लॅटफॉर्मवर आणा, मुख्यमंत्री फडणवीसांचे निर्देश

राज्यातील ॲप आधारित प्रवासी वाहतूक सेवा अधिक सुरक्षित, पारदर्शक आणि सुव्यवस्थित व्हावी, यासाठी मुख्यमंत्री देवेंद्र फडणवीस यांनी एक अत्याधुनिक डिजिटल प्लॅटफॉर्म तयार करण्याचे निर्देश दिले. ॲग्रीगेटर कंपन्यांची वाहने, त्यांचे चालक आणि चालकांचे कामाचे तास यांची अद्ययावत माहिती या प्लॅटफॉर्मवर उपलब्ध असावी, असे त्यांनी सांगितले.

महाराष्ट्र ॲग्रीगेटर नियमावली-2026 संदर्भात वर्षा निवासस्थानी झालेल्या बैठकीत फडणवीस यांनी हे निर्देश दिले. या बैठकीत ॲग्रीगेटर क्षेत्रातील वाढती वाहन संख्या, स्वतंत्र टॅक्सीचालकांच्या समस्या, प्रवाशांची सुरक्षितता आणि डिजिटल प्लॅटफॉर्मवरील प्रवास वाटपातील पारदर्शकता या मुद्द्यांचा आढावा घेण्यात आला. परिवहन मंत्री प्रताप सरनाईक, परिवहन विभागाचे अपर मुख्य सचिव संजय सेठी, परिवहन आयुक्त राजेश नार्वेकर आणि परिवहन विभागाचे इतर अधिकारी बैठकीला उपस्थित होते.

मुख्यमंत्र्यांच्या निर्देशानुसार, ॲग्रीगेटर कंपन्या चालवत असलेल्या प्रत्येक वाहनाची नोंदणी आणि त्या वाहनासाठी वापरले जाणारे पार्किंगचे ठिकाण डिजिटल स्वरूपात उपलब्ध असणे आवश्यक आहे. तसेच संबंधित चालकाची माहिती, त्याचा वाहन चालविण्याचा परवाना, पोलीस पडताळणी आणि इतर आवश्यक कागदपत्रांचा तपशीलही या प्रणालीत असावा.

दिवसभरात वेगवेगळ्या पाळ्यांमध्ये कोणता चालक कोणते वाहन चालवतो, याची अद्ययावत नोंदही या प्रणालीत ठेवावी, असे फडणवीस यांनी सांगितले. एखादी घटना घडली, तर त्या वाहनाची आणि चालकाची माहिती तातडीने मिळेल, अशी सक्षम यंत्रणा उभारावी, असेही त्यांनी निर्देशित केले.

या प्लॅटफॉर्मला कृत्रिम बुद्धिमत्तेवर आधारित विश्लेषणाची जोड द्यावी, असे मुख्यमंत्र्यांनी सांगितले. त्यातून वाहनांचे संचालन, चालकांची नियुक्ती, पार्किंगची व्यवस्था आणि प्रवाशांना दिल्या जाणाऱ्या सेवा यांवर प्रभावी नियंत्रण ठेवता येईल. वाहनांचे संचालन आणि चालकांच्या पाळ्या यांसारख्या बाबींचे विश्लेषण करून नियमांचे पालन होत आहे की नाही यावर लक्ष ठेवता येईल आणि गरज पडल्यास संबंधित यंत्रणांना तातडीने कारवाई करता येईल, असे यात अपेक्षित आहे.

प्रवास वाटपाच्या मुद्द्यावर बोलताना फडणवीस यांनी सांगितले की, ॲप आधारित सेवांमध्ये प्रवास देताना स्वतंत्र टॅक्सीचालक आणि मोठ्या फ्लीट कंपन्यांची वाहने यांना समान संधी मिळते की नाही, हे तपासण्याची गरज आहे. कोणत्या वाहनाला, कोणत्या कारणाने आणि कोणत्या निकषांवर प्रवास दिला जातो, हेही तपासता आले पाहिजे, असे ते म्हणाले. प्रवास वाटपात भेदभाव होत असेल, तर तो ओळखण्यासाठी तंत्रज्ञानाचा वापर करावा, असे निर्देशही त्यांनी दिले.

प्रवाशांना सुरक्षित आणि विश्वासार्ह सेवा मिळायला हवी, तसेच स्थानिक चालकांना रोजगाराच्या समान संधी मिळायला हव्यात, असे मुख्यमंत्र्यांनी सांगितले. त्यासाठी नियमांची प्रभावी अंमलबजावणी, पारदर्शक प्रवास वाटप आणि कंपन्यांच्या कामकाजावर तांत्रिक देखरेख यांना प्राधान्य देण्याची गरज असल्याचे त्यांनी नमूद केले.

राज्यातील ॲग्रीगेटर क्षेत्राचा विस्तार आणि प्रवाशांच्या वाढत्या गरजा लक्षात घेऊन आधुनिक तंत्रज्ञान वापरणारी, सक्षम आणि गतिमान नियामक यंत्रणा विकसित करण्याची आवश्यकता असल्याचे मुख्यमंत्र्यांनी सांगितले. स्वतंत्र टॅक्सीचालकांचे हित, प्रवाशांची सुरक्षितता आणि वाहतूक व्यवस्थेतील शिस्त यांचा समतोल राखण्यासाठी डिजिटल प्लॅटफॉर्मच्या माध्यमातून प्रभावी नियंत्रण व्यवस्था उभारण्याच्या दृष्टीने पुढील कार्यवाही करावी, असे निर्देश फडणवीस यांनी परिवहन विभागाला दिले.