अहिल्यानगर जिल्हा बँक: ८ जागा बिनविरोध, उरलेल्या १३ जागांसाठी २ नोव्हेंबरला मतदान

अहिल्यानगर जिल्हा मध्यवर्ती सहकारी बँकेची निवडणूक सर्वपक्षीय एकमताने बिनविरोध करण्याचे प्रयत्न शेवटी फसले आहेत. जिल्ह्यातील मोठ्या नेत्यांमधले अंतर्गत मतभेद, जागावाटपावरून झालेला संघर्ष आणि राजकीय प्रतिष्ठेची लढाई यामुळे निवडणुकीचे चित्र बदलले आहे.

बँकेच्या एकूण २१ जागांपैकी ८ जागा बिनविरोध झाल्या आहेत. उरलेल्या १३ जागांसाठी २ नोव्हेंबरला मतदान होईल. ३ नोव्हेंबरला मतमोजणी होऊन निकाल जाहीर होणार आहे. त्यामुळे जिल्ह्याच्या सहकार क्षेत्रात वातावरण तापले आहे.

निवडणूक बिनविरोध व्हावी म्हणून माजी खासदार यशवंतराव गडाख यांनी सर्वपक्षीय नेत्यांना एकत्र आणण्याचा प्रयत्न केला होता. राम शिंदे, पालकमंत्री राधाकृष्ण विखे पाटील आणि काँग्रेसचे ज्येष्ठ नेते बाळासाहेब थोरात यांच्यात बैठकाही झाल्या. पण जागावाटप आणि उमेदवारांची निवड यावर एकमत होऊ शकले नाही.

राम शिंदे यांनी कर्जत-जामखेडमधील आपल्या समर्थक चार उमेदवारांची नावे सोशल मीडियावर जाहीर केली. त्यामुळे विखे-थोरात गटात नाराजी निर्माण झाली. दुसरीकडे निलेश लंके यांनीही आपली स्वतंत्र राजकीय रणनीती कायम ठेवली आहे, त्यामुळे निवडणुकीतला संघर्ष आणखी तीव्र झाला आहे.

बिनविरोध निवड झालेल्यांमध्ये श्रीरामपूरमधून करण ससाणे, पाथर्डीतून आमदार मोनिका राजळे, बिगरशेती मतदारसंघातून सचिन जगताप, राहात्यातून सुजय विखे पाटील, कोपरगावमधून विवेक कोल्हे, संगमनेरमधून रंजीत देशमुख, नेवासामधून शंकरराव गडाख आणि शेवगावमधून राजश्री घुले पाटील यांचा समावेश आहे.

राहुल जगताप यांनी उपमुख्यमंत्री देवेंद्र फडणवीस यांच्याशी चर्चा केल्यानंतर माघार घेतली. त्यामुळे प्रताप पाचपुते यांचा मार्ग सोपा झाला आहे. मात्र दत्तात्रय पानसरे यांनी उमेदवारी कायम ठेवल्यामुळे या मतदारसंघातील लढतीचे चित्र अजून स्पष्ट झालेले नाही.

राजकीय संघर्षासोबतच बँकेच्या आर्थिक व्यवहारांवरही प्रश्न उपस्थित होत आहेत. बँकेकडे सुमारे १२ हजार कोटी रुपयांच्या ठेवी आहेत. जिल्ह्यातील साखर कारखान्यांना दिलेल्या कर्जाचा आकडा पावणेतीन हजार कोटी रुपयांच्या आसपास असल्याचे सांगितले जात आहे.

या कर्जापैकी किती रक्कम थकीत आहे, किती वसूल झाली आणि किती कर्ज नियमित आहे, याची पारदर्शक माहिती समोर यावी, अशी अपेक्षा व्यक्त होत आहे. संचालकपदाच्या प्रतिष्ठेच्या लढाईत शेतकरी आणि ठेवीदारांच्या हिताकडे दुर्लक्ष होऊ नये, अशी चर्चा सहकार क्षेत्रात सुरू आहे.

आता उरलेल्या १३ जागांसाठी २ नोव्हेंबरला होणाऱ्या मतदानाकडे संपूर्ण जिल्ह्याचे लक्ष लागले आहे. विखे-थोरात गटाचे वर्चस्व राहणार की शिंदे-लंके गट बाजी मारणार, याचा फैसला ३ नोव्हेंबरच्या निकालातून होणार आहे.