अहिल्यानगरमध्ये पाणी-चाऱ्याचे संकट, ९५ वर्षांचे शेतकरी सुधाकर शिंदे यांचा सरकारला इशारा

अहिल्यानगर जिल्ह्यातील ९५ वर्षांचे शेतकरी सुधाकर शिंदे यांनी दुष्काळाच्या परिस्थितीबद्दल सरकारला कडक शब्दांत इशारा दिला आहे. सरकारने वेळेवर पाणी आणि मदत दिली नाही, तर माणसं आणि गुरं-ढोरं मरून जातील, असे त्यांनी म्हटले आहे. एकीकडे सरकारी बैठका, घोषणा आणि पालकमंत्र्यांच्या आढावा बैठका सुरू आहेत, तर दुसरीकडे शेतीच्या बांधावर मात्र भयाण वास्तव आहे, असे चित्र यातून समोर आले आहे.

शिंदे सांगतात, "माझं वय ९५ वर्षे आहे, मी आतापर्यंत पाच दुष्काळ पाहिले. पण पिण्याच्या पाण्याचा आणि चाऱ्याचा असा भीषण दुष्काळ आयुष्यात कधीच पाहिला नाही." आपल्या आयुष्यात त्यांनी पाच मोठे दुष्काळ अनुभवले आहेत. जुन्या आणि आजच्या दुष्काळातला फरक सांगताना त्यांनी म्हटले की, पूर्वी दुष्काळ पडला तरी कुठे ना कुठे पिण्याच्या पाण्याची सोय असायची. आज मात्र माणसांना प्यायला पाणी नाही, आणि जनावरांना खायला चारा किंवा प्यायला पाणी काहीच उरलेले नाही. या शब्दांत त्यांनी तीव्र संताप व्यक्त केला.

सरकारकडून सध्या दुष्काळी परिस्थितीची पाहणी आणि पंचनामे केले जात असल्याचे सांगितले जाते. पण प्रत्यक्ष शेतात परिस्थिती वेगळी असल्याचे शिंदे यांचे म्हणणे आहे. सरकारी अधिकारी पिकांची नोंद घ्यायला बांधावर येतात का, असे विचारल्यावर ते म्हणाले की, अधिकारी गावात येतात, पण शेतात येत नाहीत. ते मोबाईलवर ॲपने नोंद करायला सांगतात. "आता माझ्यासारख्या ९५ वर्षांच्या वृद्धाला मोबाईल चालवता येतो का? अधिकाऱ्यांनी स्वतः रानात येऊन पिकांची पाहणी व नोंद करायला हवी," असे ते म्हणाले.

जनावरांच्या गणतीबद्दल त्यांनी सांगितले की, काल एक व्यक्ती आली होती. त्यांच्याकडे १० गुरं आहेत, त्याची नोंद करून तो म्हणाला, 'मी आजच आलोय, उद्या येणार नाही.' अशी घाईघाईची कामे करून अधिकारी निघून जातात, आणि शेतकऱ्यांच्या समस्या समजून घेण्यासाठी बांधावर कोणीही थांबत नाही, असे शिंदे यांनी सांगितले.

पावसाअभावी शेतातली पिके पूर्णपणे खलास झाली आहेत. शेतातून काढलेल्या हरभऱ्याच्या पिकातून एक-दोन पोती धान्य तर दूरच, पण जनावरांसाठी भुसासुद्धा निघत नाही, असे शिंदे यांनी सांगितले. पिके वाळून गेल्याने शेतकरी पूर्णपणे कोलमडला आहे.

जिल्ह्याचे पालकमंत्री आढावा बैठका घेऊन परिस्थिती सुरळीत असल्याचे भासवत आहेत, तर ग्रामीण भागात पाण्याचा थेंबही उपलब्ध नाही, असेही त्यांचे म्हणणे आहे. सरकारी आकडेवारी आणि बांधावरचे वास्तव यांच्यात प्रचंड दरी निर्माण झाली आहे.

सध्याची परिस्थिती अशीच राहिली आणि सरकारने तातडीने पिण्याचे पाणी, जनावरांसाठी चारा आणि आर्थिक मदत पोहोचवली नाही, तर येत्या काळात पाणी व चाऱ्याअभावी जनावरांसह माणसांचाही जीव जाईल, असा गंभीर इशारा या ९५ वर्षांच्या शेतकऱ्याने दिला आहे. या हाकेनंतर तरी शासन आणि प्रशासन जागे होऊन तातडीने मदत छावण्या आणि पाण्याचे टँकर सुरू करणार का, याकडे संपूर्ण जिल्ह्याचे लक्ष लागले आहे.