जिल्हा बँकेच्या निवडणुकीआधी राम शिंदे सोनईत, यशवंतराव गडाख यांची घेतली भेट

अहिल्यानगर जिल्हा मध्यवर्ती सहकारी बँकेच्या निवडणुकीत अर्ज मागे घेण्यासाठी उद्या शेवटचा दिवस उरलेला असतानाच राजकीय वर्तुळात खळबळ उडवणारी घडामोड समोर आली आहे. भाजपचे ज्येष्ठ नेते आणि विधानपरिषदेचे सभापती राम शिंदे थेट सोनईला पोहोचले. तिथे त्यांनी ज्येष्ठ नेते आणि माजी खासदार यशवंतराव गडाख यांची त्यांच्या निवासस्थानी भेट घेतली. ही भेट अचानक झाल्यामुळे जिल्ह्याच्या राजकीय वर्तुळात एकच खळबळ उडाली आहे.

बँक बिनविरोध होण्याच्या मार्गातील अडथळे दूर व्हावेत, यासाठी शिंदे यांनी गडाख यांना साकडं घातलं. भेटीनंतर माध्यमांशी बोलताना ते म्हणाले, "ज्येष्ठांनी आता हस्तक्षेप करावाच लागेल!" पत्रकारांशी बोलताना त्यांनी विजयादशमीच्या शुभेच्छाही दिल्या.

शिंदे म्हणाले की, अहिल्यानगर जिल्हा मध्यवर्ती बँक ही फक्त राजकारणाचा आखाडा नाही. ती शेतकरी, कारखानदार आणि लाखो सभासदांची बँक आहे. ही बँक बिनविरोध काढायची असेल तर यशवंतराव गडाखांसारख्या ज्येष्ठ नेत्यांनी मध्यस्थी केलीच पाहिजे, असे ते म्हणाले. ज्यांची चूक आहे त्यांना चूक आणि ज्यांचं बरोबर आहे त्यांना बरोबर म्हणण्याची धमक दाखवून, वडीलकीच्या नात्याने सगळ्यांना सामोपचाराचा संदेश दिला पाहिजे, असेही त्यांनी सांगितले.

दरम्यान, पालकमंत्र्यांनी आज दुपारी ३ वाजता तातडीची बैठक बोलावली आहे. त्या बैठकीआधीच शिंदे सोनईत जाऊन गडाख यांना भेटल्याने राजकीय गोटात तर्कवितर्कांना उधाण आले आहे. यावर स्पष्टीकरण देताना शिंदे म्हणाले, "पालकमंत्र्यांशी बोलून मी इथे आलेलो नाही. पण दुपारी ३ वाजता बिनविरोधच्या संदर्भात बैठक बोलावल्याचं मला समजलं. पालकमंत्र्यांचा मलाही फोन आला असून मी त्या बैठकीला नक्की जाणार आहे. पण त्याआधीच बिनविरोधचा मार्ग सुकर व्हावा म्हणून मी गडाख साहेबांची भेट घेतली."

दसऱ्याच्या पार्श्वभूमीवर ही भेट झाल्यामुळे शिंदे यांनी सूचक विधान केले. ते म्हणाले, "आज विजयादशमीचं सीमाउल्लंघन ठरवलं जाईल आणि उद्या दुपारी ३ वाजेपर्यंत जिल्हा बँकेवर कोणाचे वर्चस्व राहते आणि बँक खरोखर बिनविरोध होते की रणसंग्राम पेटतो, हे स्पष्ट होईल!"

अहिल्यानगर जिल्हा मध्यवर्ती सहकारी बँकेच्या निवडणुकीची रणधुमाळी सध्या सुरू आहे. या पार्श्वभूमीवर विधानपरिषदेचे सभापती राम शिंदे (भाजप) यांनी माजी खासदार यशवंतराव गडाख यांची भेट घेतली. शेतकऱ्यांची मोठी बँक म्हणून ओळखल्या जाणाऱ्या या बँकेत अनेक शेतकरी सभासद आहेत. आता पालकमंत्र्यांच्या दुपारी ३ वाजताच्या बैठकीत काय निर्णय होतो आणि उद्या दुपारी ३ वाजेपर्यंत कोणकोणते अर्ज मागे घेतले जातात, याकडे संपूर्ण जिल्ह्याचे लक्ष लागले आहे.