'आमने सामने' मानधन वाद: कलाकारांना वाढ मागण्याचा हक्क आहे, वंदना गुप्ते यांचे मत

मराठी रंगभूमीवर सध्या 'आमने सामने' या नाटकाची जोरदार चर्चा आहे. हे नाटक गेले काही महिने हाऊसफुल्ल चालू आहे आणि प्रेक्षकांना ते खूप आवडत आहे. पण आता नाटकाच्या पडद्यामागचा वाद समोर आला असून रंगभूमीवर दोन गट पडले आहेत. नाटकात काम करणाऱ्या दोन कलाकारांना अचानक काढून टाकल्यामुळे हा सगळा वाद सुरू झाला.

या नाटकात रोहन गुजर आणि केतकी विलास हे दोन कलाकार काम करत होते. त्यांनी निर्मात्यांकडे मानधन वाढवून मागितले होते. नाटक यशस्वी होत आहे आणि आपलीही मेहनत आहे, त्यामुळे थोडे मानधन वाढायला हवे, असे त्यांना वाटले. मात्र निर्माते लीना भागवत आणि मंगेश कदम यांनी त्यांना नाटकातून काढून टाकले. फक्त पगारवाढ मागितली म्हणून आम्हाला एका रात्रीत काढले, असा रोहन आणि केतकी यांचा आरोप आहे.

यावर लीना भागवत आणि मंगेश कदम यांनीही व्हिडिओ करून आपली बाजू मांडली. त्यांच्या म्हणण्यानुसार मानधनवाढ एकदा नव्हे, तर तीन वेळा मागण्यात आली होती. त्यामुळे नाईलाजाने हा कठोर निर्णय घ्यावा लागला, असे त्यांनी स्पष्ट केले. या आरोप-प्रत्यारोपांनंतर मराठी सृष्टीतील अनेक कलाकार आपापली मते मांडू लागले.

या प्रकरणावर ज्येष्ठ अभिनेत्री वंदना गुप्ते यांनी एक व्हिडिओ पोस्ट केला असून तो खूप व्हायरल होत आहे. त्यात त्यांनी दोन्ही बाजूंना समजावण्याचा प्रयत्न केला आहे. त्या म्हणाल्या, "लीना आणि मंगेश, मी तुमचा व्हिडिओ पाहिला. तुम्ही रडत होता ते बघून मलाही खूप वाईट वाटलं. आपण सगळे कलाकार आहोत, या परिस्थितीतून आपणही गेलो आहोत. मला आठवतंय, माझं एका प्रयोगाचे 80 रुपये मानधन होतं, ते 100 रुपये करा म्हणून मी मोहन काकांकडे 15 वेळा गेले होते. मग 100 व्या प्रयोगाला त्यांनी माझं मानधन वाढवलं."

निर्मात्यांना उद्देशून त्या पुढे म्हणाल्या, "तुम्ही दोघेही कलाकार आहात, तुम्हाला या गोष्टी समजायला हव्यात. नाटक बंद करायचं असेल तर ठीक आहे, पण अशा पद्धतीने अचानक सांगायचं की आज तुमचा शेवटचा प्रयोग आहे, हे बरोबर नाही. उद्या कोणी तुमचा असा अपमान केला तर तुम्हाला चालेल का? मंगेश, तुला चालेल का? असं करू नये."

रोहन आणि केतकी यांनाही त्यांनी सांगितले. त्या म्हणाल्या, "कलाकार म्हणून आपल्याला पगार वाढवून मागायचा पूर्ण अधिकार आहे. पण तीन-तीन वेळा वेगवेगळं मागणं हेही योग्य नाही. तुम्हीही थोडा विचार करायला हवा होता."

वंदना गुप्ते म्हणाल्या, "प्रत्येकाची गरज असते, प्रत्येकाचं स्टेटस वाढत असतं. मी स्वतः 50 वर्षे काम करूनसुद्धा मानधन वाढवून मागायला घाबरते. पण आजची नवीन मुलं आहेत, त्यांना हक्काचं मागावंसं वाटतं आणि त्यात काहीच चुकीचं नाही. प्रत्येकाला वाटतं की नाटकाला यश मिळतंय तर त्यात आपलाही वाटा आहे. पण अशी वादावादी, भांडणं बरी नाहीत."

शेवटी त्या म्हणाल्या, "मी हे एक कलाकार म्हणून बोलतेय, निर्माता म्हणून नाही. हा वाद असा वाढवू नका." त्यांच्या या रोखठोक व्हिडिओनंतर अनेक कलाकारांनी त्यांना पाठिंबा दिला आहे. तुम्ही दोन्ही बाजू अगदी योग्य पद्धतीने मांडल्या, असे अनेकांनी कमेंटमध्ये लिहिले आहे. आता हा वाद कसा मिटतो, हे पाहणे महत्त्वाचे ठरणार आहे.