शिंदे मुख्यमंत्री होणार नाहीत, असे लिहून द्या; निलेश राणे यांचे सदावर्ते यांना आव्हान

उपमुख्यमंत्री एकनाथ शिंदे हे मुख्यमंत्री होणारच नाहीत, असा दावा प्रसिद्ध वकील गुणरत्न सदावर्ते यांनी केला आहे. या दाव्यानंतर शिंदे गटाकडून सदावर्ते यांच्यावर जोरदार टीका होत आहे. शिंदे सेनेचे नेते आणि आमदार निलेश राणे यांनी तर सदावर्ते यांना थेट आव्हानच दिले आहे.

एकनाथ शिंदे मुख्यमंत्री होणार नाहीत, झाले तर मी माझी संपूर्ण प्रॉपर्टी सोडून देतो, असे लिहून द्या, असे निलेश राणे यांनी सदावर्ते यांना सांगितले आहे. त्यामुळे आता सदावर्ते हे आव्हान स्वीकारतात का, याकडे सर्वांचे लक्ष लागले आहे.

निलेश राणे यांनी मीडियाशी बोलताना सदावर्ते यांना चांगलेच घेरले. एकनाथ शिंदे 2022 मध्ये पहिल्यांदा मुख्यमंत्री झाले, असे राणे यांनी सांगितले. त्याआधीही लोक असेच म्हणायचे की शिंदे मुख्यमंत्री होणार नाहीत, पण ते झाले, असे ते म्हणाले. भविष्यवाणी सांगून महाराष्ट्र चालतो का, असा सवालही त्यांनी केला.

राणे म्हणाले की, आज त्यांच्याकडे खासदार, आमदार आणि शेकडो नगरसेवक आहेत. अशा परिस्थितीत नेता मुख्यमंत्री होणार नाही तर कधी होणार, असे त्यांनी विचारले. महाराष्ट्रात दुसऱ्या क्रमांकाचा पक्ष त्यांची शिवसेना आहे, असेही त्यांनी सांगितले. कोणी मुख्यमंत्री होणारच नाहीत असे सांगत असेल, तर त्याने तसे लिहून द्यावे आणि ते झाले नाहीत तर आमची सगळी प्रॉपर्टी सोडून देतो, असेही लिहून द्यावे, असे आव्हान राणे यांनी दिले.

एकनाथ शिंदे महाराष्ट्राचे मुख्यमंत्री व्हावेत, ही आपली इच्छा आहे, असे राणे यांनी सांगितले. शिंदे यांनी यशस्वी मुख्यमंत्री म्हणून कार्यकाळ निभावला आहे आणि त्यांना परत एकदा मुख्यमंत्री म्हणून पाहायचे आहे, असे ते म्हणाले. देवेंद्र फडणवीस वरच्या स्तरावर आहेत, असे सांगून राणे म्हणाले की, फडणवीसही माझे नेते आहेत. पण मी एक कार्यकर्ता आणि शिवसैनिक म्हणून बोलतोय, आणि शिवसैनिक म्हणून मला वाटते की शिंदे परत मुख्यमंत्री व्हावेत.

देवेंद्र फडणवीस यांना 2029 पर्यंत तरी राज्यात ठेवा, असे मनसे अध्यक्ष राज ठाकरे म्हणाले होते. त्यावरही निलेश राणे यांनी भाष्य केले. राज ठाकरे मोठे नेते आहेत, त्यांचा फार मोठा पक्ष आहे आणि त्यांच्याकडे अनेक नगरसेवक, आमदार, खासदार आहेत, असे राणे म्हणाले. इतर राज्यांमध्येही मनसे नावाची त्यांची मोठी संघटना आहे, असे सांगून भविष्यवाणी सांगायची की नाही, याचा आम्हाला विचार करावा लागेल, असा चिमटा त्यांनी काढला.

उद्धव ठाकरे यांनी निवडणूक आयोगाच्या विरोधात आंदोलन करण्याचा निर्णय घेतला आहे. त्यावरूनही राणे यांनी टीका केली. आयोगाविरोधातील आंदोलन आणि त्याची आयडिया ठाकरेंची नाही, ती अभिजीत दीपके, सौरभ दास आणि आशुतोष रांका यांची आहे, असे ते म्हणाले. यांनी ती आयडिया चोरली, असा आरोप करून त्यांच्याकडे आता काम कुठे आहे, सगळे रिकाम टेकडे आहेत, असे राणे म्हणाले.