तीन महिन्यांत राज्यात मोठ्या घडामोडी होणार, असं संजय शिरसाट म्हणाले

विधान परिषद निवडणुकीच्या निकालावरून शिंदे सेना आणि भाजप यांच्यात वाद-प्रतिवाद सुरू झाला आहे. दोन्ही पक्षांचे नेते एकमेकांवर तुटून पडले असून आरोपप्रत्यारोप चालू आहेत. त्यामुळे भाजप आणि शिंदे सेनेत बिनसल्याचं चित्र तयार झालं आहे. अशा वेळी शिंदेसेनेचे नेते आणि राज्याचे सामाजिक न्याय मंत्री संजय शिरसाट यांनी एक मोठं विधान केलं आहे. मीडियाशी बोलताना त्यांनी सांगितलं की, येत्या तीन-चार महिन्यांत राज्याच्या राजकारणात मोठ्या घडामोडी घडणार आहेत. या विधानामुळे राजकीय वर्तुळात खळबळ उडाली आहे.

शिरसाट यांच्या म्हणण्यानुसार शिवसेना आणि भाजपमध्ये कोणताही वाद नाही आणि कोणतीही धुसफूस नाही. मात्र नवनाथ बन यांनी टीका करताना पातळी पाळावी, असं ते म्हणाले. तसं झालं नाही, तर "त्याला मुख्यमंत्री देवेंद्र फडणवीस यांची मान्यता आहे का?" असा प्रश्न आम्हीही उपस्थित करू शकतो, असा संताप त्यांनी बोलून दाखवला.

पुढे बोलताना शिरसाट म्हणाले की, येत्या तीन महिन्यांत राज्यात मोठ्या घडामोडी होणार आहेत. एकनाथ शिंदे मुख्यमंत्री व्हावेत यासाठी बरीच चर्चा सुरू आहे, असंही त्यांनी सांगितलं. एकनाथ शिंदे हे कॉमन मॅन आहेत, असं शिरसाट यांनी थेटपणे म्हटलं. एवढ्यावरच न थांबता, पुढचं वर्ष हे शिवसेनेचं असेल, असंही त्यांनी म्हटलं आहे. शिरसाट यांनी उघडपणे संकेत दिल्यानं राज्याच्या राजकारणात चर्चा रंगली आहे.

दरम्यान, मुख्यमंत्री देवेंद्र फडणवीस, उद्धव ठाकरे आणि राज ठाकरे यांनी काल बंद दाराआड चर्चा केली. त्यावरून उलटसुलट चर्चा सुरू आहेत. त्यावरही शिरसाट यांनी प्रतिक्रिया दिली. ठाकरे बंधू आणि फडणवीस एका मंचावर आले, म्हणजे राज्यात नवीन राजकीय समीकरणं तयार होतील, असं म्हणणं चुकीचं आहे, असं ते म्हणाले. नेते एकमेकांना भेटत असतात, असं सांगून त्यांनी पुढे म्हटलं की, आशिष शेलार यांचं राज ठाकरे यांच्याशी काही बोलणं झालंय का, हे पाहणं महत्त्वाचं आहे.

शिंदे गटाचे आमदार संतोष बांगर यांनीही या विषयावर प्रतिक्रिया दिली. एकनाथ शिंदे हेच महाराष्ट्राचे मुख्यमंत्री व्हावेत, अशी प्रत्येक शिवसैनिकाची इच्छा आहे, असं बांगर यांनी म्हटलं आहे. आपल्यावर मंत्रिपदाची जबाबदारी दिली गेली, तर आजूबाजूच्या भागासह मराठवाड्यात शिवसेना वाढवल्याशिवाय राहणार नाही, असंही त्यांनी सांगितलं.

एकूणच, विधान परिषद निवडणुकीच्या निकालानंतर दोन्ही पक्षांतले नेते एकमेकांवर टीका करत असताना शिरसाट यांनी पुढच्या तीन-चार महिन्यांत मोठ्या घडामोडी होतील, असं सांगितलं आहे. शिवसेना आणि भाजपमध्ये वाद नसल्याचं त्यांचं म्हणणं आहे, तर एकनाथ शिंदे मुख्यमंत्री व्हावेत यासाठी चर्चा सुरू असल्याचंही त्यांनी म्हटलं आहे.