"मला कोपऱ्यात कुणी टाकलं?" दसरा मेळाव्यात भाषणानंतर शिंदे आयोजकांवर भडकले

उपमुख्यमंत्री एकनाथ शिंदे यांनी शिवसेनेच्या दसरा मेळाव्याच्या मंचावरून विरोधकांवर जोरदार टीका केली. मुंबईतील गोरेगाव येथील नेस्को सेंटरमध्ये हा दसरा मेळावा झाला. महाराष्ट्राच्या पाठीत खंजीर खुपसून मुख्यमंत्री बनलेले उबाठा हेच खरे व्होट दरोडेखोर आहेत, अशा शब्दांत शिंदे यांनी उद्धव ठाकरे यांच्यावर हल्लाबोल केला. या मेळाव्यातून त्यांनी विरोधकांचा चांगलाच समाचार घेतला.

भाषण संपल्यानंतर मात्र शिंदे आयोजकांवर चांगलेच भडकले. विरोधकांचा समाचार घेतल्यानंतर त्यांनी कार्यकर्त्यांचा निरोप घ्यायला सुरुवात केली. त्याच वेळी त्यांना मेळाव्यात एक गोष्ट खटकली आणि त्यांनी भर मंचावरून आयोजकांना कडक शब्दांत सुनावले. "अरे आयोजन कुणी केलं होतं? मला कोपऱ्यात कुणी टाकलं? पुढच्या वेळी मला लोकांच्या समोर पाहिजे, हे लक्षात ठेवा," असं म्हणत त्यांनी आयोजकांचे कान टोचले.

दसरा मेळाव्याच्या सभेत शिंदे यांनी शेतकऱ्यांना मदत पाठवली जात असल्याचा उल्लेख केला. आम्ही फक्त भाषण देणारे नाही, तर शेतकऱ्यांची चूल पेटवणारे आणि रेशन देणारे आहोत, असं ते म्हणाले. विरोधकांना त्यांनी थेट विचारलं, "तुम्ही बिस्किटचा एक पुडा तरी दिला आहे का?"

शेतकऱ्यांना दिवाळीचा शिधा देण्याचं काम सुरू केलं असल्याचंही शिंदे यांनी सांगितलं. आपल्यावर रोज टीका होते, एक दिवसही मला शिव्या दिल्याशिवाय जात नाही, पण आम्ही कामातून उत्तर देऊ, असं ते म्हणाले. शेतकऱ्यांसाठी ही मोठी घोषणा असल्याचं त्यांच्या बोलण्यातून दिसत होतं.

शिंदे यांनी काही योजनांचीही माहिती दिली. परभणीत 25 हजार शिलाई मशीनचं वाटप करण्यात आलं आहे. शेतकऱ्यांच्या मुलींना 25000 सायकलींचं वाटप केलं जाणार असून त्याचा शुभारंभ झाला आहे. शेतकऱ्याच्या मुलीचं लग्न असेल, तर त्या लेकीचं लग्न लावून देण्याची जबाबदारी आम्ही घेतली आहे, असं त्यांनी सांगितलं.

शेतकऱ्यांच्या लेकींसाठी सामूहिक विवाहसोहळे आयोजित केले जातील, अशी घोषणाही त्यांनी केली. या कामात आम्ही कुठेही मागे राहणार नाही, असं शिंदे यांनी मेळाव्यात ठामपणे म्हटलं. अशा प्रकारे विरोधकांवरील टीका, शेतकऱ्यांसाठीच्या घोषणा आणि आयोजकांना दिलेली तंबी, या तिन्ही गोष्टींमुळे शिंदे यांचं हे भाषण मेळाव्यात चर्चेचा विषय ठरलं.