प्रशांत किशोर यांच्या टीमची पार्थ पवार यांच्यासोबत ४ तास बैठक, सूत्रांची माहिती

राष्ट्रवादी काँग्रेस पक्षाच्या आगामी वाटचालीच्या संदर्भात शुक्रवारी एक महत्त्वाची बैठक झाली. राजकीय रणनीतीकार प्रशांत किशोर यांच्या टीमची खासदार पार्थ पवार यांच्यासोबत ४ तास मॅरेथॉन बैठक सुरू होती. प्रशांत किशोर हे या बैठकीला ऑनलाइन उपस्थित होते, अशी माहिती सूत्रांकडून मिळत आहे.

सूत्रांकडून मिळालेल्या माहितीनुसार, महायुतीत शिवसेना आणि भाजप यांच्यासोबत कशा प्रकारे समन्वय साधायचा आणि त्यात पक्षाची भूमिका काय असावी, यावर बैठकीत चर्चा झाली. तसेच सोशल मीडिया आणि माध्यमांशी संवाद साधताना समन्वयाची जबाबदारीही सोपवण्यात आली आहे, असे सांगितले जात आहे.

पक्षाकडून आमदार शिवाजीराव गर्जे यांच्यावर दोन कामांची जबाबदारी सोपवण्यात आल्याची माहिती समोर येत आहे. त्यातील पहिले काम म्हणजे प्रशांत किशोर यांच्या टीमसोबत चर्चा करणे आणि दुसरे म्हणजे त्या टीमची आर्थिक बाजू सांभाळणे.

मागील ४ महिने प्राथमिक तत्त्वावर सुरू असलेले काम आता प्रशांत किशोर यांची टीम पूर्णपणे पाहणार आहे. यासाठी नुकतीच पक्षाकडून एक मोठी रक्कम प्रशांत किशोर यांच्या टीमला वर्ग करण्यात आल्याची माहितीही सूत्रांकडून मिळत आहे.

म्हणजेच आता राष्ट्रवादी अजित पवार गटाचे काम प्रशांत किशोर यांची टीम पाहणार असल्याची माहिती समोर येत आहे. त्यामुळे आगामी काळात राष्ट्रवादी काँग्रेस पक्षाची वाटचाल कशी असणार, पक्षांतर्गत कोणते बदल केले जाणार आणि महायुती म्हणून कोणते निर्णय घेतले जाणार, हे पाहणे महत्त्वाचे ठरणार आहे.

गेल्या काही दिवसांपासून दोन्ही राष्ट्रवादींच्या विलीनीकरणाची चर्चा मधून मधून सुरूच आहे. मात्र राष्ट्रवादी अजित पवार गट आणि राष्ट्रवादी शरद पवार गट, या दोन्ही बाजूंकडून अद्याप कोणतीही स्पष्ट भूमिका घेण्यात आलेली नाही. एकीकडे विलीनीकरणाची चर्चा सुरू असतानाच दुसरीकडे अजित पवार गटाचे काम प्रशांत किशोर यांची टीम पाहणार असल्याची माहिती पुढे आली आहे.

या पार्श्वभूमीवर राजकीय रणनीतीकार प्रशांत किशोर यांच्या टीमची आणि खासदार पार्थ पवार यांची ४ तास मॅरेथॉन बैठक झाली, अशी माहिती आता समोर येत आहे. बैठकीत काय ठरले, याबद्दल सूत्रांकडून मिळालेली माहिती वर दिल्याप्रमाणे आहे.