शिरढोणमध्ये नैना भागाच्या विकासकामांचे भूमिपूजन, १५ लाख रोजगारांचे फडणवीसांचे उद्दिष्ट

नैना (नवी मुंबई विमानतळ प्रभाव अधिसूचित क्षेत्र) भागाच्या नियोजित विकासातून सुमारे १५ लाख नोकऱ्या निर्माण करण्याचे उद्दिष्ट आहे. त्यातल्या पाच लाख नोकऱ्या जास्त पगाराच्या असतील. या विकासातून तयार होणाऱ्या संधींमध्ये भूमिपुत्रांना प्राधान्य दिले जाईल, असे मुख्यमंत्री देवेंद्र फडणवीस यांनी सांगितले.

शेतकऱ्यांचा विश्वास जिंकून आणि त्यांना विकासात भागीदार करून 'तिसरी मुंबई' आधुनिक पायाभूत सुविधा आणि चांगल्या दळणवळण व्यवस्थेच्या जोरावर महाराष्ट्राच्या विकासाचे नवे ग्रोथ इंजिन ठरेल, असेही फडणवीस म्हणाले.

पनवेल तालुक्यातील शिरढोण येथे नैना भागातील विकासकामांचे भूमिपूजन झाले. नवी मुंबई आंतरराष्ट्रीय विमानतळाच्या पूर्वेकडील जोडणीसाठी उभारलेले SBR-9, BR-4, BR-5 आणि उरण बायपास पूल या महत्त्वाच्या प्रकल्पांचे उद्घाटनही मुख्यमंत्री फडणवीस यांनी केले. याच कार्यक्रमात त्यांनी जमीन मालकांना मालमत्तेची कागदपत्रेही वाटली. ते त्या वेळी बोलत होते.

कार्यक्रमाला उपमुख्यमंत्री एकनाथ शिंदे, उपमुख्यमंत्री सुनेत्रा अजित पवार, पालकमंत्री भरत गोगावले, जिल्हा परिषद अध्यक्ष मंगेश वाकडिकर, खासदार श्रीरंग बारणे, सुनील तटकरे, अतुल पाटील, माजी खासदार रामशेठ ठाकूर, आमदार निरंजन डावखरे, अनिकेत तटकरे, ज्ञानेश्वर म्हात्रे, विक्रांत पाटील, प्रशांत ठाकूर, रवींद्र पाटील, महेश बालदी, महेंद्र दळवी, पनवेल महानगरपालिकेचे महापौर नितीन पाटील, जिल्हाधिकारी किशन जावळे, मुख्य कार्यकारी अधिकारी नेहा भोसले, सिडकोचे उपाध्यक्ष व व्यवस्थापकीय संचालक अश्विन मुद्गल, सह व्यवस्थापकीय संचालक शांतनु गोयल, राजा दयानिधी, गणेश देशमुख, मुख्य प्रशासकीय अधिकारी सुरेश मेंगडे आदी उपस्थित होते.

फडणवीस म्हणाले की नवी मुंबई आंतरराष्ट्रीय विमानतळ हे फक्त एक विमानतळ नाही, तर संपूर्ण परिसराच्या आर्थिक विकासाला चालना देणारा महत्त्वाचा घटक आहे. विमानतळाच्या प्रभाव क्षेत्राचा नियोजनबद्ध आणि वेळेत विकास व्हावा म्हणून एकात्मिक विकास आराखडा तयार केला जात आहे. नगर रचना योजनेतून हा भाग नियोजित पद्धतीने विकसित केला जात आहे. या नियोजनबद्ध विकासामुळे रोजगारनिर्मितीला आणखी चालना मिळत आहे.

जमिनीशी संबंधित कागदपत्रे जमीन मालकांच्या हातात दिल्यानंतरच विकासकामांचे भूमिपूजन करायचे, असा निर्णय घेण्यात आला होता. त्यानुसार गावानुसार मोजणी, भूखंडांची ओळख, मालकी हक्काच्या नोंदी आणि आवश्यक कागदपत्रे तयार करण्याची प्रक्रिया पुढे नेली जात आहे. जमीन मालकांच्या अडचणी सुटेपर्यंत राज्य सरकार त्यांच्या पाठीशी उभे राहील, असा विश्वासही मुख्यमंत्र्यांनी दिला.

नैना भागाचा विकास म्हणजे फक्त रस्ते, इमारती आणि शहरी वसाहती उभारणे नव्हे, तर रोजगार, पाणीपुरवठा आणि इतर मूलभूत सुविधा देणेही आहे. एज्युसिटी, मेडिसिटी, स्पोर्ट्स सिटी, एरोसिटी आणि नॉलेज सिटी अशा संकल्पनांमधून या भागात अनेक प्रकारच्या आर्थिक आणि सामाजिक संधी निर्माण केल्या जातील. नैना भाग मुंबई, नवी मुंबई, रायगड, ठाणे आणि पालघर परिसराच्या विकासाला नवी दिशा देईल, असा विश्वासही फडणवीस यांनी व्यक्त केला.

महाराष्ट्रात मुंबई महानगर क्षेत्राबरोबरच पुणे, छत्रपती संभाजीनगर आणि नागपूर अशी अनेक विकास केंद्रे उभी राहत आहेत. त्याच आधारावर येत्या काळात ठाणे, नवी मुंबई, रायगड आणि पालघर हे भाग राज्याच्या आर्थिक विकासाचे महत्त्वाचे इंजिन ठरतील. हा विकास भूमिपुत्रांना सोबत घेऊन आणि त्यांच्या हिताचे रक्षण करून केला गेला आहे.