वेगाने उभ्या राहणाऱ्या पायाभूत सुविधांमुळे 'मुंबई इन 59 मिनिटे' संकल्प साकार: फडणवीस

मुंबई महानगर प्रदेशात महापालिकेच्या माध्यमातून पायाभूत सुविधा वेगाने उभ्या राहत आहेत. या सुविधांमुळे मुंबई महानगर प्रदेशात पोहोचण्यासाठीचा 'मुंबई इन 59 मिनिटे' हा संकल्प पूर्ण होत असल्याचा विश्वास मुख्यमंत्री देवेंद्र फडणवीस यांनी व्यक्त केला. प्रदेशात सुरू असलेल्या 'मल्टी-मॉडल कनेक्टिव्हिटी'च्या कामांमुळे जलद कनेक्टिव्हिटी मिळेलच, शिवाय नागरिकांच्या 'ईज ऑफ लिव्हिंग'मध्येही चांगली सुधारणा होईल, असे फडणवीस यांनी सांगितले.

मुंबई महापालिकेच्या एन विभागातील विद्याविहार रेल्वे स्टेशनवरील पूल, शिव रेल्वे स्टेशनवरील उड्डाणपूल आणि गोरेगाव मुलुंड लिंक रोड प्रकल्पांतर्गत गोरेगाव ईस्टमधील रत्नागिरी जंक्शन ते चित्रनगरी उड्डाणपूल यांचे उद्घाटन फडणवीस यांनी ऑनलाइन केले. विद्याविहारचा पूल लाल बहादुर शास्त्री मार्ग आणि रामचंद्र चेंबूरकर मार्ग यांना जोडतो.

विद्याविहारमधील कार्यक्रमाला पुण्याहून उपमुख्यमंत्री सुनेत्रा अजित पवार, कौशल्य विकास मंत्री मंगलप्रभात लोढा, सांस्कृतिक कार्यमंत्री अॅड. आशीष शेलार, आमदार राजहंस सिंह, पराग शाह, महापौर रितू तावडे, उपमहापौर संजय घाडी आणि लोकप्रतिनिधी उपस्थित होते.

मुंबई महानगरात उत्तर-दक्षिण आणि पूर्व-पश्चिम अशी सहज कनेक्टिव्हिटी देणारी यंत्रणा उभारली जात असल्याचे फडणवीस यांनी सांगितले. विद्याविहार, गोरेगाव ईस्ट आणि शिव येथील तिन्ही पूल प्रकल्प धोरणात्मकदृष्ट्या महत्त्वाचे आहेत. त्यामुळे मुंबईकरांचा प्रवास सोपा होईल. पूर्व-पश्चिम कनेक्टिव्हिटीसाठी गोरेगाव मुलुंड लिंक रोड (GMLR) हा अतिशय गरजेचा प्रकल्प आहे, असेही ते म्हणाले.

विद्याविहार रेल्वे स्टेशनवरील पूल पूर्वेला रामचंद्र चेंबूरकर मार्गाला आणि पश्चिमेला लाल बहादुर शास्त्री मार्गाला जोडतो. या भागातून प्रवास करायला आधी सुमारे 30 मिनिटे लागायची. आता तेच अंतर 10 मिनिटांत पार करता येईल. त्यामुळे घाटकोपर स्टेशनजवळील उड्डाणपुलावरचा वाहतुकीचा भारही कमी होण्यास मदत होईल.

गोरेगाव ईस्टमध्ये रत्नागिरी हॉटेल जंक्शन परिसरातील उड्डाणपूल आणि एलिव्हेटेड सर्क्युलर रोड प्रकल्पाची रचना प्रभावी पद्धतीने केली आहे. हा प्रकल्प रत्नागिरी हॉटेल जंक्शन आणि आजूबाजूच्या चौकांतील वाहतूक कोंडी कमी करेल आणि वाहतूक सुरळीत करेल. पूर्व-पश्चिम कनेक्टिव्हिटी वाढवण्यासाठीही तो उपयोगी पडेल.

शिव रेल्वे स्टेशनवरील जुना पूल 112 वर्षे जुना होता आणि असुरक्षित होता. नवा पूल वाहतुकीसाठी उपयोगी ठरेलच, शिवाय पाचव्या आणि सहाव्या रेल्वे लाइनचे काम सुरू करणेही त्यामुळे शक्य होईल. या लाइन पूर्ण झाल्यावर लोकल ट्रेनची संख्या आणि फ्रिक्वेन्सी वाढवता येईल आणि प्रवाशांना त्याचा मोठा फायदा होईल, असे मुख्यमंत्र्यांनी सांगितले.