नैना परिसरातील शेतकऱ्यांना फडणवीसांची ग्वाही: प्रश्न सुटेपर्यंत तिघेही सोबत

मुख्यमंत्री देवेंद्र फडणवीस यांनी नैना प्रकल्पातील शेतकऱ्यांना मोठा शब्द दिला आहे. आपला प्रश्न सुटेपर्यंत आम्ही तिघेही तुमच्यासोबत आहोत, अशी ग्वाही त्यांनी दिली. नुकत्याच केलेल्या या विधानात त्यांनी या परिसराच्या विकासाबद्दलही सविस्तर मांडणी केली.

फडणवीस म्हणाले की, ज्यावेळी विमानतळ उभे राहते, तेव्हा ते आर्थिक चालना देणारे विमानतळ बनते. पण योग्य विकास आपण केला नाही, तर विकास तर होईल, मात्र तो बकाल होईल. या सगळ्या परिसराचा मोठ्या प्रमाणात अस्ताव्यस्त विकास होईल. म्हणूनच नैना प्रकल्प या भागात आणायचा आणि त्यासाठी आम्ही काम सुरू केले, असे त्यांनी सांगितले.

एकनाथ शिंदे यांनी मुख्यमंत्री आणि अर्बन डेव्हलपमेंट मंत्री म्हणून याला मान्यता दिली होती. तरीही काम का होत नाही, हे आम्ही समजून घेतले, असे फडणवीस यांनी सांगितले. आताही चाळीस टक्के जागा देणार आहेत. मात्र कुठे देणार हे शेतकऱ्यांना माहिती नव्हते, त्यामुळे त्यांच्या मनात भीती होती. म्हणून सिडकोला अधिकार दिले आहेत की अंतिम आराखड्यात करेक्शन करून तो पुन्हा सादर करावा.

ज्या दिवशी शेतकऱ्यांना त्यांच्या जमिनीचे कागद देऊ, तेव्हाच याचे भूमिपूजन होणार, असे ठरले होते आणि तेच आम्ही केले, असेही ते म्हणाले. येथील दोन्ही आमदार पाठपुरावा करणारे आमदार आहेत, असे त्यांनी नमूद केले. सिडकोचे अभिनंदन करताना ते म्हणाले की, सिडकोने नैना वर पुस्तक काढले आहे आणि त्यात सर्व गोष्टींची माहिती आहे.

काही प्रमाणात अडचणी येतात, ही गोष्ट खरी आहे, असे फडणवीस यांनी मान्य केले. दोन वर्षे या अडचणी होत्या, पण त्या मी आणि शिंदे साहेबांनी एका बैठकीत सोडवल्या आहेत, असे त्यांनी सांगितले. निर्माण झालेल्या संधीवर पहिला अधिकार भूमिपुत्रांचा असला पाहिजे, असेही ते म्हणाले.

तिसरी मुंबई हे महाराष्ट्राचे ग्रोथ इंजिन म्हणून काम करेल, असे सांगून ते म्हणाले की, महाराष्ट्र हे एकमेव राज्य आहे ज्यात आपण वेगवेगळे ग्रोथ इंजिन तयार केले आहेत. त्यात सर्वात जास्त ग्रोथ इंजिन म्हणून ठाणे, रायगड, नवी मुंबई आणि पालघर हे आहेत.

नवी मुंबई विमानतळावर मुंबईहून येताना वरळी ते अटल सेतू इथपर्यंत एकही सिग्नल नसणार, म्हणजेच प्रवास सिग्नलेस होणार आहे, असे त्यांनी सांगितले. वेगवेगळे प्रकल्प एकत्र करून या भागातील सर्व ठिकाणी पिण्याचे पाणी पोहोचवण्यापर्यंत भविष्यात प्रयत्न करणार आहोत, असेही फडणवीस म्हणाले.