उच्च न्यायालयाच्या निर्देशानंतरही बीएमसीकडून दिया मिर्झाचा व्हिडीओ अपलोड नाही, स्थायी समितीत मुद्दा उपस्थित

मुंबई उच्च न्यायालयाने बृहन्मुंबई महानगरपालिकेला (बीएमसी) अभिनेत्री दिया मिर्झाचा दिवाळीचा व्हिडीओ पुन्हा पोस्ट करण्याचे निर्देश दिले असतानाही महापालिकेने तो अजून अपलोड केलेला नाही. हा व्हिडीओ आधी महापालिकेनेच डिलिट केला होता. त्यामुळे विरोधक आक्रमक झाले आहेत. आज होणाऱ्या स्थायी समितीच्या बैठकीत हा मुद्दा उपस्थित केला जाण्याची शक्यता आहे.

मुंबईतील वाढत्या प्रदूषणाबद्दल लोकांमध्ये जनजागृती करण्यासाठी महापालिकेने एक मोहीम आयोजित केली आहे. या मोहिमेसाठी दिया मिर्झा आणि क्रिकेटपटू अजिंक्य रहाणे यांच्यासह अनेक नामवंत व्यक्तींची निवड करण्यात आली होती. सार्वजनिक रस्त्यांवर फटाके फोडू नयेत, असे न्यायालयाचे निर्देश आहेत, आणि त्याबद्दल जनजागृती करण्यासाठी बीएमसीने दिया मिर्झाची मदत घेतली होती. फटाके न फोडण्याचे आवाहन करणारा आणि दिवाळीच्या शुभेच्छा देणारा तिचा व्हिडीओ महापालिकेच्या ट्विटर हँडलवर पोस्ट करण्यात आला.

त्यावरून मोठा गदारोळ झाला आणि दिया मिर्झाला जबरदस्त ट्रोल करण्यात आले. भाजपचे मुंबई प्रदेशाध्यक्ष अमित साटम यांनी या व्हिडीओवर नाराजी व्यक्त केली. दिवाळी कशी साजरी करावी हे शिकण्यासाठी आपल्याला दिया मिर्झाची गरज नाही, असे साटम यांनी म्हटले. साटम यांनी ट्विटरवर केलेल्या पोस्टनंतर महापालिकेने हा व्हिडीओ डिलिट केला. त्यानंतर भाजपच्या अनेक नेत्यांनी तिच्यावर टीका केली.

या प्रकरणाची उच्च न्यायालयाने गंभीर दखल घेतली. न्यायमूर्ती गिरीश कुलकर्णी आणि न्यायमूर्ती डॉ. नीला गोखले यांच्या खंडपीठाने नोंदवले की, काही राजकीय नेत्यांच्या वक्तव्यांमुळे आपण अस्वस्थ आहोत. "भारत हा धर्मनिरपेक्ष देश आहे...", असे स्पष्ट करत खंडपीठाने राजकीय नेत्यांना सुनावले. तसेच भाजप नेत्यांनी आक्षेप घेतल्यानंतर बीएमसीने आपल्या सोशल मीडिया अकाउंटवरून हटवलेला व्हिडीओ पुन्हा सोशल मीडियावर अपलोड करण्याचे निर्देश खंडपीठाने दिले.

मात्र न्यायालयाच्या निर्देशांनंतरही महापालिकेकडून व्हिडीओ अपलोड करण्यात आलेला नाही. काँग्रेससह विरोधी पक्ष यावरून प्रशासनाला धारेवर धरण्याची तयारी करत आहेत. स्थायी समितीची बैठक आज होणार आहे आणि त्यात दिया मिर्झाच्या व्हिडीओवरून जोरदार गदारोळ होण्याची शक्यता आहे.

या वादावर मुख्यमंत्री देवेंद्र फडणवीस यांनी आपली भूमिका मांडली आहे. दिया मिर्झा देशाच्या मोठ्या नेत्या नाहीत, कोणाला फटकारले गेले नसेल आणि मुळात हे प्रकरण न्यायालयात गेलेच नाही, असे फडणवीस यांनी म्हटले आहे.