उत्तर प्रदेशात काँग्रेसची सपाकडे 200 हून अधिक जागांची मागणी, यादी सादर

नवी दिल्ली : उत्तर प्रदेश विधानसभा निवडणूक जवळ येत असताना सर्वच पक्ष जागावाटपाच्या चर्चेत गुंतले आहेत. समाजवादी पक्ष आणि काँग्रेस यांच्यात या विषयावर बोलणी सुरू झाल्याचे सांगितले जाते. समाजवादी पक्षाशी युती करून 200 हून अधिक जागा लढवण्याचा काँग्रेसचा विचार आहे. सूत्रांच्या माहितीनुसार, काँग्रेसने 200 हून अधिक जागांची यादी समाजवादी पक्षासमोर ठेवली असून त्या जागांवर आपला हक्क सांगितला आहे.

या मागणीमागे 2024 च्या लोकसभा निवडणुकीची कामगिरी आहे. त्या निवडणुकीत काँग्रेसने समाजवादी पक्षासोबत युती करून लढत दिली आणि पक्षाची कामगिरी चांगलीच सुधारली. विधानसभा मतदारसंघांचा हिशोब मांडला, तर काँग्रेस 38 मतदारसंघांत आघाडीवर होती आणि आणखी 42 ठिकाणी दुसऱ्या क्रमांकावर राहिली. या सर्व 80 जागा पक्षाने आपल्या 'इच्छासूची'मध्ये टाकल्या आहेत.

या यादीत अजय राय, अजय लल्लू, सुप्रिया श्रीनाते आणि नदीम जावेद यांसारख्या प्रमुख नेत्यांशी संबंधित जागांचाही समावेश आहे. याशिवाय अमेठी, रायबरेली आणि सहारनपूर येथील काही जागा सध्या समाजवादी पक्षाच्या आमदारांकडे आहेत. त्यांवरही दावा करण्याची काँग्रेसची तयारी असल्याचे सांगितले जाते.

काँग्रेसने लोकसभा निकालांच्या आधारे जागांची वर्गवारी केली आहे. त्यासाठी 'अ', 'ब', 'क' आणि 'ड' अशा श्रेणी तयार केल्या आणि त्यानुसार जागा ठरवल्या. ज्या ठिकाणी विधानसभेपेक्षा लोकसभेत काँग्रेसची कामगिरी चांगली झाली, अशा जागा यात धरल्या आहेत. संघटना उभारणीच्या उपक्रमातून जमिनीवरची पक्षाची ताकद आणखी वाढली आहे, असा काँग्रेसचा दावा आहे. त्यामुळे 200 हून अधिक जागांवर आपली मागणी असायला हवी, असे पक्षाचे म्हणणे आहे.

लोकसभेत उत्तर प्रदेशात काँग्रेसला चांगले यश मिळाले होते आणि मतांची टक्केवारीही वाढली. त्या वेळी पक्षाची समाजवादी पक्षाशी आघाडी होती. मात्र अलीकडच्या विधानसभा निवडणुकांमध्ये काँग्रेसने मित्रपक्षांपासून अंतर ठेवून स्वतंत्रपणे निवडणुका लढवल्या आहेत. त्यामुळे या वेळी काँग्रेस आणि समाजवादी पक्षाची आघाडी होते का, याकडे सगळ्यांचे लक्ष लागले आहे.

काँग्रेसच्या सरचिटणीस प्रियांका गांधी यांनी नुकतीच जागावाटपाबाबत उत्तर प्रदेशातील काँग्रेस नेत्यांसोबत तीन तास बैठक घेतली होती. सूत्रांच्या म्हणण्यानुसार, समाजवादी पक्षाचे प्रमुख अखिलेश यादव यांच्याशी होणाऱ्या वाटाघाटींमध्ये प्रियांका गांधी यांची भूमिका महत्त्वाची ठरू शकते. 2022 च्या निवडणुका काँग्रेसने एकट्याने लढवल्या आणि फक्त दोन जागा जिंकल्या होत्या.

आकड्यांकडे पाहिले तर विधानसभेच्या एकूण 403 जागा आहेत. त्यापैकी निम्म्या म्हणजे 50 टक्के जागा काँग्रेसने मागितल्या आहेत. प्रभारी राजेंद्र पाल गौतम यांनी समाजवादी पक्षाला 175 ते 200 जागांची यादी दिली आहे. 2024 मध्ये काँग्रेसचे 6 खासदार निवडून आले, तर 2022 मध्ये फक्त 2 आमदार जिंकले होते. आता 200 आमदारांचे स्वप्न पक्ष पाहत आहे. समाजवादी पक्षाचे म्हणणे आहे की, जिंकण्याची क्षमता हाच निकष राहील.

अंतिम सूत्र काय असू शकते, याचीही चर्चा आहे. काँग्रेसची मागणी 175 ते 200 जागांची, म्हणजे 50 टक्के आहे. समाजवादी पक्षाची ऑफर 60 ते 70 जागांची, म्हणजे 15 ते 17 टक्के आहे. मधला मार्ग 100 ते 110 जागांचा, म्हणजे सुमारे 25 टक्के असू शकतो आणि त्यावर तोडगा निघण्याची शक्यता सांगितली जाते. 2024 च्या लोकसभेत 80 पैकी 17 जागा काँग्रेसने लढवल्या होत्या, म्हणजे 21 टक्के. त्याच प्रमाणात 403 पैकी 100 जागा म्हणजे 25 टक्के होतात.