व्हॉट्सॲप चॅटमध्ये येणार इंस्टाग्राम रिल्सचा नवा शॉर्टकट, रिल्स शेअर करणे होणार सोपे

व्हॉट्सॲप आपल्या यूजर्ससाठी एक नवे फीचर आणत आहे. या फीचरमुळे व्हॉट्सॲप चॅटमध्ये इंस्टाग्राम रिल्स शेअर करण्याचा अनुभव अधिक चांगला होणार आहे. त्यासाठी चॅटच्या अटॅचमेंट मेन्यूमध्ये एक शॉर्टकट जोडला जाणार आहे. या नव्या शॉर्टकटच्या मदतीने यूजर्स थेट आणि वेगाने रिल्स शेअर करू शकतील.

चॅटमध्ये यूजर्सना एक रिल्स बटन दिले जाणार असल्याचे सांगितले जात आहे. या बटनवर टॅप केल्यावर यूजर्सना अलीकडे पाहिलेल्या, सेव्ह केलेल्या आणि लाईक केलेल्या रिल्स ब्राऊझ करता येणार आहेत. हे फीचर सध्या सगळ्यांसाठी नाही, तर निवडक बीटा यूजर्ससाठी रोलआऊट केले जात आहे.

गूगल प्ले स्टोअरवरून व्हॉट्सॲप बेटा फॉर अँड्रॉईड वर्जन 2.26.42.9 डाऊनलोड केलेल्या यूजर्सना हा पर्याय मिळणार आहे. चॅटमध्ये दिसणारे हे नवे रिल्स बटन यूजरला थेट त्याच्या इंस्टाग्राम ॲक्टिव्हिटीवर घेऊन जाईल. तिथे अलीकडे पाहिलेल्या सर्व रिल्स दिसतील आणि लाईक केलेल्या तसेच सेव्ह केलेल्या रिल्सही दिसतील. यापैकी कोणत्याही सेक्शनमध्ये जाऊन रिल निवडली की ती थेट व्हॉट्सॲप चॅटमध्ये पाठवता येईल.

हे बटन वापरायचे असेल तर यूजरचे व्हॉट्सॲप अकाऊंट मेटाच्या अकाऊंट सेंटरला लिंक असणे गरजेचे आहे. एखादा यूजर आपले व्हॉट्सॲप अकाऊंट इंस्टाग्राम आणि फेसबुकपासून वेगळे ठेवत असेल, तर तो अकाऊंट लिंक न करता पूर्वीप्रमाणेच ॲप वापरून रिल्स शेअर करू शकतो. मात्र अशा यूजर्सना चॅट अटॅचमेंट मेन्यूमध्ये रिल्स बटन दिसणार नाही.

व्हॉट्सॲपवर आधीपासूनच मीडिया पिकरमधून इंस्टाग्राम आणि फेसबुकच्या स्टोरीज, पोस्ट्स आणि रिल्स शेअर करण्याची सुविधा आहे. पण त्यासाठी यूजरला आधी पिकर उघडावा लागतो आणि मग वेगवेगळे पर्याय निवडावे लागतात. नव्या शॉर्टकटमध्ये मात्र रिल्ससाठी अटॅचमेंट मेन्यूतच वेगळे बटन दिसणार आहे. त्यामुळे जास्तीच्या स्टेप्स न करता एका क्लिकमध्ये व्हिडीओ शेअर करता येईल.

हे फीचर व्हॉट्सॲप बेटा फॉर अँड्रॉईड वर्जन 2.26.42.9 मध्ये आढळले आहे. सध्या ते काही बीटा टेस्टर्सनाच उपलब्ध करण्यात आले आहे. इतर यूजर्सना हे फीचर कधी रोलआऊट केले जाणार, याबाबत अजून काहीही माहिती देण्यात आलेली नाही.