अनोळखी कॉल उचलण्यापूर्वीच कळणार कारण, व्हॉट्सॲपचे नवे फीचर येण्याची शक्यता

व्हॉट्सॲप एका नवीन फीचरवर काम करत असल्याची माहिती समोर आली आहे. अनोळखी नंबरवरून कॉल आला, तर व्हॉट्सॲप स्वतःच आधी समोरच्या व्यक्तीला विचारेल की फोन का केला जात आहे. हे फीचर लवकरच रोलआऊट होण्याची शक्यता आहे.

व्हॉट्सॲप नेहमीच आपल्या कोट्यवधी यूजर्सची प्रायव्हसी आणि कॉलिंगचा अनुभव अधिक चांगला व्हावा, यासाठी नवनवी अपडेट्स आणि फीचर्स घेऊन येत असते. काही काळापूर्वी कंपनीने सायलेंट अननोन कॉलर्ससारखे फीचर सादर केले होते. आता तेच फीचर आणखी अपग्रेड करण्याचा कंपनीचा विचार आहे.

नव्या फीचरमुळे यूजर्सना कॉल करणाऱ्याने दिलेल्या उत्तराचे ट्रांसक्रिप्ट वाचता येईल आणि तो कॉल घेणे गरजेचे आहे की नाही, हे ठरवता येईल. अलीकडे समोर आलेल्या काही रिपोर्ट्नुसार हे फीचर सध्या अँड्रॉईड ॲपमध्ये डेव्हलप केले जात आहे. ते व्हॉट्सॲपच्या कॉल फिल्टरिंग सिस्टिमचा एक भाग बनू शकते. अजून हे फीचर बीटा टेस्टर्ससाठीही उपलब्ध करण्यात आलेले नाही. कंपनीने त्याची रिलीज डेटही अजून जाहीर केलेली नाही.

रिपोर्ट्समध्ये असे सांगितले आहे की, व्हॉट्सॲपच्या प्रायव्हसी सेक्शनमधील कॉल फिल्टरिंग मेन्यू एका नव्या पर्यायासह बदलला जाऊ शकतो. त्यात यूजर्सना तीन पर्याय मिळू शकतात. ते तीन पर्याय म्हणजे नेव्हर, सायलेंस आणि आस्क फॉर कॉलिंग.

पहिला पर्याय आहे 'नेव्हर'. हा पर्याय निवडला की कॉल फिल्टरिंग पूर्णपणे बंद राहील आणि सगळे कॉल नेहमीसारख्या सामान्य पद्धतीनेच येतील.

दुसरा पर्याय आहे 'सायलेंस'. हा पर्याय निवडल्यास अनोळखी नंबरवरून येणाऱ्या कॉलची रिंगटोन बंद राहील. मात्र त्या कॉलचे डिटेल्स कॉल्स टॅबमध्ये आणि नोटिफिकेशनमध्ये दिसतील.

तिसरा पर्याय आहे 'आस्क फॉर कॉलिंग'. हा पर्याय निवडल्यानंतर अनोळखी नंबरवरून कॉल करणाऱ्या व्यक्तीला व्हॉट्सॲप कॉलिंगचे कारण विचारेल. त्या व्यक्तीकडून प्रतिसाद मिळाला की, यूजर तो कॉल स्वीकारायचा की नाकारायचा, हे ठरवू शकतील.

इतकेच नाही, तर या फीचरमध्ये कॉल करणाऱ्याने दिलेल्या उत्तराचे टेक्स्ट ट्रांसक्रिप्टही दिसणार आहे. त्यामुळे यूजर्सना फोन न उचलताच, आलेला कॉल एखाद्या महत्त्वाच्या विषयासाठी आहे की नाही, हे ठरवता येईल.