व्हॉट्सॲप बिझनेसवर काही मेसेजसाठी आता पैसे मोजावे लागणार, 1 ऑक्टोबरपासून मेटाचे नवे दर

व्हॉट्सॲप बिझनेस प्लॅटफॉर्म वापरणाऱ्या कंपन्यांसाठी एक महत्त्वाची बातमी आहे. मेटाने या प्लॅटफॉर्मच्या प्राईझिंगमध्ये बदल करण्याचा निर्णय घेतला असून तो 1 ऑक्टोबरपासून लागू होणार आहे. म्हणजेच, आतापर्यंत जे मेसेज कंपन्या मोफत पाठवत होत्या, त्यांपैकी काहींसाठी आता कंपन्यांना पैसे भरावे लागतील.

सध्याची पद्धत अशी आहे की, ग्राहकाचा मेसेज आल्यानंतर 24 तासांत कंपनी त्याला मोफत उत्तर पाठवू शकते. प्रोडक्ट्स किंवा ऑर्डरबद्दलच्या प्रश्नांना उत्तरे देणे, तसेच ऑर्डर कन्फर्मेशन आणि डिलिव्हरी अपडेट्स पाठवणे, हे सगळे यात बसत होते. थोडक्यात, कंपन्या ग्राहकांच्या मेसेजला उत्तर आणि ऑर्डर अपडेट्स पूर्णपणे मोफत पाठवू शकत होत्या.

1 ऑक्टोबरपासून हे चित्र बदलणार आहे. ऑर्डर कन्फर्मेशन आणि डिलिव्हरी अपडेट्ससारख्या यूटिलिटी मेसेजेससाठी मेटा पैसे आकारणार आहे. म्हणजेच 24 तासांत पाठवल्या जाणाऱ्या ऑर्डर अपडेट्ससाठी आणि इतर यूटिलिटी मेसेजेससाठी कंपन्यांना आता पैसे मोजावे लागतील. एका मर्यादेपर्यंत मेसेज मोफत असणार आहेत. ग्राहकांच्या प्रश्नांना उत्तर देण्यासाठी प्रत्येक व्यावसायिक फोन नंबरमागे पहिले 1,000 सर्विस मेसेजेस मोफत राहतील. त्यानंतरच्या प्रत्येक अतिरिक्त रिप्लायसाठी कंपन्यांना पैसे द्यावे लागतील.

24 तासांनंतर पाठवल्या जाणाऱ्या यूटिलिटी मेसेजेसवर मात्र आधीपासूनच चार्ज आकारला जातो. त्या नियमांत कोणताही बदल होणार नाही.

भारतात मेटाने ऑर्डर कन्फर्मेशन आणि डिलिव्हरी अपडेट्ससारख्या यूटिलिटी मेसेजेससाठी एक मानक दर निश्चित केला आहे. हा दर जीएसटीपूर्वी 0.115 रुपये प्रति डिलिव्हर्ड मेसेज असा आहे. त्यावर 18 टक्के जीएसटी जोडल्यानंतर हा दर प्रति मेसेज अंदाजे 0.136 रुपये इतका होतो. उदाहरणार्थ, एखाद्या बिझनेसने 1,000 ऑर्डर अपडेट्स पाठवले, तर त्याला जीएसटीपूर्वी 0.115 रुपये प्रति डिलिव्हर्ड मेसेज, किंवा 18 टक्के जीएसटी जोडल्यानंतर प्रति मेसेज अंदाजे 0.136 रुपये द्यावे लागतील.

पैसे किती लागणार, हे मेसेज कोणत्या प्रकारचा आहे त्यावर ठरणार आहे. प्रमोशनल ऑफर आणि सेल अनाउंसमेंट्ससारख्या मेटा मार्केटिंग मेसेजसाठी 0.8631 रुपये प्रति मेसेज आकारले जाणार आहेत. वन-टाइम पासवर्ड म्हणजे ओटीपीसारख्या ऑथेंटिकेशन मेसेजसाठी जीएसटीपूर्वी 0.115 रुपये प्रति मेसेज दर असेल.

हा बदल फक्त व्हॉट्सॲप बिझनेस प्लॅटफॉर्मसाठी लागू केला जाणार आहे, हेही लक्षात ठेवायला हवे. व्हॉट्सॲप किंवा व्हॉट्सॲप बिझनेस ॲप वापरणाऱ्या यूजर्सवर याचा कोणताही परिणाम होणार नाही.