स्टीव्ह स्मिथ मानेच्या दुखापतीमुळे बाहेर, डिसेंबरमध्ये न्यूझीलंड मालिकेत परतण्याची शक्यता

ऑस्ट्रेलियाचा अनुभवी फलंदाज स्टीव्ह स्मिथ (Steve Smith) याच्या पुनरागमनासाठी संघाला डिसेंबरपर्यंत थांबावे लागण्याची शक्यता आहे. डिसेंबरमध्ये न्यूझीलंडविरुद्ध घरच्या मैदानात कसोटी मालिका होणार आहे, तिथपर्यंत त्याची वाट पाहावी लागेल, असे दिसते. त्याच्या दुखापतीचे स्कॅन करण्यात आले आणि त्यातून मणक्यातील 'सर्व्हाइकल फॅसेट जॉइंट'ला दुखापत झाल्याचे समोर आले. या दुखापतीमुळे केपटाउनमध्ये साऊथ आफ्रिकेविरुद्ध सुरू असलेल्या निर्णायक कसोटीतून त्याला बाहेर व्हावे लागले.

मागील आठवड्यात गेबेरहामध्ये साऊथ आफ्रिकेविरुद्धच्या दुसऱ्या कसोटीच्या चौथ्या दिवशी स्मिथला मानेत दुखू लागले होते. तो त्रास कायम राहिला. मान जास्त हालचाल केल्यास दुखत होती, म्हणून मंगळवारपासून सुरू झालेल्या तिसऱ्या कसोटीत तो खेळू शकला नाही. त्यानंतर वैद्यकीय तपासणीत दुखापतीचे कारण स्पष्ट झाले आणि ती केव्हापर्यंत बरी होईल, तेही आता समोर आले आहे.

क्रिकेट ऑस्ट्रेलियाने स्पष्ट केले आहे की, 37 वर्षांचा हा खेळाडू आगामी स्थानिक मालिकेपर्यंत निवडीसाठी उपलब्ध नसेल. या काळात त्याच्यावरील उपचार आणि रिहॅबिलिटेशन सुरू राहील. यासंदर्भात क्रिकेट ऑस्ट्रेलियाने एक परिपत्रक काढले आहे. त्यात म्हटले आहे की, मागील आठवड्यात गेबेरहामध्ये दुसऱ्या कसोटीच्या चौथ्या दिवशी स्टीव्हच्या मानेला दुखापत झाली होती.

त्यावर एमआरआय स्कॅन करण्यात आले आणि ती दुखापत 'सर्व्हाइकल फॅसेट जॉइंट'संदर्भात असल्याचे दिसले. ही दुखापत आणि मानेच्या हालचालींवर आलेली मर्यादा यामुळे तो खेळण्यासाठी फिट नाही. स्टीव्हवरील उपचार आणि रिहॅबिलिटेशन सुरू राहील. न्यूझीलंडविरुद्धच्या आगामी स्थानिक कसोटी मालिकेसाठी तो पूर्णपणे फिट होऊन मैदानात परतेल, अशी अपेक्षा आहे.

स्मिथ बाहेर गेल्यामुळे जॉश इंग्लीशसाठी कसोटी संघात पुनरागमनाचा मार्ग खुला झाला. बुधवारी मिळालेल्या या संधीचा त्याने पुरेपूर फायदा घेतला. ऑस्ट्रेलियाचे दोन विकेट लवकर पडल्यानंतर दबावात फलंदाजी करताना इंग्लीशने 85 धावा केल्या आणि तो नाबाद राहिला. त्याच्या खेळीच्या जोरावर पाहुण्या संघाने 330/4 अशी धावसंख्या उभारली आणि साऊथ आफ्रिकेविरुद्ध पहिल्या डावात एका धावेची छोटी आघाडी मिळवली.

मागील वर्षी अॅशेस मालिकेच्या अखेरच्या सामन्यानंतर इंग्लीशचा हा पहिलाच कसोटी सामना आहे. लवकर स्थिरावण्याची आणि दबावाचा सामना करण्याची त्याची क्षमता पाहून त्याचा सहकारी खेळाडू मॅथ्यू रेनशॉ याने त्याचे कौतुक केले. रेनशॉ म्हणाला की, या डावखुऱ्या फलंदाजाने तेच केले, ज्याची त्यावेळी ऑस्ट्रेलियाला गरज होती.

रेनशॉ म्हणाला की, तो खूप प्रतिभावंत खेळाडू आहे. आम्ही त्याला अनेकदा व्हाइट बॉल फॉर्मेटमध्ये (वनडे आणि टी-20) असे करताना पाहिले आहे. आज आम्ही मैदानात उतरलो, तेव्हा आमच्यावर थोडा दबाव होता, कारण आम्ही लवकर दोन विकेट गमावले होते. त्यातच ज्या प्रकारे त्याने फलंदाजी केली, ते खूप सकारात्मक होते. ती अगदी त्याच्या अंदाजातील खेळी होती.